Pagsuporta sa Mibalik na nga mga Misyonaryo Nga Nauli og Sayo

Ni Kevin Theriot, PhD

LDS Family Services

Mga tip sa pagpauswag og pagpaayo sa mga misyonaryo nga nauli og sayo kay sa giplano.

Usa sa labing makapaikag nga mga istorya gikan sa Basahon ni Mormon mao ang 200 ka mga kasundalohan ni Helaman nga nasamdam sa gubat (tan-awa sa Alma 57:25). Dili nako mapugngan nga adunay pagkapareha tali niadtong 200 ka mga manggugubat ug sa karon nga mga misyonaryo kinsa, tungod sa nagkalahi nga rason, mipauli og sayo kay sa giplano.

Bisan tuod mibiya sa ilang panimalay ang 200 nga may maisugong katuyoan, nadiskobrehan nila nga naapeke sila sa panggubatan. Tingali nakita nila ang ilang kaugalingon nga maisugon, naninguha gayud og maayo, apan tingali nakasinati sila og pagduhaduha ingon man usab nakapangutana nganong wala sila mapanalipdi.

Sama sa mga manggugubat ni Helaman, ang mga misyonaryo nga mipauli nga dili pa panahon gikan sa ilang mga misyon kasagaran mibaliwala sa kamatuoran nga sila miboluntaryo ug miadto sa “gubat,” bayanihong mihatag sa tanan nilang mahimo. Nangandam sila alang sa ilang mga misyon ug napuno sa dakong pagtuo ug tinguha nga moserbisyo sa Ginoo. Dihang “nahagsa” sila (nakasinati, sama pananglit, problema sa kahimsog sa pisikal o mental o bisan kalapasan), kasagaran motutok sila sa unsay wala nila mahimo ug mobati og kadismaya, kaulaw, o kawala sa paglaum. Tingali magduda sila sa inspirasyon nganong nasegrbisyo pa sila. Kining miuli nga mga misyonaryo posibling mabalaka kon unsa unyay tan-aw sa ubang tawo kanila o gani kon unsay tan-aw sa Ginoo kanila. Bation nila nga daw pakyas sila o dili madawat ug negatibong mohukom sa ilang kaugalingon.

Ang mga misyonaryo nga nauli og sayo kay sa gilauman nagkinahanglan sa hiniusang paningkamot sa pamilya, mga higala, mga lider, ug mga miyembro sa ward aron matabangan sila nga “mamaayo.” Aniay pipila ka mga tip alang sa nauli nga mga misyonaryo ug sa mga sakop sa ilang pamilya, mga lider sa Simbahan, mga higala, ug mga miyembro sa ward.

Alang sa mga Hinigugma: 6 ka Butang nga Imong Mahimo aron Pagtabang nga Mamaayo ang Miuli nga mga Misyonaryo

Motabang uban sa gugma sa paghupay, pasalig, ug pag-atiman sa matag miuli nga misyonaryo ug sa iyang pamilya sama sa imong buhaton sa nasamdan nga manggugubat. Pasalamati sila sa serbisyo nga ilang nabuhat, awhagon sila sa pagtutok sa unsay ilang nabuhat, dili sa unsay wala nila nabuhat.
Isipon sila nga usa ka “miuli na nga misyonaryo” ug dili “sayo nga miuli” o “na-release og sayo nga misyonaryo.” Ang sensitibo nga mga pulong makatabang uban sa gikinahanglan nga pagpaayo ug pag-usab.
Paminawa sila aron sa pag-ila unsaon nga mas makatabang ka og maayo.
Suportahi ang ilang mga ginikanan. Kana siguro maoy usa sa labing importante nga mga butang sa pag-impluwensya sa proseso sa pagpaayo sa misyonaryo. Pagmatngon nga dili mapasagdan ang emosyonal nga panginahanglan sa ginikanan sa nauli nga misyonaryo.
Pangayo og propesyonal nga tambag kon gikinahanglan. Ang mga propesyonal sa kahimsog sa panghunahuna mahimong makatabang sa miuli nga mga misyonaryo nga makapahiangay og balik sa panimalay ug sa ilang naandan nga kinabuhi. Kon anaa, ang LDS Family Services makadalit og hangtud unom ka libre nga mga sesyon sa pagpanambag kon hangyoon alang sa miuli og sayo nga mga misyonaryo.
Pagtinguha og espirituhanong direksyon. Ayaw ipakaubos ang gahum sa pag-ampo. Pag-ampo alang sa giya kon sa unsang paagi nga mas makatabang ka nila ug pagtuman sa ilang mga panginahanglan.

Alang sa Nauli nga mga Misyonaryo: 5 ka Kamatuoran nga Hinumduman samtang Magpaayo Ka

Ang Dios nahigugma kaninyo. Kitang tanan makasinati og kalisdanan sa lain laing panahon sa atong kinabuhi. Hugot nga pagtuo kang Jesukristo wala nagpasabut nga kita dili mabantang sa kaaway—usa kini ka baruganan nga makatabang kanimo lahus niini. Tungod sa Iyang maulaong sakripisyo, si Kristo adunay gahum dili lamang sa paglimpyo kanato sa atong sala apan usab sa paghatag og kahupayan, pagsabut, pagkaayo, ug abag. (Tan-awa sa Elder Jeffrey R. Holland nga pakigpulong sa kinatibuk-ang komperensya, “Sama sa usa ka Sudlanan nga Nabuak.”)
Ang mga kasulatan nagsulti sa pagkaayo. Ang Dios mamulong pinaagi sa Espiritu Santo, ma-access pinaagi, taliwala sa ubang mga butang, ang sinsero nga pagtuon ug paggamit sa mga kasulatan. Basaha ang kabahin sa mga manggugubat ni Helaman, ug uban nga nasamdan sa ilang mga kasinatian sa kinabuhi, aron molambo ang pagsabut. Pangita og ubang mga ehemplo kon sa unsang paagi ang Langitnong Amahan nangalagad ug mitabang sa pag-ayo niadtong nagtinguha sa pagsunod Kaniya kaniadto.
Ang pagserbisyo makatabang kanimo sa pagpaayo. Ang Dios gusto nga ikaw mahimong “matinguhaon nga moapil” sa maayong mga katuyoan (tan-awa sa Doktrina ug mga Pakigsaad 58:27) tungod kay mao kana ang motabang kanimo sa pagkaayo. Tutok sa uban ug pag-ampo alang sa mga kahigayunan sa pagserbisyo sa uban.
Ang pag-ampo makapadako sa imong panabut. Pasalamat sa Langitnong Amahan. Gusto Siyang motabang kanimo nga mamaayo. Hangyoa Siya sa paglig-on kanimo ug pag-ila sa mga butang nga Iya nang gibuhat sa pagpanalangin ug pag-ayo kanimo ug usab alang sa paglig-on sa pagpangita unsaon pagpanalangin sa uban.
Ang uban dili tingali makasabut. Dili ang tanan makasabut sa imong sitwasyon, ug tingali mosulti sila og mga butang tungod kay wala sila makasabut. Apan ayaw kini tugoti nga makapawala sa imong kadasig! Tutok sa pagpasalamat alang niadtong naglig-on kanimo, ug pag-ampo og panabang sa pagpasaylo sa uban kon wala sila makasabut sa hingpit sa imong sitwasyon.