Kami Mga Saksi: Ang Napulog Duha ka mga Apostoles Karon
Ang moderno nga mga Apostoles mipaambit sa ilang mga hunahuna sa ilang sagrado nga tawag [calling].
Litrato pinaagi sa Busath Photography
Sulod sa 189 ka tuig sukad sa pag-organisar sa Ang Simbahan ni Jesukristo sa mga Santos sa Ulahing mga Adlaw, 102 ka mga lalaki ang gitawag nga moserbisyo isip sakop sa Korum sa Napulog Duha ka mga Apostoles. Bisan tuod ang Ginoo mimando na og daghang mga kausaban sa Simbahan sukad niadto, ang sukaranan nga mga katungdanan sa usa ka Apostol nagpabilin nga mao gihapon.
Gikan sa iyang opisina duol sa Temple Square, si Presidente M. Russell Ballard, Akting nga Presidente sa Korum sa Napulog Duha ka mga Apostoles, namulong kabahin sa espiritwal nga responsibilidad nga gihatag ngadto sa mga Apostoles sa pagpamatuod kabahin sa Manluluwas ngadto sa tibuok kalibutan, sa espesyal nga koneksyon nga ilang giambitan uban sa mga misyonaryo, ug sa pipila ka komon nga sayop nga mga pagsabut mahitungod sa pagkahimong “usa ka apostol, manalagna ug tigpadayag.” Sa dihang gipangutana kon adunay uban pa nga mga sakop sa Korum sa Napulog Duha ka mga Apostoles nga iyang irekomendar nga mamulong mahitungod sa ilang sagrado nga tawag isip kabahin niini nga artikulo, si Presidente Ballard dali nga mitubag, “Oo. Silang tanan.”
Pagpaminaw ug Pagsabut
Dagko kaayo nga mga hagit ang giatubang sa mga Apostoles karon. Mangalagad sila sa mga kongregasyon sa tibuok kalibutan nga nagsinati og kagubot sa politika, pagkatibulaag sa pamilya, walay hunong nga pagpamugos diha sa social media, ug walay kasigurohan sa ekonomiya. Importante alang sa mga Apostoles nga makasabut sa mga hagit ug mga kahimtang nga giatubang sa mga miyembro.
Isip mga lider sa Simbahan, ang mga Apostoles kinahanglang mahibalo sa mga tawo ug sa ilang mga kahimtang aron makahimo sa pagserbisyo kanila.
“Kinahanglang masayud kami sa mga butang nga nakaapekto sa kinabuhi sa mga tawo,” miingon si Elder Ulisses Soares. “Ang mga Apostoles kinahanglang anaa sa nagpadayon nga proseso sa pagkat-on, pagpangutana, ug pagdawat og inspirasyon ug pagpadayag.”
Bisan kon importante kaayo nga makasabut sa unsay giatubang sa mga miyembro, mas labi pang importante nga ang mga Apostoles maminaw pag-ayo sa magiyahong tingog sa Dios ug masayud sa kabubut-on sa Ginoo, miingon si Presidente Ballard. “Mao kini ang Simbahan sa Ginoo, ug ang atong dakong hagit mao ang pagsiguro nga nahiuyon kita sa unsay gusto Niya nga atong buhaton sa Iyang gingharian dinhi sa yuta,” miingon si Presidente Ballard.
Talagsaon nga mga Saksi
Samtang ang matag Apostol namulong mahitungod sa iyang tawag, dali kaayong naklaro nga ang administratiba nga mga butang dili mao ang nag-una nila nga buluhaton. Ang labing importante nilang responsibilidad mao lang gayud gihapon sa kanunay—kinahanglan silang mahimo nga “talagsaon nga mga saksi sa ngalan ni Kristo sa tibuok kalibutan” (Doktrina ug mga Pakigsaad 107:23).
Ang katapusang mando sa Manluluwas ngadto sa Iyang mga Apostoles (tan-awa sa Mateo 28:19–20) mao ang pagpanglakaw aron “sa pagtudlo, sa pagpamatuod, sa pagbunyag, ug sa pagtukod ug paglig-on sa Iyang Simbahan,” miingon si Presidente Ballard.
Karon ang responsibilidad sa mga Apostoles wala mausab. “Una ug labaw sa tanan, sa tanang panahon, kami mga saksi sa buhi nga reyalidad ni Ginoong Jesukristo,” miingon si Elder David A. Bednar. “Dili kami mga tigdumala; mga tigpangalagad kami sa ebanghelyo ni Jesukristo.”
Ang mga Apostoles gisugo nga “mahimong tigbiyahe nga mga saksi” kinsa moadto sa “tibuok kalibutan,” miingon si Elder Jeffrey R. Holland. “Gusto namo nga bisan ang labing layo nga yunit sa Simbahan, maghisgot kabahin sa heyograpiya, mobati nga adunay suod kaayo nga sumpay tali kanila ug sa propeta sa Ginoo,” miingon siya. “Kasagaran kini ang gisulti, ‘Gihimo sa Simbahan nga morag gamay ra ang kalibutan.’ Kalabut sa Apostolikanhon nga pagkontak, naglaum kami nga maingon niini kanunay.”
Busa Panglakaw Kamo, ug Tudlui ang Tanang Kanasuran, ni Harry Anderson
Maabut ang Matag Stake
Si Elder Quentin L. Cook mipasabut nga sulod sa upat ka tuig, ang matag stake ug ward, district ug branch, sa Simbahan adunay usa ka sakop sa Napulog Duha nga moabut ug makighimamat sa mga lider niini—ug magbansay kanila sa propetikanhon nga mga prayoridad.
“Ang mga komperensya sa pagpangulo nakatugot kanato sa pagtuman sa atong doktrinal nga responsibilidad sa ‘pagtukod sa simbahan ug pagdumala sa tanan nga mga kalihokan sa mao diha sa tanan nga mga nasud’ [Doktrina ug mga Pakigsaad 107:34] ubos sa direksyon sa Unang Kapangulohan,” miingon siya.
Sa tiningub nga paagi, ang abunda, gamhanan nga mga kasinatian sa pagpanudlo sa mga sakop sa Korum sa Napulog Duha ka mga Apostoles motabang sa paggiya niining lokal nga mga lider samtang mohimo sila og importanting mga desisyon sa pag-awhag ug pagsuporta sa mga miyembro tadlas sa ilang mga hagit, miingon si Elder Bednar.
“Samtang moadto kami sa lain-laing mga dapit, among mabati ang kamaayo sa mga miyembro,” miingon si Elder Gerrit W. Gong. “Among nadungog ang mga kasinatian ug nakakat-on kami og mga butang nga nakatabang kanamo sa pagsabut samtang magtinambagay kami isip usa ka korum mahitungod sa unsay nahitabo sa lain-laing mga bahin sa kalibutan ug sa nagkalain-laing mga grupo sulod sa Simbahan.”
Ang pagbiyahe ngadto sa mga komperensya sa pagpangulo “naghatag kanamo og oportunidad nga makig-uban sa talagsaon, buotan nga mga tawo,” miingon si Elder Cook. “Moadto kami sa ilang mga panimalay, ug aduna kami kahigayunan nga mangalagad kanila. … Ang pagpangalagad sa mga Santos ang nakatandog pag-ayo sa among mga kasingkasing. Buhaton namo kini uban sa giya sa Espiritu Santo ug sa Manluluwas ug uban sa kahibalo nga nakat-unan pinaagi sa kasinatian, ang uban sagrado kaayo aron ipaambit,” miingon siya.
Pagpangalagad ngadto sa mga Indibidwal
Human sa 43 ka tuig isip General Authority ug karon anaa na sa iyang ikaupat nga dekada sa pagserbisyo diha sa Korum sa Napulog Duha ka mga Apostoles, ang mga katungdanan ni Presidente Ballard midala kaniya ngadto sa kadaghanan sa mga nasud sa kalibutan, nagtugot kaniya nga personal nga moatubang sa pagpangalagad sa dili maihap nga mga miyembro ug mga misyonaryo. Minilyon ang naminaw aron makadungog sa iyang mga pakigpulong sa kinatibuk-ang komperensya ug sa debosyonal. Apan samtang aduna siyay responsibilidad sa tibuok kalibutan, ang Espiritu Santo nagtugot kaniya nga makig-istorya ug mopanalangin sa mga indibidwal. Kining daw makita nga pagkasukwahi [paradox] mao ang pamaagi sa Manluluwas, miingon siya. “Usahay makadawat ko og sulat gikan sa usa ka tawo nga nag-ingon, ‘Mitambong ko sa usa ka miting, ug ikaw adunay gisulti nga nakapausab sa akong kinabuhi.’ Mao kana ang gahum sa Espiritu Santo. Ang Ginoo nagpakabana bisan sa labing gamay nga mga detalye sa Iyang Simbahan.”
Ang “dili maihap nga gidaghanon sa maanindot, yano nga mga kasinatian uban sa mga miyembro sa Simbahan sa tibuok kalibutan” mao ang kahulugan sa apostolikanhon nga pangalagad, miingon si Elder Bednar. “Ang Ginoo mopadala og usa ka sakop sa Korum sa Napulog Duha ngadto sa piho nga mga dapit sa piho nga mga panahon diin makasugat kami og matinud-anon nga mga Santos sa Ulahing mga Adlaw ug sa uban kinsa sa kasagaran nanlimbasug o nagkinahanglan og kahupayan ug kasiguroan. Ang Dios ang mihan-ay niadto nga mga inter-aksyon,” miingon si Elder Bednar.
Miingon si Elder Ronald A. Rasband nga human sa iyang tawag ngadto sa pagka-apostol, iyang nakat-unan nga kinahanglan siyang mogahin og dugang nga oras sa matag kalihokan sa iyang kinabuhi aron makahimo siya sa pag-abi-abi sa mga miyembro sa Simbahan ug sa uban. “Dili kini mahitungod kanako,” miingon siya. “Mahitungod kini sa pagtahud ug pagpasidungog sa mga miyembro sa Simbahan alang sa katungdanan sa pagka-apostol.”
Miingon si Elder Rasband nga atol sa pag-orden kaniya ngadto sa pagka-apostol, siya gitudloan, “‘Gibutang ka namo sa usa ka posisyon nga mahimong talagsaon nga saksi sa ngalan ni Kristo sa tibuok kalibutan … sa tanang panahon ug diha sa matag kahimtang.’ Kadto nga mga pulong gilakip sa akong ordinasyon: ‘sa tanang panahon ug diha sa matag kahimtang.’”
Si Presidente Ballard sa Spain
Si Elder Holland sa England
Si Elder Uchtdorf sa Russia
Si Elder Bednar sa Peru
Mga litrato pinaagi ni Juan Antonio Rodriguez (Spain), Simon Jones (England), Luis Antonio Arroyo Abando (Peru), Christen Albo (Argentina), Dalene Griffin (Mexico), Alexandre Borges (Brazil)
Usa ka Importante nga Relasyon
Ang mga Apostoles ug ang sobra sa 70,000 ka full-time nga mga misyonaryo sa Simbahan nakig-ambit sa usa ka sagrado, gani konektado, nga relasyon.
Ang pulong nga apostol nagagikan sa pulong nga Griyego nga nagpasabut og “aron ipadala,” mipasabut si Elder Dale G. Renlund. Ikonsiderar ang importanting sugo sa Manluluwas ngadto sa Iyang mga Apostoles sa karaang panahon: “Panglakaw kamo sa tibuok kalibutan, ug iwali ninyo ang ebanghelyo ngadto sa tibuok nga kabuhatan. Ang motuo ug magpabautismo maluwas” (Marcos 16:15–16).
Sa pagsunod niana nga mando, ang Napulog Duha “matarung nga miapil” sa misyonaryo nga buhat ug sa paghatud sa mensahe sa ebanghelyo, miingon si Presidente Ballard.
Sama ni Pablo sa karaan, ang mga Apostoles karon mainampoong modelegar sa ilang mga katungdanan sa pagpaambit sa ebanghelyo ngadto sa uban. Ug, sa paagi nga sama sa mga apostol, ang mga misyonaryo gipadala ngadto sa tibuok kalibutan aron sa pagtudlo sa ebanghelyo ni Kristo. “Ang Napulog Duha, nga naggamit sa mga yawe nga anaa kanila, mao ang nag-assign kanila ngadto sa mga misyon,” miingon si Elder Bednar. “Ug busa ipadala namo sila.”
Ang Ginoo nagpabilin nga maoy tiggiya nga direktor sa misyonaryo nga buhat. Gitugotan Niya ang Iyang buhi nga mga Apostoles, kinsa gitudlo sa lain-laing panahon sa pagserbisyo diha sa Missionary Executive Council, nga ipahibalo ang Iyang mga tinguha ngadto sa full-time nga mga misyonaryo nga nagtrabaho sa natad sa misyon. Ang ingon nga administratiba nga mga katungdanan sobra pa kay sa yano lang nga “pagpadagan sa organisasyon,” miingon si Elder Bednar. Ang mga Apostoles naghupot sa mga yawe sa pagkapari alang sa pagpundok sa Israel. “Naghatag kami og espirituhanong giya ug direksyon aron ang buhat mapahigayon sa paagi nga gusto sa Ginoo,” miingon siya.
Si Elder Dieter F. Uchtdorf maoy nangulo sa Missionary Executive Council sa Simbahan. Nahimutang ibabaw sa iyang lamesa sa opisina mao ang usa ka gamayng kinulit nga bronse sa managkaubang misyonaryo nga kusganong nagsikad sa mga bisikleta, tingali nagdali ngadto sa usa ka sabut sa pagtudlo. Matag higayon nga tutukan niya kana nga bronse nga kinulit, mapahinumduman siya sa dili maputol nga koneksyon tali sa mga Apostoles ug mga misyonaryo. “Ang matag usa sa 70,000 ka mga misyonaryo nagpahigayon og sagrado nga pagserbisyo ug gitawag sa Ginoo pinaagi sa usa ka sulat gikan sa propeta sa Dios aron mahimong mga representante sa Manluluwas. Sila ang gituyhad nga kamot sa Napulog Duha.”
“Bisan kanus-a nga kami adunay panahon, makigkita kami kanila,” miingon si Presidente Ballard. “Tugutan namo sila nga mangutana. Maningkamot kami sa pagtabang kanila sa pagpangita, pagtudlo, pagbunyag, ug paglig-on sa mga anak sa atong Langitnong Amahan.”
Magkatambayayong, ang duha ka grupo gipadala aron mopaambit sa maayong balita sa ebanghelyo ngadto sa tibuok kalibutan. “Among gitan-aw ang full-time nga mga misyonaryo isip among mga kompanyon,” miingon si Elder D. Todd Christofferson.
Mga sayop nga pagsabut
Samtang ang pipila ka taga-gawas nga mga tig-obserbar tingali maghunahuna nga ang Simbahan gidumala sama sa usa ka korporasyon, ang pagka-apostol “dili sama sa usa ka ehekutibo sa negosyo; lahi ra kaayo kini,” miingon si Elder Gary E. Stevenson. “Ang tahas sa usa ka Apostol ni Ginoong Jesukristo sa tinud-anay usa ka tigpangalagad, tigbantay nga tahas.” Ang tahas nga mahimong saksi ni Jesukristo ngadto sa kalibutan “nagtudlo ug naghulagway kanamo.”
Si Elder Neil L. Andersen miingon nga diha sa Korum sa Napulog Duha ka mga Apostoles, walay panagbangi, pagpangabig, o mga sentro sa gahum. Adunay “panaglahi sa mga opinyon”, apan “walay pagpalabaw sa kaugalingon.”
Ang Ginoo mihiusa sa daghang mga tawo gikan sa lain-laing propesyon ug kasinatian, miingon si Elder Andersen. Apan “managsama sila sa ilang pagpamatuod sa Manluluwas ug sa ilang pagkamapainubsanon. Wala sila magtinguha og posisyon; wala sila maningkamot nga mahimong pinakautokan nga tawo diha sa kwarto. Ang Ginoo makatrabaho uban niana. Wala pa ako makakita og bisan kinsa [diha sa Napulog Duha] nga mipakita og kasuko, ug wala pa ako makakita ni bisan kinsa nga miinsulto og laing tawo.”
Ang pagkamapainubsanon naghulagway sa pagka-apostol, miingon si Elder Uchtdorf. Ang ilang mga tawag nakahimo kanila nga mailhan hapit bisan asa nga mobiyahe sila, “apan nasayud kami nga dili kini mahitungod kanamo—mahitungod kini Kaniya. Nagrepresentar kami Kaniya. … Mahitungod kini sa Iyang kahalangdon.”
Si Elder Cook sa Argentina
Si Elder Christofferson sa Mexico
Si Elder Andersen sa Brazil
Si Elder Rasband sa India
Kitang Tanan Gitawag sa Pagserbisyo
Human sa kamatayon ug Pagkabanhaw sa Manluluwas, Siya mitudlo sa Iyang mga disipulo sulod sa 40 ka adlaw ug dayon misaka ngadto sa langit. Tungod sa bakante diha sa Korum sa Napulog Duha ka mga Apostoles—nga namugna sa pagbudhi ug pagkamatay ni Judas Iscariote—ang mga sakop sa korum nagpundok ug nangamuyo sa Ginoo.
Duha ka lalaki, si Matias ug Barsabas, ang giila, ug ang mga Apostoles nag-ampo nga ang Ginoo mopakita “kinsa niini ang imong gipili, … ug si Matias ang nahitungnan; ug siya naihap nga kauban sa napulog-usa ka mga apostoles” (tan-awa sa Mga Buhat 1:23–26).
Kaniadto ug karon, “ang pagkatawag isip usa ka Apostol dili usa ka katumanan o kalampusan,” mipasabut si Elder Renlund. “Dili kini usa ka tawag nga takus nga naangkon. Si Matias, diha sa Mga Buhat kapitulo 1, gipili sa Dios imbis ni Barsabas. Ang Dios wala magsulti kanato kon ngano. Apan ang kinahanglan natong mahibaloan mao nga ang pagpamatuod ni Barsabas nga nagpasidungog sa Manluluwas ug sa Iyang Pagkabanhaw katumbas sa kang Matias.”
Ang Dios mipili, siya mipasabut. “Kon natuman ni Barsabas ang bisan unsang tawag [calling] nga gihatag kaniya, ang iyang ganti dili lahi sa madawat ni Matias, kon gipalambo niya ang iyang tawag.”
Sama nga ang pagpamatuod ni Barsabas katumbas sa pagpamatuod ni Matias, ang matag miyembro sa Simbahan adunay katungod ug makahimo “sa pagpalambo og relasyon nga sama sa apostol ngadto sa Ginoo,” miingon si Presidente Ballard.
Ang pagserbisyo sa Ginoo ug sa Simbahan maoy “usa ka pribelihiyo ug usa ka panalangin. Usa kini ka dungog,” miingon si Elder Uchtdorf. “Ang Ginoo mipakita sa Iyang gugma alang kanato, ug atong mapakita ang atong gugma sa Ginoo pinaagi sa pagbuhat sa bisan unsa nga Iyang gisugo nga atong buhaton.”
Usa ka Sagradong Kasinatian
Ang pagkahimong kabahin sa usa ka tigpanaw nga halangdon nga konseho usa ka sagradong kasinatian, miingon si Elder Andersen. “Kon mopamatuod kami, kana nga pagpamatuod mosulod sa kasingkasing sa mga tawo, sa usa ka bahin, tungod sa among ordinasyon.”
Si Elder Christofferson miingon nga sa sayong bahin sa iyang apostolikanhon nga pagpangalagad, mibati siya nga nabug-atan sa gihunahuna nga mga ekspektasyon. Apan dayon nakadawat siya og yano nga mensahe gikan sa Ginoo: “Kalimti ang imong kaugalingon ug ang unsay hunahuna sa mga tawo kanimo, kon nakadayeg ba sila o nasagmuyo o bisan unsa pa man. Tutuki lang ang unsay Akong gusto nga ihatag kanila pinaagi kanimo. Tutuki ang unsay Akong gusto nga ilang madungog pinaagi kanimo.”
Pipila ka tuig ang milabay, si Elder Christofferson mibisita sa Mérida, Venezuela, diin ang usa ka gamayng batang lalaki, tingali 7 anyos, nakakita kaniya diha sa bintana ug misugod sa pagsinggit, “El Apostol, el Apostol!” (“Ang Apostol, ang Apostol!”).
“Yano lang kaayo kadto nga panghitabo, apan nagpakita kini kanako sa kadako sa pagtamud nga anaa bisan sa mga bata alang sa balaanong tawag,” miingon siya. “Dili kini mahitungod sa tawo kinsa naghupot sa balaanong tawag. Kana nga bata nakakat-on niana nga matang sa pagtamud alang sa balaanong tawag ug kon unsa ang girepresentaran niini.”
Si Elder Rasband sa India; Elder Stevenson sa Hong Kong; Elder Renlund sa Brazil; Elder Gong sa Shanghai, China; Elder Soares sa Brigham Young University
Mga litrato pinaagi ni Wendy Gibbs Keeler (India), Clebher Tex (Brazil), Monica Georgina Alvarado Zarate (Shanghai), Janae Bingham (BYU)