Digital Lamang: Batan-ong mga Hamtong
Pagkakita og Hingpit nga Kalipay pinaagi ni Kristo Bisan sa Pagpauli og Sayo gikan sa Akong Misyon
Sa dihang mipauli ko og sayo gikan sa akong misyon, naghunahuna ko nga dili na gyud ko makatagamtam pag-usab og hingpit nga kalipay. Apan natagamtaman ko ra. Ug kamo usab.
Ang tagsulat nagpuyo sa Utah, USA.
Ang pagpangandam og misyon malisud. Bisan pa man, ang pagpauli gikan sa misyon ingon og sama ka lisud, ilabi na kon mopauli ka og sayo kay sa giplanohan. Mabalaka ka kon unsa kahay isulti sa uban o kon unsa kahay ilang buhaton nimo. Mag mahukmanon kaha sila? Mahigawad? Mabakikawan? Mabalaka ka nga mobati ka nga dili ka maayo o lig-on. Maghunahuna ka kon naa bay deperensya nimo o mihimo ka ba og sayop nga desisyon bisan sa pag-adto. Nabalaka ko bahin niining tanan.
Sa dihang midesidir ko nga moserbisyo og misyon, nadasig ko. Nasayud ko nga mao kadto ang gusto sa Ginoo nga ipabuhat kanako. Ang mosunod nga pipila ka bulan mao ang pipila sa pinakamalipayon sa akong kinabuhi, ug human nga nakaangkon og hilabihan kanindot nga kasinatian sa missionary training center, naghunahuna ko nga ang nahibilin sa akong misyon sa Argentina maanindot. Dili kini mao.
Nanlimbasog ko uban sa kahingawa, kahadlok, ug kawalay paglaum sa akong misyon—mga butang nga wala nako sukad masinati, dili ingon ka grabe ang kahimtang nga akong nasinati. Ang akong mission president naninguha og maayo sa pagtabang kanako. Sa katapusan, nakadesisyon ko nga mopauli. Kadto nga desisyon sayon nga nahimo niadtong panahona, apan sa pag-uli, kadtong tanang pangutana nagsugod na og pakita kanako.
Nakat-unan nako sa paglabay sa panahon, ang Manluluwas nagdala og makapaalim ug panglantaw kon matinuoron kang mangita niini. Hugtanon akong nagtuo nga adunay leksyon nga makat-unan sa tanang mga kasinatian sa kinabuhi, mamaayo man kini o dili. Ug sa panahon sa Ginoo, Siya mitudlo kanako og pipila ka bililhong mga leksyon nga akong giampingan.
Ang pag-adto og misyon mao ang eksakto nga butang alang kanako. Apan tungod sa mga kakulian, wala gyud ko kapabilin sulod sa 18 ka bulan. Adunay laing plano ang Dios alang kanako. Wala pa gyud ko masayud sa hingpit asa ang akong kinabuhi mopadulong, apan OK ra ko niana. Ang akong nahibaloan mao nga nagbuhat ko unsay Iyang gusto nga akong buhaton karon. Atol sa akong upat ka bulan sa Argentina, ang akong pagpamatuod ug pagkakabig napalawman. Nakahimamat ko og talagsaon nga mga tawo, ug tingali natandog nako ang mga kinabuhi nga buot Niya nga akong tandugon. Wala na ko magbasol sa akong kasinatian o naghandum nga malahi kini. Mao gayud kini ang akong gikinahanglan ug nahimong balaan ngari kanako.
Nakabasa ko bag-ohay lang og usa ka pakigpulong ni Elder Neal A. Maxwell (1926––2004) sa Korum sa Napulog Duha ka mga Apostoles nga mitabang kanako sa pagsabut sa akong kasinatian. Miingon siya:
“Ang kinabuhi . . . dili gayud mahimong puno sa pagtuo ug walay kahasol. . . .
“Busa, unsaon man nimo ug nako nga makapaabut sa pagpuyo niining kinabuhia sa yano, sama nga moingon, ‘Ginoo, hatagi ko og kasinatian, apan dili kaguol, dili kasubo, dili kasakit, dili pagsupak, dili pagbudhi, ug ilabi na dili talikdan. Ipalayo gikan kanako, Ginoo, tanan niadtong mga kasinatian nga nakapahimo Kanimo unsa Ikaw karon! Dayon paanhaa ako ug papuy-a uban Kanimo ug hingpit nga makigbahin sa Imong kalipay!’” (“Lest Ye Be Wearied and Faint in Your Minds,” Ensign, Mayo 1991, 88).
Ang Manluluwas wala mahimo kinsa Siya bisan sa mga pagsulay nga Iyang nasinati. Nahimo Siyang kinsa Siya tungod niadtong mga pagsulay. Nakatabang kadto sa paghulma sa Iyang hingpit nga kinaiya, ug mihatag kini Kaniya sa abilidad sa pagbati sa kalipay nga Iyang gibati karon. Gibati ko ang kahigayunan nga anaa nianang kasinatian nga namugna sa kinaiya. Dili kini ang akong gipangayo; ilabi na dili kini ang akong gusto; apan ang Dios nasayud sa akong potensyal, ug gusto Niya nga mopakigbahin ako sa Iyang kalipay. Kana nga kalipay usa ka butang nga dili nako matugkad kon dili usab makasinati og kagul-anan, kaguol, kasakit, ug oposisyon. Ang pagpauli og sayo usa sa labing lisud nga mga butang nga akong nasinati, apan uban sa panglantaw ug ang tabang sa Manluluwas, kini karon daw sama sa gamay nga bili nga pagabayran sa unsay akong naangkon.
Mao nga pagbaton og pagtuo. Salig sa imong Manluluwas. Ug magmalaumon! Ang kinabuhi dili gayud mao sa unsay imong giplanohan. Dili kini nga walay kasakit o kahasol. Apan ang hingpit nga kalipay nagpaabut human sa malisud nga panahon. Ang hingpit nga kalipay mao gayud ang Iyang gusto alang kanimo.