Kon ang Pagpanggunit Mahimong Sakit

Jeff Borders

Washington, USA

Usa ka init kaayo nga adlaw sa Hulyo, mitabang ko sa akong bayaw sa pagtukod og riprap nga paril [retaining wall]. Kini nga proyekto sa wala madugay mipatigi kanako batok sa mga gamot sa namulak nga kahoyng cherry nga nag-ali.

“Sayon ra ni,” naghunahuna ko.

Gipundok nako ang tukma nga mga himan ug mikalot libut sa mga gamot aron adunay lugar sa pagtrabaho. Dayon mikuha ko og gabas ug, sa walay pagduhaduha, misugod sa pagputol sa mga gamot. Dali ra nga nangaputol ang gagmay nga mga gamot, apan sa dihang mibalhin ko sa mas dagko nga mga gamot, dali nakong naamguhan nga dili kini mahimong sayon. Adunay usa ka gamot nga lisud gayud.

Nagkagut sa akong ngipon, determinado ko nga moputol niana nga gamot. Midagayday ang singot sa akong liog tungod sa naglagiting nga kainit sa adlaw samtang mas hugot nakong gipislit ang gatilyo sa de kuryente nga gabas. Mikurog ang gabas hangtud nga nauyog ang akong tibuok lawas. Akong nabatyagan ang akong tuo nga kamot—ang nagpislit sa gatilyo sa gabas—nga misugod sa pagsakit. Gibaliwala nako ang sakit ug padayon nga migunit.

Sa katapusan, naputol sa gabas ang gamot. Gibuhian nako ang gatilyo ug mibati sa tam-is nga kalipay sa kadaugan. Hinoon, sa akong paghubo sa akong gwantis, nakabantay ko og gamay nga piraso sa panit nga napaksit gikan sa akong kamot.

Samtang naghunahuna ako niini nga kasinatian, nakaamgo ko nga ang paggunit sa gabas, sa usa ka paagi, susama sa paggunit sa gunitanan nga puthaw. Gisultihan kita nga manggunit sa gunitanan nga puthaw sa atong pagpadayon sa kinabuhi. Apan tungod lang kay nanggunit kita wala magpasabut nga dili kita makasinati og mga higayon sa kasakit. Nasamdan ang akong kamot samtang nanggunit ko sa gabas. Sa samang paagi, moagi kita og mga pagsulay ug mga kalisdanan samtang kanunay kitang manggunit sa gunitanan nga puthaw.

Ang Langitnong Amahan nasayud nga ang panaw pabalik Kaniya puno sa kakuyaw. Mao nga Iyang gihatag kanato ang mga kasulatan ug ang mga pulong sa mga propeta aron sa pagtabang kanato. Samtang manggunit kita niining mga butanga agi sa atong mga pagsulay ug kalisdanan sa mortalidad, moabut ang adlaw nga mobalik kita ngadto sa Iyang presensya.

Sa atong pagbalik Kaniya, makahimo kita sa pagtan-aw sa atong mga kamot, nga nanggunit sa gunitanan nga puthaw, usahay bisan sa kasakit o kalisud. Ug mahibalo kita nga uban sa tabang sa Langitnong Amahan ug pinaagi sa maulaong gahum ni Jesukristo, nanggunit kita og maayo, bisan unsa pa ang mga babag nga atong nasugatan.