Mga Hulagway sa Hugot nga Pagtuo
Iona Wikaira
Kaikohe, New Zealand
Si Iona ganahan sa dula nga waka ama—ang termino sa New Zealand alang sa pagbugsay og sakayan nga adunay katig. Ganahan si Iona nga maanaa sa tubig, layo sa mga kabug-aton sa trabaho.
Bisan og nag-atubang siya og mga hagit isip usa ka opisyal sa prisohan, si Iona nakakaplag og kalig-on ug nagpabilin nga kalma pinaagi sa pagtuo diha kang Jesukristo.
Christina Smith, tiglitrato
Nagtrabaho ko isip opisyal sa prisohan sulod sa pito ka tuig. Nagtrabaho ko sa prisohan sa mga babaye sulod sa usa ka tuig; dayon mibalhin ko ngadto sa puro lalaki nga prisohan diin nagtrabaho ko sa milabayng unom ka tuig.
Usa sa makatandog nga mga istorya gikan sa akong panahon isip opisyal sa prisohan mao ang sa dihang nakita nako ang usa ka inahan nga nakauban og balik ang iyang mga anak. Wala siya makakita sa iyang mga anak sulod sa upat o lima ka tuig. Inyong makita diha sa mga mata sa mga bata ang mga luha ug kasakit gumikan sa mga tuig nga nagkalagyo. Ang panag-uban pag-usab makatandog kaayo, apan isip usa ka opisyal sa prisohan, dili ka mopakita og emosyon. Lisud kaayo kadto para nako. Kinahanglang molingiw ko aron lang makontrolar ang akong mga emosyon. Isip usa usab ka inahan, dili nako mahunahuna nga mapalayo sa akong mga anak sulod sa daghang katuigan ug dili makakita kanila, makigsulti kanila, o mapaambit kon unsa akong gibati ngadto kanila.
Isip opisyal sa prisohan, kinahanglang lig-on ka. Kinahanglang makapanalipod ka sa imong kaugalingon ug makakontrolar. Usahay init kaayo ang sitwasyon, mao nga kinahanglang dili ka mapaling-paling kon makig-istorya sa uban. Ilabi na kon makig-istorya ka sa mga binilanggo ug iresolbar ang lisud ug usahay talandugon nga mga sitwasyon. Ang ubang mga tawo maghunahuna siguro nga isug, tig-a ko nga tawo, apan dili ako ingon niana kanunay.
Sa trabaho gibati nako nga daw gilibutan ko sa kalibutan, apan sa pagbiya nako sa trabaho ug anaa na ako sa panimalay o sa simbahan, lahi ang akong bation tungod sa espiritu nga akong gibati. Usa sa kalipay sa pagsunod sa ebanghelyo mao nga dili kinahanglan nga ikaw iya sa kalibutan. Anaa ka sa kalibutan, apan dili kinahanglan nga magauban ka sa tanan diha sa kalibutan.
Ganahan kaayo ko kon moabut na ang Dominggo tungod kay makahimo ko sa pagsimba ug sa pag-angkon og espirituhanong pagbusog ug mahinumdom sa atong Ginoo ug Manluluwas, si Jesukristo. Ganahan ko nga makaangkon niana alang sa akong kaugalingon. Malingaw ko nga magserbisyo sa Simbahan ug sa tanang butang nga anaa sa ebanghelyo sa pagtabang kanato.
Kaniadto, iya ako sa kalibutan, ug daghan ko og nakat-unan nga lisud nga mga leksyon. Mapasalamaton kaayo ko karon nga nahimong hingpit nga aktibo ug mapasaligon diha sa ebanghelyo ni Jesukristo. Kanunay akong maghandum nga unta ang tanang tawo sa akong trabaho makahimo sa pagbati sa kalipay nga akong nabati isip miyembro sa Simbahan.
Akong nakaplagan nga kon ang mga tawo sa inyong trabahoan mahibalo nga miyembro ka sa Simbahan, magbaton sila og pagtahud kanimo ug sa Simbahan kon ilang makita nga dili nimo usbon ang imong mga sumbanan tungod lang sa sitwasyon nga imong nahimutangan. Mao kana nganong importante kanako nga maningkamot nga mahimong maayong ehemplo isip usa ka Santos sa Ulahing mga Adlaw.
Sa matag sitwasyon, maghunahuna ko, “Sa unsang paagi gusto sa Manluluwas nga molihok ko?” o “Unsay gusto Niya nga akong buhaton niini?” Sa tanan nakong mga kasinatian, naningkamot ko nga masiguro nga ang akong mga lihok nagpakita sa unsay buhaton sa Manluluwas. Nakatabang kini kanako nga mahimong mas resonable ug mas kalma bisan diha sa tanang kasamok sa lisud nga trabahoan.
Mapasalamaton ko sa akong Manluluwas ug sa Langitnong Amahan alang sa mga hagit ug mga pagsulay nga nakahimo ko sa pagbuntog pinaagi sa pagbaton og hugot nga pagtuo diha Kanila. Matag higayon nga misinati ko og mga pagsulay ug nag-ampo ko, kanunay akong mibati og kalinaw sa akong kasingkasing. Nasayud ko nga dili ako mahimong mabuhi kon wala Sila. Kanunay nakong giila ang Ilang impluwensya diha sa tanan nakong gibuhat.