BATAN – ONG MGA HAMTONG
Kon Mahuman og Sayo ang Imong Misyon, Ayaw Kawala og Paglaum
Ang tagsulat nagpuyo sa Utah, USA.
Wala makuhai ang imong bili tungod sa pagpauli og sayo gikan sa imong misyon.
Paghulagway pinaagi ni David Green
Kon nagbasa ka niini, tingali nakahibalo na ka kon unsa ka lisud ang pagpauli og sayo gikan sa misyon. Ang batan-ong mga hamtong kinsa moserbisyo tingali mosinati og pisikal nga pagkaangol, problema sa panghunahuna, sibil nga mga emerhensya, mga problema sa katakus, seryuso nga panagbangi sa uban, o pagsupak sa mga patakaran sa misyon, nga maoy hinungdan nga mobiya sila sa ilang misyon sa dili pa ang ilang gilaumang petsa sa pagpauli.
Bisan unsa pa ang mga rason, dili gusto sa Dios nga kining lisud nga kasinatian permanenting makaapekto sa espirituhanong paglambo sa bisan kinsa sa Iyang mga anak. Busa unsaon man sa sayo nga nauli nga mga misyonaryo nga malampusong makauswag gikan sa ingon ka lisud nga kausaban? Ug sa unsang paagi makatabang ang mga ginikanan, mga lider sa Simbahan, ug mga minahal?
Misyonaryo sa Basahon ni Mormon
Usa ka istorya gikan sa basahon ni Alma naghatag kanato og makatabang nga ehemplo. Ang Nephite nga propeta nga si Alma nangulo og misyon ngadto sa dautan nga mga Zoramite, giubanan sa pipila ka sinaligan nga mga indibidwal. Usa niini nga mga indibidwal, ang iyang anak nga si Corianton, “mibiya sa pagpangalagad, ug miadto sa yuta sa Siron taliwala sa mga utlanan sa mga Lamanite, pagsunod sa babaye nga nagbaligya sa iyang dungog nga si Isabel” (Alma 39:3). Isip resulta, kusganong gibadlong ni Alma si Corianton ug misugo kaniya sa paghinulsol, mipasabut, “Ako dili mopadayon paghisgot sa imong mga sala, aron sa paghasol sa imong kalag, kon kini dili alang sa imong kaayohan” (Alma 39:7).
Mapainubsanong gidawat ni Corianton ang pagbadlong sa iyang amahan, naghinulsol sa iyang mga sala, ug mibalik sa pagserbisyo isip misyonaryo taliwala sa mga Zoramite aron “ipadayag ang pulong uban ang kamatuoran ug kaligdong” (Alma 42:31). Ang rekord mipadayon sa pagpahayag nga human si Alma namulong sa iyang mga anak nga lalaki, “ang mga anak nga lalaki ni Alma [si Shiblon ug si Corianton] miadto taliwala sa mga katawhan, aron sa pagpahayag sa pulong ngadto kanila” (Alma 43:1).
Pagpauli nga may Potensyal
Unsay atong nakat-unan gikan niini nga istorya? Una, ang usa ka misyonaryo nga mopauli og sayo—bisan sa kapugngan nga mga rason—makahimo gihapon sa pagkab-ut og mahinungdanong mga butang. Nakahimo og seryusong mga sayop si Corianton, apan nakahimo gihapon siya og mahinungdanon nga buhat. Sa samang paagi, bisan ang mga misyonaryo nga mipauli og sayo isip resulta sa ilang kaugalingong binuhatan dili angay mobati nga daw naguba na nila ang ilang espirituhanong potensyal. Si Corianton nakakat-on gikan sa iyang mga sayop ug nakahimo sa pagpalig-on sa gingharian sa Dios sa talagsaong mga paagi, ug kana nga samang kapabilidad anaa sa tanan bisan gibati pa nila og maayo nga napakyas sila.
Ikaduha, atong nakat-unan ang importanting tahas sa uban nga maulian sa espirituhanong paagi ang sayong nauli nga misyonaryo. Si Alma—ang amahan ni Corianton ug lider sa pagkapari—mitambag ni Corianton uban sa hait nga mga pulong apan uban usab sa pagsalig sa iyang abilidad nga makab-ut gihapon ang iyang espirituhanong potensyal. Sama kang Corianton, ang mga sangputanan sa pagkamasinupakon diha sa misyon moabut gayud, apan ang bisan unsang pagdisiplina kinahanglan pagaubanan sa gugma, kapasayloan, ug kalooy (tan-awa sa Doktrina ug mga Pakigsaad 121:41–44).
Pagpauli aron Magpaayo
Kining sama nga mensahe sa paglaum alang sa sayo nga nauli nga mga misyonaryo gibalik-balik karon. Si Marshall, kinsa miuli og sayo tungod sa mga hagit sa pisikal ug mental nga kahimsog, usahay mibati og pagmahay tungod sa mga problemang panglawas ug sa personal nga mga kakulangan nga nakapugong kaniya sa pagkahimong hingpit nga nagserbisyong misyonaryo. Bisan pa man, gibati niya nga ang iyang pagserbisyo hingpit nga bililhon.
“Isip mga misyonaryo, kami dili perpekto,” miingon si Marshall. “Makasinati gihapon kami og tintasyon; makasala gihapon kami. Apan ang imong mga kasaypanan mao tingali ang gusto ni Satanas nga imong tutukan—nga mobati nga ang imong gihalad dili dawaton sa Ginoo tungod niadtong mga panahon nga dili ikaw ang labing maayo nga misyonaryo. ”
Si Marshall nagtuo nga gusto sa Ginoo nga mahibalo ang mga misyonaryo nga nahimuot Siya sa serbisyo nga ilang gihatag, bisan kon kana nga pagserbisyo dili maayong pagkahatag tungod sa pagpili o kahimtang.
Nakakat-on si Marshall sa epektibong pag-atubang niini nga kasinatian ug sa pagpaayo pinaagi sa pagbuhat sa tanan niyang mahimo aron magpabiling duol sa Langitnong Amahan ug ni Jesukristo.
Pagpauli aron Maghinulsol
Ang laing misyonaryo, kinsa miserbisyo sa Colorado, USA, gipapauli gikan sa iyang misyon aron madisiplina ug gipahimulag [excommunicated] gikan sa Simbahan, apan sa kadugayan nabunyagan pag-usab. “Ang pagpauli lisud kaayo,” miingon siya. Mibati ko nga walay tumong ug walay bili. Usahay, ang labing lisud nga bahin sa pagpauli mao ang [pagpangita] sa kadasig nga mopadayon sa pagsimba, pagbasa sa mga kasulatan, ug pag-ampo. Ang yanong mga butang mao ang pinakalisud.”
Apan nakakaplag siya og kalig-on sa suporta sa mga higala ug pamilya ug sa pagpaningkamot nga maghinulsol.
“Ang paghimo og mga tumong, pakigkita sa akong bishop, ug pag-adto sa templo sa dihang takus na ako maoy nakatabang pag-ayo kanako nga mas mapaduol sa akong Langitnong Amahan,” midugang siya. “Makahinumdom ko sa mga panahon nga dili ako makahimo sa pakigkita sa bishop o sa pagkab-ut sa pipila sa mga tumong; kanunay nga anaa ang kaaway, nagtintal kanako.”
Ang iyang pagkaulian nahimong posible pinaagi sa “kanunay nga paghinumdom nga aduna akoy Langitnong Amahan kinsa nagmahal kanako ug gusto nga magmalipayon ko. Tungod kay nagbaton og pagpamatuod sa Pag-ula sa Manluluwas ug sa paghinulsol, makapaduol kita kanunay sa Dios bisan unsa pa ka layo ang gibati nato sa atong kaugalingon.”
“Kon maghunahuna ko sa akong misyon,” mipadayon siya, nagpasabut sa mga bulan nga nagserbisyo siya sa wala pa ang mga panghitabo nga misangput sa pagpapauli kaniya, “gibati gihapon nako nga usa kadto sa labing maayo nga mga kasinatian nga akong naangkon sukad. Daghan ko og nakat-unan, ug bisan kon wala kini mahitabo sa paagi nga akong giplano, nakahimo gihapon ko sa pagkakita sa mga kinabuhi nga nausab tungod sa ebanghelyo. Nakahimo ko og pipila ka mga sayop, apan milambo pag-ayo ang akong pagpamatuod samtang naningkamot ko sa paghinulsol ug sa pagpadayon sa paglambo sa espirituhanong paagi.”
Gusto niyang masayud ang uban nga mipauli og sayo tungod sa ilang mga pagpili nga “wala matapos ang kalibutan. Ang pagpauli mao ang usa ka unang lakang sa paghinulsol. Sa higayon nga moagi kamo niini nga proseso sa paghinulsol, makabenepisyo kamo og maayo. Kanang bug-at nga palas-anon matangtang. Wala nay mas maayo pa nga pagbati kay sa mahibalo nga nagbarug kamo nga matarung sa panan-aw sa Dios.”
Paghigugma Niadtong Mipauli og Sayo
Kining duha ka mga misyonaryo kinsa sayo nga mipauli mihatag og gibug-aton kon unsa ka importante alang sa mga higala ug pamilya sa sayo nga nauli nga mga misyonaryo sa paghigugma ug pagsuporta kanila.
“Hatagi sila og kagawasan,” miingon si Marshall. “Apan siguroa nga anaa ra kamo sa duol, tungod kay kini nga kasinatian makapaguol kaayo. Himoa ang inyong kaugalingon nga ilang higala.” Pinaagi sa pagpaminaw sa Espiritu, atong madeterminar ang ilang mga panginahanglan ug mahibalo kon kanus-a moduol ug kanus-a morespeto sa ilang pag-inusara.
“Higugmaa lang gayud sila,” midugang ang misyonaryo nga miserbisyo didto sa Colorado. “Awhaga sila nga hinumduman kanunay ang maulaong sakripisyo ni Jesukristo.”
Unsaon sa pagtratar sa uban ang sayo nga nauli nga mga misyonaryo makatabang sa paghimo og kalainan tali sa ilang pagbiya sa Simbahan nga naulaw o sa paglambo diha sa Simbahan uban sa pagtuo. Busa, importante gayud nga hangupon sila nga dili hukman.
Sama ni Corianton, ang sayong nauli nga mga misyonaryo adunay potensyal nga mouswag gikan sa ilang kasamtangang huyang nga kahimtang ngadto sa gamhanan nga mga instrumento sa Ginoo.
Pagkakaplag og Paglaum diha sa Plano sa Dios
Si Elder Jeffrey R. Holland sa Korum sa Napulog Duha ka mga Apostoles mitanyag og kahupayan ngadto sa sayo nga nauli nga mga misyonaryo. “Kon adunay mangutana kon miserbisyo ba kamo og misyon, ingna nga oo,” miingon siya. “… Ipakabililhon ang serbisyo nga inyong gihatag. Pagmapasalamaton sa oportunidad nga nakapamatuod, nga nakaserbisyo sa ngalan sa Ginoo, nga nakasul-ob nianang name tag sa misyonaryo. … Palihug, palihug ayaw pagsigeg hunahuna nga mipauli kamo og sayo; ayaw paghunahuna nga dili kamo angayan o pakyas kamo.”1
Alang niadtong mipauli og sayo isip resulta sa sala, hinumdumi kini nga mga pulong ni Sister Joy D. Jones, Kinatibuk-ang Presidente sa Primary: “Kon makasala kita, dili kaayo kita takus, apan dili gayud nga wala na kitay bili!”2 Namahayag siya nga ang Dios motabang kanato sa pagpalambo og pagsalig sa atong kaugalingon atol sa atong labing lisud nga mga panahon kon modangup kita Kaniya.
Ang mensahe gikan sa Basahon ni Mormon, gikan sa moderno nga sayong nauli nga mga misyonaryo, ug gikan sa mga lider sa Simbahan susama ra: Ayaw pagkawala sa paglaum, tungod kay ang Dios sa gihapon adunay plano alang kanimo nga mas labaw pa kay sa imong mahunahuna. Alang sa mga minahal niini nga mga misyonaryo, ang inyong reaksyon sa ilang pagpauli mohimo og dakong kalainan diha sa pagtabang kanila sa pagpaayo ug sa pagkab-ut sa ilang potensyal. Hinumdumi nga ang Pag-ula ni Jesukristo makaayo sa tanang mga samad—lakip niadtong miuli og sayo gikan sa misyon.