Magtuon, Magbasa, Magribyu, Mag-ampo. Balika.
Ang tagsulat nagpuyo sa Cautín Province, Chile.
Kon walay scholarship, dili ko makasarang sa kolehiyo.
Mga paghulagway pinaagi ni Adam Howling
Sa Chile, aron makaeskwela sa kolehiyo, kinahanglan ka nga mokuha sa university placement nga eksamin. Gusto nako nga magtuon og engineering sa usa ka unibersidad nga layo sa akong gipuy-an. Mahal gayud kaayo kini, busa ang akong tumong mao ang makakuha sa labing taas nga score nga mahimo diha sa placement nga eksamin aron makaangkon ko og scholarship alang sa tag-as og mga score sa eksamin.
Nasayud ako kon asa ug unsa ang gusto nakong tun-an, ug nasayud ko unsa ang kinahanglan nakong buhaton aron mahitabo kini. Misugod ko sa pagpangandam alang sa eksamin. Nagtuon, nagbasa, ug nagribyu ko sa materyal, apan sa mga praktis nga eksamin, wala ko kakuha sa score nga akong gikinahanglan. Midangup ko sa akong Langitnong Amahan diha sa pag-ampo ug mihangyo Kaniya og mas dakong kaalam ug sa pagdan-ag sa akong panabut aron akong makab-ot ang akong tumong. Nag-ampo ko alang niini sa matag adlaw sulod sa usa ka tuig. Miadto ko sa mga klase sa espesyal nga pagpangandam diha sa akong eskwelahan, ug mi-enroll ko sa mga klase sa usa ka institusyon nga gidesinyo aron mangandam alang sa eksamin.
Gipadayon nako ang akong inadlaw-adlaw nga pagtuon sa kasulatan, ug wala gayud ako makapalta og usa ka adlaw sa seminary. Gituman nako ang tanan nakong mga buluhaton sa Aaronic nga Pagkapari ug wala gayud magtuon sa mga Dominggo, bisan unsa pa ka desperado sa sitwasyon. Nasayud ko nga ang Dominggo mao ang adlaw sa Ginoo, ug gusto nako nga motahud niini sa paagi nga gitudlo sa akong mga ginikanan kanako. Nasayud ko nga dili nako marisgo nga mahikawan sa mga panalangin sa Langitnong Amahan alang kanako, ilabi na nga gikinahanglan kaayo nako kini. Bisan pa niining tanan, wala ako makakuha sa score nga akong gikinahanglan sa akong mga praktis nga eksamin.
Ang akong pamilya ug ako nag-ampo ug nagpuasa, ug ang akong papa mihatag nako og panalangin. Uban niining espirituhanon nga pagpangandam ug sa lain nakong pagpangandam, mikuha ko sa eksamin. Wala lamang nako makuha ang score nga akong gikinahanglan, apan nalabwan pa ang akong tumong, nakakuha sa usa sa labing taas nga porsyento nga posible diha sa seksyon sa math. Nadawat nako ang mga scholarship ug mga benepisyo nga akong gikinahanglan, ug nakahimo ko sa pag-eskwela sa unibersidad nga akong gipili.
Sukad sa batan-on pa ko, akong nakat-unan nga kon akong buhaton ang tanan nga akong mahimo ug atimanon og una ang akong espirituhanon nga mga responsibilidad, niana ang Langitnong Amahan mopanalangin kanako. Ang mga butang dili kanunay mahitabo sa paagi nga atong gilauman, apan ang Dios moatiman kanato. Nasayud ko nga pinaagi lamang sa Iyang tabang nga ang tanang butang posible.