Usa ka Mas Balaan nga Sundanan sa Pagserbisyo
Gikan sa tibuok kalibutan nga debosyonal alang sa mga batan-ong hamtong [young adult], “Usa ka Timailhan sa Tinuod ug Buhi nga Simbahan sa Ginoo,” nga gihatag diha sa Brigham Young University–Idaho niadtong Mayo 6, 2018.
Hinaut nga mas andam ug mas epektibo kitang mosunod sa buhing Kristo, samtang nagtinguha kita nga mamahimo Niya nga tinuod nga mga disipulo pinaagi sa pagpangalagad sama sa Iyang gibuhat.
Mga paghulagway pinaagi ni Kelley McMorris
Sa dihang 15 o 16 pa ko, ang ako rang kaugalingon ang akong gihunahuna ug, sama sa kadaghanan kanato sa atong kabatan-on, wala mahimutang, dili sigurado, ug dali ra nga maapektuhan. Mibati ko nga walay tumong, maulawon, ug salikwaot. Wala makatabang nga nagpuyo sa layo ang akong mga ginikanan didto sa Saudi Arabia samtang anaa ako sa boarding school sa hilit nga dapit sa kabaybayonan sa England. Kon hisgutan ang eskwelahan, mas maabi-abihon pa ang Hogwarts nga naa si Snape.
Ang dautang panahon komon lang niana nga kabaybayonan, apan sa usa ka tingtugnaw adunay grabe kaayong unos nga mihuros tabok sa Irish Sea nga ang mga hangin sama kakusog sa dakong bagyo. Mga 5,000 ka balay ang nabahaan, nagkanihit ang pagkaon, ug ang mga tawo napasagdan nga walay kuryente o bisan unsang pamaagi sa pagpainit ug pagsuga sa ilang mga balay.
Sa pagsugod og us-os sa baha, gipadala kami sa eskwelahan aron motabang sa pagpanglimpyo. Nakalitan ko nga masinati ang ingon niana nga natural nga katalagman sa duol. Ang tubig ug lapok anaa bisan asa. Ang mga panagway niadtong kansang mga panimalay nabahaan, nangluspad ug nagniwang. Wala sila makatulog sulod sa daghang mga adlaw. Ang akong mga kauban sa eskwelahan ug ako mitrabaho, mibalhin sa mga gamit nga nahumod sa tubig ngadto sa ibabaw nga mga andana ug mitangtang sa nangadaut nga mga carpet.
Apan ang labing nakapahingangha nako mao ang pagbati sa panaghiusa nga napalambo. Dihay maanindot, maayo gayud nga pagbati tali sa mga tawo nga nagkahiusa sa usa ka takus nga kawsa ubos sa mahagiton nga mga kahimtang. Sa kaulahian namalandong ko nga kadtong mga pagbati sa kawalay kasiguroan nga kasagarang milukop sa akong hunahuna sa akong kabatan-on nawala samtang miapil ko niining dakong paningkamot sa pagtabang sa among mga silingan.
Ang pagdiskubre nga ang pagtabang sa uban maoy tambal sa akong magul-anon, naghunahuna ra sa kaugalingon nga kahimtang makapausab unta sa akong kinabuhi. Apan wala, tungod kay ang pagdiskubre wala gayud makatuhop og sakto, ug napakyas ko sa pagpamalandong og maayo sa unsay nahitabo. Kana nga pagsabut ulahi nga miabut.
Ang Pagdapit sa Pagpangalagad
Litrato sa inahan ug anak nga babaye pinaagi ni Linda Jean Purnell
Naghunahuna ako niini atol sa Abril 2018 nga kinatibuk-ang komperensya samtang nadungog nako ang gibalik-balik nga tawag sa pagpangalagad sama sa pagpangalagad sa Manluluwas—ug sa pagbuhat niini tungod sa gugma, agig pag-ila nga kitang tanan mga anak sa atong Langitnong Amahan.
Kita moserbisyo dili tungod kay ang atong pagserbisyo giihap ug gisukod apan tungod kay kita nahigugma sa Langitnong Amahan ug nadasig sa mas taas ug halangdon nga paningkamot—sa pagtabang sa atong kahigalaan nga makakaplag ug magpabilin diha sa dalan pauli ngadto Kaniya. Kita maghigugma ug magserbisyo sa atong mga silingan sama ni Jesus kon Siya anaa sa atong dapit, maningkamot gayud sa pagpalambo sa mga kinabuhi sa katawhan ug pagpagaan sa ilang mga palas-anon. Dinhi maggikan ang hingpit nga kalipay ug malungtaron nga katagbawan, alang sa tighatag ug sa tigdawat, samtang atong gipaambit ang mga bunga sa pagkahibalo ug pagbati sa atong walay kinutuban nga bili ug sa mahangturon nga gugma sa Dios alang sa matag usa kanato.
“Ang usa ka timailhan sa tinuod ug buhi nga Simbahan sa Ginoo kanunay mao ang organisado, gidumala nga paningkamot sa pagpangalagad ngadto sa indibidwal nga mga anak sa Dios ug sa ilang mga pamilya,” miingon si Presidente Russell M. Nelson. “Tungod kay kini Iyang Simbahan, kita isip Iyang mga sulugoon mangalagad ngadto sa usa, sama sa Iyang gibuhat. Mangalagad kita sa Iyang ngalan, sa Iyang gahum ug katungod, ug uban sa Iyang mahigugmaong pagbati.”1
Nasayud ako nga kon atong patalinghugan kining tawag sa pagpangalagad, mas maghunahuna kita sa uban kay sa atong kaugalingon; molambo diha sa pagtuo, kamasaligon, ug kalipay; ug mabuntog ang atong pagtutok lamang sa kaugalingon ug ang pagbati sa kahaw-ang ug kaguol nga uban niini.
Ang Pagpangalagad Makapausab Kanato
Ang nakanindot niini nga matang sa pagpangalagad mao nga kini nakatabang sa uban, apan makausab gihapon kini kanato pinaagi sa pagpalayo kanato gikan sa atong mga kabalaka, mga kahadlok, mga kagul-anan, ug mga pagduhaduha. Sa sinugdanan, ang pagserbisyo sa uban mahimong mopalinga lamang kanato gikan sa atong kaugalingong mga problema, apan dali kanang mausab ngadto sa usa ka butang nga mas dako ug mas maanindot. Magsugod kita sa pagsinati og inspirasyon ug kalinaw, nga hapit dili nato kini mabantayan. Mapakalma, mapainit, ug mahupay kita. Ug makaila kita og kalipay nga moabut lamang niini nga paagi.
Sama sa gipasabut ni Presidente Spencer W. Kimball (1895–1985): “Ang abunda nga kinabuhi nga nahisulat diha sa mga kasulatan maoy espiritwal nga sumada nga makab-ut pinaagi sa pagpilo-pilo sa atong pagserbisyo sa uban ug pinaagi sa paghatag sa atong mga talento diha sa pagserbisyo sa Dios ug sa tawo.” Midugang siya, “Mahimo kitang mas undanon samtang moserbisyo kita sa uban—sa pagkatinuod, mas sayon ang ‘pagkaplag’ sa atong mga kaugalingon tungod kay mas dako na kaayo ang atong pangitaon!”2
Usa ka Tawag gikan sa Agalon
Si Kristo ug ang mga Mangingisda, ni J. Kirk Richards
Sa dihang gitawag sa Manluluwas si Pedro, Andres, Santiago, ug Juan sa pagsunod Kaniya, ang ilang kausaban sa tumong ug gitutokan diha-diha dayon: “Dihadiha gibiyaan nila ang ilang mga laya ug mikuyog kaniya.” (Mateo 4:20).
Apan sa dihang ang Manluluwas gikuha gikan kanila sa labing bangis nga paagi, namalik sila sa ilang pagpangisda, sa unsay ilang gibati nga ilang nahibaloan. Sa usa ka okasyon, ang nabanhaw nga Manluluwas miabut kanila samtang nangisda sila nga walay kuha.
“Siya miingon kanila, Itaktak ninyo ang pukot dapit sa tuo sa sakayan, ug aduna kamoy makuha. Busa ilang gitaktak kini, ug karon wala na sila makadaug sa pagbutad niini tungod sa kadaghan sa isda” (Juan 21:6).
Dili lang kini usa ka pagpakita nga wala Siya mawad-i sa Iyang gahum apan kusganon usab nga pagpakita nga nangita sila diha sa sayop nga dapit ug nakatutok sa sayop nga butang. Samtang nagdungan sila sa pagpangaon og isda diha sa baybayon, ang Manluluwas nangutana kang Pedro sa tulo ka higayon kon siya nahigugma ba Kaniya. Sa matag higayon uban sa nagkadako nga kabalaka, si Pedro mitubag nga nahigugma siya. Pagkahuman sa matag tubag ni Pedro, si Jesus mihangyo kang Pedro sa pagpakaon sa Iyang karnero. (Tan-awa sa Juan 21:15–17.)
Nganong katulo man nangutana ang Manluluwas kang Pedro kon nahigugma ba siya Kaniya? Si Pedro gitawag kaniadto sa pagsunod kang Jesus, ug dali siyang misanong, mibiya sa iyang pagpangisda. Apan sa dihang gikuha si Jesus gikan kanila, nagbangutan si Pedro; wala siya kahibalo unsay buhaton. Mibalik siya sa bugtong butang nga iyang gibati nga iyang nahibaloan—pagpangisda. Karon gusto ni Jesus nga makadungog gayud si Pedro Kaniya ug makasabut sa gibug-aton sa pagdapit niining higayona. Gikinahanglan Niya nga makasabut si Pedro kon unsay gipasabut nga mahimong disipulo sa nabanhaw nga Kristo karon nga dili na Siya mouban kanila sa pisikal nga paagi.
Unsa man ang gusto sa Ginoo gikan ni Pedro? Gusto Niya nga pakan-on ni Pedro ang Iyang mga karnero, ang Iyang mga nate. Trabaho kini nga kinahanglang buhaton. Nailhan ni Pedro kining malumo, direkta nga tawag sa iyang Agalon, ug ang labaw nga Apostol misanong, maisugon ug walay kahadlok nga mihatag sa nahabilin niyang kinabuhi ngadto sa pagpangalagad diin siya gitawag.
Sugdi pinaagi sa Pag-ampo
Aduna kitay laing labaw nga Apostol sa kalibutan karon. Si Presidente Nelson mipadangat sa imbitasyon nganha kaninyo ug ngari kanako sa pagpakaon sa karnero ni Jesus. Tungod sa tanang mga makabalda sa atong palibut ug sa daghan kaayong ginagmayng butang nga mokuha sa atong pagtagad, ang hagit karon mao ang pagsanong ngadto niini nga imbitasyon ug sa paglihok—sa pagkatinuod adunay buhaton, tinud-anay nga mag-usab, ug magpakabuhi sa lahing paagi.
Tingali ang inyong pangutana karon mao ang, “Asa man ko magsugod?”
Sugdi pinaagi sa pag-ampo. Si Presidente Nelson mihagit kanato nga, “palapdan pa ang [atong] kasamtangang espiritwal nga abilidad sa pagdawat og personal nga pagpadayag.”3 Pangutana sa inyong Langitnong Amahan kon unsay mahimo ninyong buhaton ug alang kang kinsa. Sunda ang bisan unsang impresyon nga inyong madawat, bisan unsa pa ka gamay niini. Lihoka kini. Ang bisan unsang gamay nga buhat sa kamabination makahimo kanato sa pagtan-aw sa gawas sa atong kaugalingon ug magdala og kaugalingon niining mga panalangin. Mahimong usa kini ka mabination, wala damha nga pag-text sa usa ka tawo. Tingali usa kini ka bulak, mga cookies, o mabinationg pulong. Tingali paghawan kini sa usa ka tanaman o nataran, pagpanglaba, paghugas sa sakyanan, pagputol sa mga sagbot, paghawan sa snow, o pagpaminaw lang.
Sama sa gisulti ni Sister Jean Bingham, Kinatibuk-ang Presidente sa Relief Society, “Usahay maghunahuna kita nga kinahanglang mobuhat kita og usa ka butang nga bilihon kaayo ug bayanihon aron “maihap” isip pagserbisyo sa atong mga silingan. Apan ang yano nga mga buhat sa serbisyo mahimong adunay lawom nga mga epekto sa uban—ingon man sa atong mga kaugalingon.”4
Mahimong magpanuko kamo sa pagsugod, nakombinser nga wala kamoy panahon o nga dili kamo makahimo og kalainan, apan mahingangha kamo sa unsay mahimo sa ginagmayng butang. Si Presidente Nelson milatid og mas taas ug mas balaan nga sundanan sa pagserbisyo alang kaninyo ug kanako. Kon mosanong kita, atong madiskubrihan kon unsa ka makapatagbaw, makagawasnon, ug makapakalma kini kanato ug sa unsang paagi nga mahimo kitang hinungdan sa kausaban ug kahupayan sa mga kinabuhi sa uban.
Usahay, sama sa pagkahuman sa usa ka misyon, tingali matintal kita sa pag-ingon, “Nan, nabuhat na nako. Ang uban na usab ang paserbisyuha. Gusto ko nga mopahulay.” Apan ang tinuod nga pagpangalagad dili mohunong sa makadiyot. Usa kini ka matang sa pagpakabuhi. Mahimong mohunong kita kadiyot sa atong regular nga mga kalihokan ug mga holiday aron mopahulay ug magpalagsik, apan ang atong pakigsaad nga responsibilidad sa paghigugma sa usag-usa sama sa Iyang paghigugma kanato ug sa pagpakaon sa Iyang karnero dili mohunong.
Pagpangalagad sa Tibuok Kalibutan nga Simbahan
Litrato sa doktor ug pasyente nga nagginaksanay pinaagi ni Wendy Gibbs Keeler
Mapasigarbuhon kaayo ko nga nahisakop sa usa ka Simbahan nga nagbuhat og pagpangalagad. Niadto lang 2017, ang atong mga miyembro midonar og sobra sa 7 milyones ka oras nga pagboluntaryo sa pagpatubo, pag-ani, ug pag-apud-apud sa pagkaon ngadto sa mga kabus ug timawa. Ang Simbahan mihatag og limpyo nga tubig sa tunga sa milyon ka mga tawo ug mga wheelchair alang sa 49,000 ka mga tawo sa 41 ka mga nasud. Ang mga boluntaryo mihatag og mga antipara ug mga serbisyo kalabut sa mata, ug mibansay sila og 97,000 ka mga tig-amuma alang niadtong adunay kalisdanan sa panan-aw sa 40 ka mga nasud. Katloan ug tulo ka libo ka mga tig-amuma ang gibansay sa pag-amuma og mga inahan ug mga masuso sa 38 ka mga nasud. Wala pay labut ang Helping Hands, diin gatusan ka libo sa atong mga tawo midonar og minilyon ka mga oras sa bag-o lang nga mga katuigan. Ang mga miyembro sa Simbahan ni Jesukristo daling molihok aron sa pagtabang niadtong naapektuhan sa mga katalagman dako man ug gamay, ingon man sa pagpalambo sa ilang mga kasilinganan ug mga komunidad.
Ang bag-ong gimugna nga inisyatibo sa Simbahan nga JustServe, nga naglista og mga oportunidad sa pagserbisyo, aduna nay kapin sa 350,000 ka rehistrado nga mga boluntaryo, kinsa mitampo og minilyon ka oras sa pagtabang diha sa ilang lokal nga mga komunidad.5
Mao kini ang Simbahan sa buhat. Mao kini ang atong gihimo. Mao kini ang inyong gihimo. Himoa kini nga mohulagway kon si kinsa gayud kamo.
Tulo ka Matang sa Pagserbisyo
Gusto nakong hatagan og gibug-aton ang tulo ka malukpanon nga matang sa pagserbisyo diin ang matag usa kanato adunay oportunidad nga makaapil.
1. Pagserbisyo diin gitahasan o gidapit kita sa paghimo isip usa ka responsibilidad sa simbahan. Maningkamot kita sa matang sa pagpangalagad nga gibahandi, dili gisukod, diin atong hunahunaon, iampo, ug tabangan kadtong gihatag kanato nga atong responsibilidad sa pag-atiman.
2. Pagserbisyo nga gipili natong buhaton sa atong kaugalingong pagbuot. Usa kini ka sumpay sa nahauna, nga modagayday sa tanan natong inadlaw-adlaw nga mga buhat ug mga inter-aksyon samtang mas mahunahunaon kitang magtinguha sa paghikalimot sa atong kaugalingon ug sa pagtan-aw ngadto sa uban. Walay pormal nga tahas, apan nadasig kita sa usa ka tinguha sa pagsunod kang Kristo, nga magsugod pinaagi sa dugang kamabination ug mas masinabtanon niadtong naglibot kanato.
3. Serbisyo publiko. Kon mahimo, ilambigit ang inyong kaugalingon sa politika nga motutok sa pagserbisyo ug sa pagpalambo sa mga indibidwal ug mga komunidad. Likayi ang politikanhong pakigbangi nga nagduso sa mga tawo sa pagtuo diha sa magkasumpaki nga mga panglantaw, dili maayo, ug makadaut sa mga komunidad, mga nasud, ug mga kontinente. Apil sa mga politiko nga adunay komon nga kawsa sa pag-alim sa nasamok nga mga kinabuhi sa ilang kaugalingong hurisdiksyon ug lapas pa. Mahimo kamong tingog nga matimbangon ug makatarunganon, nag-awhag og kaangayan sa tanang suok sa katilingban. Adunay nagkadako nga panginahanglan nga itampo ninyo ang inyong kusog ngadto niining matang sa takus nga pag-apil sa sibika.
Makausab Kita sa Atong Kaugalingong Kalibutan
Kon mobasa kita sa balita, malagmit nga atong bation nga nagkalahi na gayud ang kalibutan. Kon ang matag usa kanato molihok sa dagko ug gagmay nga mga paagi kada adlaw, mausab nato ang atong kaugalingong kalibutan ug niadtong anaa sa atong palibut. Samtang moserbisyo kamo sa inyong mga silingan ug moserbisyo uban sa inyong silingan sa inyong komunidad, makahimo kamo og mga higala kinsa adunay samang tinguha sa pagtabang. Mamahimo kining lig-on nga panaghigalaay, magtukod og mga taytayan nga magsumpay sa mga kultura ug tinuohan.
Kon mosanong kamo sa pagdapit nga mangalagad sama sa gihimo ni Jesus, mausab kamo, mahimong mas dili maghunahuna sa kaugalingon. Inyong madiskubrihan ang hingpit nga kalipay nga moabut gikan sa pagpangalagad sumala sa pamaagi sa Manluluwas, mabiyaan ang inyong mga kabalaka ug kawalay kasigurohan ug kagul-anan nga naggikan sa inyong gihunahuna nga kakulangan.
Tingali ang usa ka ngalan o usa ka kawsa misantop na sa hunahuna. Malagmit nga usa kini ka pagdapit gikan sa Espiritu, ug tingali nakadawat na kamo niini kaniadto. Tabangi, tutuki ang panginahanglan sa uban, ug sapnaya. Pilia ang pagsanong niini nga pagdapit, ug pag-ampo karon aron masayud unsay inyong mahimo. Kon inyong makita ug mabati ang mga panalangin nga mahatag niini kaninyo ug niadtong inyong gipangalagaran, gusto ninyo nga mahimo kining inadlaw-adlaw nga sundanan.
Ang atong labing taas ug labing maayong paningkamot mao ang pagpaambit sa kahayag, paglaum, hingpit nga kalipay, ug tumong sa ebanghelyo ni Jesukristo ngadto sa tanang mga anak sa Dios ug motabang kanila nga makakaplag sa dalan pauli. Ang pagtabang, pagserbisyo, ug pagpangalagad kanila mao ang pagpakita sa ebanghelyo nga naglihok. Samtang ato kining himoon nga pamaagi sa pagpakabuhi, atong madiskubrihan nga makatagbaw kini sa talagsaong paagi, ug kini ang paagi nga makakaplag kita og kalinaw ug kalipay nga tingali wala nato makita kaniadto.
Sa ingon niini nagpakabuhi ang Manluluwas, ug mao kini hinungdan nganong Siya nabuhi—sa paghatag og hingpit nga tambal ug katapusang pagpang-ayo pinaagi sa Iyang talagsaon, walay kinutuban, maulaong gasa alang kaninyo ug kanako. Hinaut nga mas andam ug mas epektibo kitang mosunod sa buhing Kristo, samtang nagtinguha kita nga mamahimo Niya nga tinuod nga mga disipulo pinaagi sa pagpangalagad sama sa Iyang gibuhat.