Kini Iyang Simbahan

Ni Elder Taniela B. Wakolo

Sa Seventy

“Kamo kinahanglan modala nganha kaninyo sa ngalan ni Kristo, diin mao ang akong ngalan” (3 Nephi 27:5).

Natawo ko sa Fiji. Ang akong mga ginikanan dili mga miyembro sa Simbahan, apan nagsimba sila sa laing simbahan.

Sa pagdako nako, akong giminyoan ang akong asawa, si Anita. Usa siya ka miyembro sa Ang Simbahan ni Jesukristo sa mga Santos sa Ulahing mga Adlaw. Permi niyang dapiton ang mga misyonaryo aron makigkita kanako.

Usa ka adlaw giingnan nako sila nga mahimo silang mobisita alang sa panihapon sulod sa mosunod nga tulo ka gabii. Miingon ko nga kinahanglang ang Biblia lamang ang ilang gamiton sa pagtubag sa akong mga pangutana. Sakto gayud ang ilang mga tubag. Sa ikatulo nga gabii, nangutana sila kanako.

“Kon ikaw adunay tindahan alang sa mga grocery, unsay imong ipangalan niini?”

“Ako kining tawagon og Wakolo Family Grocery Store tungod kay ako kining tindahan,” mitubag ko.

“Kang kinsa ipangalan ang usa ka simbahan?” nangutana sila.

Nindot kadto nga pangutana. Ug nasayud ko sa tubag sa tibuok nakong kasingkasing ug kalag. Ang tinuod nga Simbahan ipangalan kang Jesus tungod kay kini Iyang Simbahan. Ug Ang Simbahan ni Jesukristo sa mga Santos sa Ulahing mga Adlaw gipangalan Kaniya!

Aduna pa akoy usa na lang ka dugang nga pangutana: “Kanus-a ko pwedeng mabunyagan?” Paglabay sa usa ka semana, nabunyagan ko.

Sa dihang nabunyagan ko, akong gidala ngari kanako ang ngalan ni Jesukristo. Nagpasabut kana nga nahimo akong miyembro sa Iyang Simbahan ug misaad nga mosunod Kaniya. Naningkamot ko sa akong labing maayo matag adlaw nga magpakabuhi sama sa Iyang gibuhat. Nasayud ko nga kini ang tinuod nga Simbahan ni Jesukristo.