Elder Rubén V. Alliaud
Hitu ’Ahuru Hui mana fa’atere rahi
14 matahiti tō Rubén Alliaud fa’aru’era’a i tōna fare i Rāparata nō te haere mai hō’ē matahiti ’e tōna tonton i te Fenua Marite. ’Ua pohe tōna metua tāne, ’o Rubén Reynaldo Alliaud, ’e tē tupu ra te « hō’ē vārua ’ōrure hau » o Rubén.
’Ua pe’ape’a tōna metua vahine ’o María, ’e ’ua tono ’oia iāna i Houston (Texas), nō te ora ’e tōna taea’e, ’o Manuel Bustos, ’e tōna ’utuāfare. ’Ua ani ’oia i te hō’ē mea i te ’utuāfare o tōna taea’e : « ’Eiaha e ha’api’i i tāna tamaiti i tā rātou fa’aro’o. »
’Ua paraparau rā te vārua o te Fatu i taua taure’are’a hepohepo ra. ’Ua hi’o tōna mata nāhea te ’Ēkālesia i te fa’atāhō’ēra’a i te ’utuāfare Bustos nā roto i te pure ’e te tāvinira’a, ’e e’ita tāna e nehenehe e ’ape i te rahira’a Buka a Moromona i ni’a i te mau pa’epa’e o tōna piha.
Nō tōna ’ānoenoe, ’ua rave mai ’oia i te hō’ē buka ’e ’ua ’ite ’oia i te parau fafau a Moroni ē, e ti’a iāna ’ia ’ite e parau mau ānei te Buka a Moromona, nā roto i te pure.
« ’Ua putapū roa vau i terā parau fafau », ’ua parau teie taea’e tei pi’i-’āpī-hia ’ei Hitu ’Ahuru Huimana fa’atere rahi. « ’Ua hina’aro vau e tai’o i te buka. »
’Ua ha’apa’o ’oia i te parau a Moroni, ’e ’ua fāri’i mai ’oia i te pāhonora’a pāpū ’e ’ua ani i tōna tonton tei hitimahuta ē, ’ua hina’aro ’oia e bāpetizo iāna. ’Ua fa’areva ’oi’oi ’o tonton Manuel ia Rubén i Rāparata nō te ani i te parau fa’ati’a a tōna metua vahine. ’E ’aita i maoro roa, ’ua bāpetizohia ’oia. Mai taua taime ra, ’ua ha’apāpū te ’evanelia i fa’aho’ihia mai i te orara’a o Elder Alliaud.
’Ua fānauhia Rubén Vicente Alliaud i te 8 nō Tēnuare 1966, i Buenos Aires. ’Ua fa’aipoipo ’oia ia Fabiana Bennett Lamas i roto i te hiero nō Buenos Aires (Rāparata) i te 17 nō Tītema 1992. E ono tā rāua tamari’i.
’Ua noa’a ia Elder Alliaud te hō’ē parau tū’ite i te pae nō te ture i te fare ha’api’ira’a teitei nō Belgrano, i Buenos Aires, ’e ’ua rave ’oia i te mau ’ohipa rau i roto i te ture, ma te ’aravihi ta’a ’ē nō te mau hara teimaha. Mai te matahiti 1998, ’ua ’ohipa ’oia ’ei fa’atere ’āpiti nō Alliaud & Asociados.
’Ua tāvini ’oia ’ei Hitu ’Ahuru ārea, ’ei peresideni misiōni nō Rāparata i Córdoba, ’ei peresideni titi, ’ei melo ’āpo’ora’a teitei, ’ei ’episekōpo, ’ei peresideni pupu peresibutero ’e ’ei misiōnare i roto i te misiōni nō Urutue i Montevideo. I te taime ’a pi’ihia ai ’oia, tē tāvini ra ’oia ’ei ’orometua nō te institut, ’ei tauturu mātāmua i roto i te peresidenira’a nō te pū ha’api’ipi’ira’a misiōnare nō Rāparata ’e ’ei upo’o fa’atere nō te ’ohipa ha’apararera’a.