Ang Akong Labing Maayo nga Adlaw sa Trabaho Sukad!

Ni Elder Joni L. Koch

Sa Seventy

Kon makakat-on ka sa paghigugma ug paghatag og bili sa trabaho, makakaplag ka usab og dakong tinubdan sa kalipay.

Pipila ka tuig ang milabay, didto ako sa usa ka auditorium sa Churchill College sa University of Cambridge England alang sa tinuig nga miting para sa kompaniya nga akong gitrabahoan. Niana nga okasyon, pribilehiyo nako nga modawat gikan sa tibuok kalibutan nga presidente ug CEO sa kompaniya sa usa ka ganti alang sa akong team tungod sa maayong trabaho nga among nahimo nianang tuiga.

Samtang ang mga lider sa kompaniya nga gikan sa tibuok kalibutan, nagrepresentar sa 80,000 ka mga empleyado, mipakpak sa ilang mga kamot ug midayeg sa among team tungod sa among nakab-ut, naghunahuna ko, “Mao na siguro kini ang akong labing maayo nga adlaw sa trabaho sukad!” Ang pagbati niana nga higayon makapadasig.

Giambitan nga Tinapay

Apan nakahinumdom dayon ko sa akong unang adlaw sa trabaho hapit 40 ka tuig na ang milabay. Ang akong amahan nanag-iya og usa ka panaderia [bakery] ug miluto og tinapay nga giapud-apod sa daghang gagmay nga mga merkado sa among siyudad sa habagatang Brazil. Sa dihang bata pa ko, kanunay ko nga mamugos sa akong amahan nga pakuyogon ko niya sa trabaho. Usa ka adlaw misugot na siya sa katapusan!

Ang akong inahan mitahi og gamay nga puting apron ug kalo sa tigluto og tinapay alang kanako, ug ang akong papa ug ako miadto sa panaderia. Magkauban, misagol ug miandam kami sa minasa nga harina, gikinamot paghulma og mga tinapay ang minasa, ug mibutang sa tinapay sa tisa nga hudno. Sa dihang naluto na ang tinapay, migamit kami og taas nga paleta nga kahoy aron mainampingong makuha ang tinapay. Mihulat kami og pipila ka segundo, dayon giambitan namo ang usa ka pirasong tinapay nga init-init pa. Lami kaayo kadto!

Human mahinumdom niini, nakahukom ko nga ang pagdawat og ganti sa Cambridge mao ang akong ikaduhang labing maayo nga adlaw sa trabaho. Ang labing maayo ug labing malipayon nga adlaw sa trabaho nahitabo sa mas ubos nga sitwasyon: sa gamay nga panaderia nga walay nanan-aw o mainitong pagpamalakpak. Ako lamang ug ang akong papa. Nianang adlawa, gitudloan ko niya sa paghigugma ug paghatag og bili sa trabaho ug mitabang kanako nga mobati og kalipay sa paghimo og usa ka butang gikan sa hilaw nga mga materyales pinaagi sa akong kaugalingong mga paningkamot. Akong nakat-unan nga ang pagtrabaho og maayo makatagbaw sa lawas ug kalag.

Ang Trabaho Usa ka Panalangin

Sa dihang ang Ginoo misulti kang Adan ug Eva, “Sa singot sa imong nawong magakaon ikaw sa tinapay” (Genesis 3:19), mora og nagpanton Siya kanila. Sa pagkatinuod, mihatag Siya kanila og oportunidad nga masinati ang makalipay ug makatagbaw nga pagbati nga mahimong mapaningkamoton sa kaugalingon, sa pagsangkap sa ilang kaugalingong mga gusto ug mga panginahanglan.

Daghan kanato ang motan-aw lamang sa trabaho isip usa ka paagi nga makasangkap sa temporal nga panginahanglan sa atong kaugalingon ug sa atong mga pamilya o tingali isip usa ka paagi nga makaangkon og sosyal nga kahimtang pinaagi sa espesyal nga titulo sa trabaho. Apan ang labi pang importante, gusto sa Dios motrabaho kita aron makaangkon kita og lig-ong pagbati sa katagbawan samtang mokompleto kita og mga buluhaton, momugna og bag-ong butang, mousab ug mopalambo sa unsay anaa na, ug modugang og bili sa kalibutan nga atong gipuy-an.

Maghisgot sa espirituhanong paagi, ang kinabuhi nga nakasentro sa ebanghelyo kanunay nga maglakip og trabaho. Si Elder D. Todd Christofferson sa Korum sa Napulog Duha ka mga Apostoles miingon, “Ang gipahinungod nga kinabuhi puno sa buhat, usahay pabalik-balik, usahay mapaubsanon, usahay wala mahatagi og bili apan kanunayng nagbuhat niadtong makapalambo, makapatunhay, makapabayaw, makapangalagad, makapadasig.”¹

Sa bata pa, tingali gipangutana ka, “Unsa ang gusto nimong mahimo inig dako nimo?” Panahon sa katuigan sa pagkatin-edyer, kana nga pangutana tingali nausab ngadto sa, “Unsa ang imong kuhaon sa kolehiyo?”

Kasibut, Dungog, ug Katuyoan

Bisan unsa pa nga propesyon ang imong pilion, bisan unsa pa nga matang sa trabaho ang imong maangkon, tinguhaa ang pagbuhat sa imong trabaho uban ang kasibut, dungog, ug katuyoan. Kinahanglang motrabaho ka og maayo ug kanunay nga maningkamot sa pagkab-ut sa labing maayo nga mga resulta. Ang pagbaton niini nga kinaiya ngadto sa trabaho makatabang nimo nga mahimong lig-on sa temporal, emosyonal, ug espiritwal nga paagi. Ang oportunidad nga makatrabaho usa ka panalangin gikan sa Ginoo. Samtang makat-on ka sa pagpasalamat ug paghigugma sa trabaho, imong makaplagan ang kalipay ug katuyoan nga moabut gikan sa pagpaningkamot sa kaugalingon.

Makadungog gihapon ko sa mga palakpak ug mga pulong sa pagdasig nga gikan niana nga mga nanambong sa University of Cambridge, apan mas bililhon kanako ang panumduman sa akong adlaw sa panaderia uban sa akong amahan ug sa kahumot sa mga piraso sa tinapay sa ilang paggawas sa hudno.