Ang Katapusang Pulong
Unsa ang Imong Makat-unan gikan sa Basahon ni Mormon?
Ni Elder Gary E. Stevenson
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2016 nga kinatibuk-ang komperensya.
Samtang mangita kamo og panahon ug hilum nga dapit aron sa pagbasa sa Basahon ni Mormon, akong makita nga kamo nagdiskubre og mga tubag, mobati og giya, ug nag-angkon og kaugalingon ninyong pagpamatuod sa Basahon ni Mormon ug usa ka pagpamatuod kabahin ni Jesukristo.
Samtang magbasa kamo, inyong matun-an ang mga tudling niining bililhon nga basahon ug masugatan ang inyong minahal nga Manluluwas, ang Ginoong Jesukristo, diha sa hapit matag pahina. Gibana-bana nga gigamit ang ubang porma sa Iyang ngalan sa kasagad nga kausa matag 1.7 nga mga bersikulo.1 Bisan si Kristo Mismo nagpamatuod sa katinuod niining ulahing mga adlaw, nag-ingon, “Samtang ang imong Ginoo ug ang imong Dios buhi kini tinuod” (Doktrina ug mga Pakigsaad 17:6).
Mapasalamaton ko sa pagdapit ug sa saad nga gitanyag sa Ginoo pinaagi ni propeta Moroni ngadto sa matag usa kaninyo—ug sa tanan nga mobasa sa Basahon ni Mormon: “Ug kon kamo makadawat niini nga mga butang [ang Basahon ni Mormon], ako moawhag kaninyo nga kamo mangutana sa Dios, ang Amahan sa Kahangturan, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahum sa Espiritu Santo” (Moroni 10:4; tan-awa usab sa mga bersikulo 3, 5).
Ang mga kamatuoran nga inyong makaplagan diha sa Basahon ni Mormon mobayaw ug modasig kaninyo. Kini molig-on sa inyong pagtuo, mopuno sa inyong kalag uban sa kahayag, ug moandam kaninyo alang sa umaabut diin halos kamo walay abilidad sa pagsabut.
Sulod sa mga pahina sa basahon, inyong makaplagan ang walay katapusang gugma ug dili matugkad nga grasya sa Dios. Samtang maningkamot kamo sa pagsunod sa mga pagtulun-an nga inyong makit-an diha, modako ang inyong kalipay, molambo ang inyong panabut, ug ang mga tubag nga inyong gipangita alang sa daghang mga hagit sa mortalidad maabli diha kaninyo. Samtang nagtan-aw kamo sa basahon, nagtan-aw kamo sa Ginoo.