Paghimo og Résumé bisan og walay Igong Kasinatian sa Panarbaho

Ni Heather White Claridge

Mga Magasin sa Simbahan

Wala ka bay igong mabutang sa imong résumé? Hunahunaa ang imong mga calling sa Simbahan!

Pipila sa nag-unang mga seksyon nga kasagarang makita diha sa mga résumé mao ang “Kasinatian sa Panarbaho,” “Kasinatian sa Pag-boluntaryo,” “Edukasyon,” ug “Mga Kahanas.” Bisan tuod og kini mubo lang nga lista, ang pagbati nga wala kay daghang kasinatian niini nga bahin mahimong makapahingawa. Apan ayaw pagpakawala sa paglaum! Tingali ikaw adunay mas daghang kasinatian kay sa imong nahibaloan—ilabi na nga ang imong mga calling sa Simbahan makahatag kanimo og bililhong kasinatian. Atong gituman ug gipaninguha sa pagpalambo ang atong mga calling sa Simbahan tungod sa atong gugma sa Ginoo ug tinguha sa pagtabang sa Iyang mga anak, apan ang mga kahanas nga atong makuha sa pagbuhat niini makatabang usab sa pag-ila sa pagpangita og trabaho.

Paglista og mga Buluhaton ug Kasagad

Bisan unsa pa ang imong mga calling sa Simbahan, naa gyuy mga nahimo ug mga kahanas nga imong nakat-unan nga imong malakip sa imong résumé. Paghimo og lista sa mga buluhaton nga imong gihimo sa matag calling ug isulat unsa ka sagad nimo gibuhat kini nga mga buluhaton ug pila ka tawo ang naapil niini.

Mga Pamahayag sa mga Nahimo

Sunod, pagbuhat og “mga pahayag sa nahimo.” Kini mubo ra apan mahulagwayon nga mga pahayag bahin sa unsay imong nahimo atol sa imong calling. Makita kini sa imong résumé sa lista nga may bullet ubos sa matag kasinatian.

Sugdi ang matag pahayag nga may “action verb”—kusganon nga mga panglihok [verb] sama sa magdumala, magpauswag, magtudlo, ubp.

Mga ehemplo

Kini mga pahayag nga nahimo base sa pipila ka klase sa mga calling ug naglakip og mga buluhaton, kasagad, ug mga numero nga kasagaran may kalabutan sa mga calling:

Kon ang usa ka magtutudlo:
- Nag-andam og leksyon kada semana pinaagi sa pagtuon sa mga manwal ug mga kasulatan ug naghipos og mga kapanguhaan ug personal nga mga kasinatian
  - Alang sa kasagad, ilista kon unsa ka sagad imong gihimo ang buluhaton—senemana, kaduha sa usa ka bulan, ubp.
- Nagtudlo og klase sa unom nga 14 ngadto sa 16 anyos kada semana sulod sa 50 ka minuto.
  - Ang gidak-on sa klase ug mananambong mag depende sa imong calling.
Kon anaa sa kapangulohan:
- Nagmugna ug nakab-ot kada bulan ug tag dugay nga mga tumong [long-term goal] alang sa grupo.
- Nag-atiman sa kaayohan sa 30 ka miyembro sa organisasyon.
- Nagbansay sa mga lider ug mga magtutudlo sa ilang mga katungdanan.
- Nagplano ug nag-organisar kada bulan og mga kalihokan alang sa 26 ka mga tawo.
- Nagmugna ug nagsunod og binulan nga budget.
Kon usa ka music director:
- Nag-organisar og senemana nga programa sa musika.
- Naghan-ay alang sa espesyal nga mga musical number nga gipasundayag sa mga miyembro sa kongregasyon.
- Nagplano og mga programa sa musika sa mga holiday ug mga kalihokan [events].
Kon nangalagad ka og misyon:
- Naghimo ug nagbuhat sa senemana ug tag-dugay nga pagtudlo ug mga tumong sa personal nga kalamboan.
- Nagtudlo og kasagaran mga 16 ka mga indibidwal ug mga grupo matag semana kon unsaon sa pagpalambo sa ilang mga kinabuhi pinaagi sa personal nga pagbuhat ug pagtuon.
- Kon usa ka tigpahanas [trainer]: Nagpahanas ug nagtambag og bag-o nga mga misyonaryo sa pagtudlo ug pagpahiuyon sa malisud nga eskedyul.
- Kon usa ka sister nagbansay, district, o lider sa zone: Responsable sa pag-aghat, pagtimbang-timbang, pag-report sa pag-uswag, ug pag-atiman sa 14 ka mga misyonaryo.
- Kon atua sa lain nga nasud: Nagpuyo sa [lain nga nasud] sulod sa [kadugayon] ug nakapalapad sa akong kahibalo sa ilang kultura.
- Kon makasulti ka og lain nga pinulongan, paghimo og mubo nga sulat nga ikaw nagsulti gayud niana nga pinulongan ug ang gidugayon.
- Kini nga mga ehemplo mga kinatibuk-ang pagkayano, apan ang pinakapiho sa unsay imong nahimo ug ang pinaka-angay sa trabaho, mas maayo.

Paghimo og Imong Résumé

Idugang ang imong lista sa mga calling ug ang nahiuyon nga mga pahayag sa nahimo ngadto sa imong résumé. Aron sa pagtabang sa imong mga calling nga daw tukma ngadto sa imong résumé, kinahanglan nimong ikonektar ang imong résumé ngadto sa deskripsyon sa trabaho nga imong giaplayan.

Ang mga deskripsyon sa trabaho hapit kasagaran adunay importanting mga pulong [key words] diha niini. Kini nga importanting mga pulong piho nga mga butang nga gipangita sa kompanya ngadto sa tawo nga ilang dawaton, ug gusto nimong masiguro nga gamiton kini nga importanting mga pulong sa imong résumé. Gusto usab nimong ipakita ang imong mga calling nga mas bagay sa deskripsyon sa trabaho. Kon nangaplay ka nga mahimong assistant sa usa ka tawo, ipatigbabaw ang mga calling nga nalakip sa mga kahanas sa organisasyon, o kon nangaplay ka og subtitute teacher [puli nga magtutudto], ilista ang mga calling nga naglakip sa pagtudlo.

Dugang nga mga Importanting Kasayuran [Tip]

Ilista ang imong mga calling ubos sa imong “Kasinatian sa Pagboluntaryo” nga seksyon.
Ilista ang organisasyon nga “Ang Simbahan ni Jesukristo sa mga Santos sa Ulahing mga Adlaw.”
Ilista ang ngalan sa calling nga imong ulohan sa trabaho.
Gamita ang daghang unibersal nga mga pulong ug hugpong sa mga pulong sama sa kongregasyon imbis sa ward o branch ug senemana nga mga kalihokan sa mga batan-on imbis sa Mutual.
Ihulagway ang mga organisasyon nga dili kabisado sa mga tawo.
- Sama pananglit, ihulagway ang Relief Society [Kapunongan sa Kahupayan] isip usa ka internasyonal nga organisasyon sa mga babaye. Mahimo nimong tawagon ang imong ward o branch nga Relief Society isip lokal nga grupo o chapter sa organisasyon.

Mahimo usab nimong gamiton ang mga baruganan sa ibabaw aron sa pag-ila sa mga kahanas ug mga kasinatian gikan sa ubang boluntaryo nga trabaho, mga trabaho ug mga kalihokan nga imong nahimo. Mahinungdanon kini nga ipakita ang han-ay sa nagkalain laing mga kasinatian nga may kalabutan sa posisyon nga gusto nimong maangkon. Sa ingon niana, uban sa imong mga calling sa Simbahan, sulayi ang paglakip og mas daghang may kalabutan nga mga kasinatian kutob sa imong mahimo diha sa imong résumé. Bisan og wala pa nimo maamguhi kini, daghan kag mahatag, mao nga ayaw ipakaubos ang imong kaugalingon!