Mga Leksyon gikan sa Bag-ong Tugon
Ang Mga Apostoles Mga Saksi ni Jesukristo—ug Mamahimo Usab Kamo!
Paghulagway sa litrato pinaagi ni David Stoker
Hunahunaa nga ikaw ug ang usa ka higala naniudto sa eskwelahan. Ablihan na unta sa imong higala ang usa ka kendi sa dihang dunay tawo nga miduol ug miakusar kaniya nga nangawat sa kendi ug misukna nga “iuli” kini. Kauban ka sa imong higala sa dihang gipalit niya kini, mao nga bisan og tingali nakulbaan ka, imong gisultihan ang namasangil nga dili kawatan ang imong higala.
Talagsaon nga mga Saksi
Ang pagbarug alang sa kamatuoran sama niini matawag nga “nahimong usa ka saksi.” Sa ehemplo, ikaw mahimong saksi sa maayong kinaiya sa imong higala. Sama nga ikaw mahimong usa ka saksi alang sa imong higala, ang Dios mitawag og mga propeta ug mga apostoles nga mahimong talagsaon nga mga saksi sa Iyang Anak, si Jesukristo. Ang mga apostoles “gipadala uban sa piho nga awtoridad ug responsibilidad”1 sa pagtudlo, pagpamatuod, ug sa pagserbisyo isip “talagsaon nga mga saksi sa ngalan ni Kristo sa tibuok kalibutan” (Doktrina ug mga Pakigsaad 107:23).
Wala madugay human nabanhaw si Kristo, ang mga Apostoles gitawag aron mahimo Niyang mga saksi (tan-awa sa Mga Buhat 1:8). Samtang magtuon ka sa Mga Buhat diha sa Bag-ong Tugon, makabasa ka og daghang mga higayon sa diha nga ang mga Apostoles mipamatuod nga si Jesukristo mao ang Anak sa Dios (tan-awa sa Mga Buhat 2:36; 5:27–32; 10:36–44). Ang mga Apostoles karon mipadayon niini nga tawag isip talagsaon nga mga saksi—paminaw lang sa kinatibuk-ang komperensya ug imong makita kon giunsa nila sa pagpamatuod mahitungod kang Kristo.
Ang Espiritu Santo Nagpamatuod kang Kristo
Pipila ka mga Apostoles sa Bag-ong Tugon kauban ni Kristo sa dihang dinhi Siya sa yuta ug nakakita Kaniya nga mikayab ngadto sa langit (tan-awa sa Mga Buhat 1:9–11), ug ang mga Apostoles karon tingali nakakita ni Kristo,2 apan dili ang pisikal nga pagkakita kang Jesus ang makapahimo sa usa ka tawo nga Iyang saksi. Si Presidente Joseph Fielding Smith (1876–1972) miingon, “[Ang Espiritu Santo] ang bugtong paagi nga ang usa ka tawo tinuod nga makahibalo nga si Jesus mao ang Kristo ug nga ang iyang ebanghelyo tinuod.”3 Nagpasabut kini nga, bisan tuod ang mga Apostoles tingali nakakita kang Kristo, nasayud sila nga Siya ang Manluluwas tungod kay ang Espiritu Santo misulti kanila!
Pwede Ka nga Mahimong Saksi
Ang nakanindot niini mao nga gisaaran ka usab nga mahimo ka nga masayud nga si Jesukristo ang imong Manluluwas pinaagi sa Espiritu Santo (tan-awa sa Doktrina ug mga Pakigsaad 46:13). Dili kini usa ka butang nga ang mga Apostoles lamang ang makahibalo! Bisan tuod wala ikaw tawaga nga mahimong talagsaon nga saksi ni Kristo, mahimo ka nga magtinguha og pagpamatuod kang Kristo ug mamahimong Iyang saksi sa mga tawo sa imong kinabuhi. Mahimo nimong sundon ang sugo sa Manluluwas kang Pedro: “Sa mahibalik na ikaw kanako, lig-una ang imong mga igsoon” (Lucas 22:32).