Elder Benjamin M. Z. Tai

Hitu ’Ahuru Hui mana fa’atere rahi

Nō ni’a i te metua tupuna o Elder Benjamin M. Z. Tai i te pae o tōna pāpā, ’ua haruhia ’oia, ’ua mau i te ’āuri ’e ’ua ha’apohehia e te mau nu’u tāpōnē tei haru ia Hong Kong i roto i te Tama’i Rahi II o te Ao nei.

Tau ’ahurura’a matahiti i muri mai, ’ua mātau Elder Tai ia Naomi Toma, nō Tāpōnē, ’o tei riro mai ’ei vahine nāna ’a tāvini ai ’oia ’ei peresideni pupu peresibutero nō tāna pāroita taure’are’a pīahi i Brigham Young University. ’O Naomi te peresideni Sōtaiete Tauturu i terā tau.

I te fa’a’itera’a Benjamin i tōna metua tāne, te huimana fa’atere tei tātuha’ahia, ’o Elder Kwok Yuen Tai ē, tē arapae ra ’oia ia Naomi ma te mana’o e fa’aipoipo iāna, ’aita tōna metua tāne i maramara. ’Oia mau, ’ua haere mai nā metua o Naomi, ’o Rikuo ’e Fumiko Toma, i Hong Kong nō te fārerei i nā metua o Benjamin. ’Ua fa’a’ite mai te metua o Naomi ē, maoti te ’evanelia a Iesu Mesia i ti’a ai te fa’aipoipora’a o Benjamin ’e o Naomi. ’Ua fa’aipoipohia rāua i roto i te hiero nō Roto Miti i te 23 nō Tītema 1995. E ono tamari’i tā rāua.

« E mea ’ē tō tātou mau ta’ere, terā rā, tē vai rā te taura tāhō’ē nō te fa’aro’o ’e te tusia i roto ia tātou », te parau ïa a Elder Tai. ’Ua ’ite Elder Tai ē, e tā’amu i teienei teie mau taura’a nō te fa’aro’o ’e te tusia iāna i te mau feiā mo’a ’ati a’e i te ao nei.

’Ua fānauhia Benjamin Ming Zhe Tai i te 20 nō Mē 1972, i Hong Kong, nā Kwok Yuen ’e ’o Hui Hua Tai. Nā roto i te ’ohipa a tōna metua tāne, ’ua fa’a’ati te ’utuāfare i teie nei ao hou ’a ha’amau ai ia rātou i California Apato’a (Marite), i reira Elder Tai i te orara’a i tōna taure’are’ara’a. I roto i tōna ’utuāfare, ’ua pia tōna nā metua i te hō’ē ’api parau tei pāpa’ihia « ’Are’a vau e tō’u ato’a ra ’utuāfare, e ha’amori ïa mātou ia Iehova » (Iosua 24:15). ’Ua riro te reira ’ei tumu parau nō te ’utuāfare Tai.

I muri mai i te tāvinira’a i tāna misiōni i te misiōni nō Auterāria i Melbourne, ’ua noa’a mai ia Elder Tai te hō’ē parau tū’ite Licence nō te fa’a’ohipara’a i te ihi i BYU i te matahiti 1996 ’e muri iho i te parau tū’ite Master nō te ’ohipa fa’aterera’a taiete i te fare ha’api’ira’a UCLA, i te matahiti 2003. ’Ua rave ’oia i te ’ohipa i Tāpōnē ’e i Hong Kong i roto i te fa’ahotura’a moni ’e te faufa’a fenua.

’Ua tāvini Elder Tai ’ei Hitu ’Ahuru ārea, ’ei peresideni mata’eina’a, ’ei tauturu i roto i te peresidenira’a mata’eina’a, ’ei pāpa’i parau fa’atere nō te mata’eina’a, ’ei peresideni pupu peresibutero, ’ei peresideni ’āma’a ’e ’ei ’orometua Ha’api’ira’a Sābati.