Dili Siya Malimot sa Inyong Buhat

Pipila ka bulan ang milabay ako adunay damgo diin, naglingkod sa simbahan sa katapusang laray sa lingkuranan sama sa naandan, ug walay intensyon nga moapil, nausab ang akong panglantaw. Akong nakita nga nagkatag diha sa kongregasyon mao ang ubang sayo nga nauli nga mga misyonaryo. Mibati ko og tinguha sa pagtabang kanila samtang mitan-aw ko sa palibut. Nasayud ko nga ang pagpaambit sa akong mga kasinatian mahimong usa ka paagi sa pagpangalagad ngadto kanila ug sa pagtabang kanila nga mopadayon sa dalan sa pakigsaad bisan niining daw babag diha sa dalan.

Pinaagi niini nga damgo, ang Langitnong Amahan mipahibalo kanako nga nagpakabana Siya. Nagpasalamat Siya sa matarung nga serbisyo nga atong gihatag isip mga misyonaryo, dili igsapayan kon unsa ka dugay milungtad ang atong full-time nga pagserbisyo. “Ang Dios dili hiwi nga tungod niana hikalimtan lamang niya ang inyong buhat ug ang gugma nga inyong gipadayag alang kaniya” (Mga Hebreohanon 6:10). Sa akong artikulo (tan-awa sa pahina 47), mipaambit ko og istorya sa kasulatan ug ang mga kasinatian sa ubang sayo nga nauli nga mga misyonaryo nga makatabang kanimo samtang moagi ka niining lisud nga kasinatian. Ganahan usab ko kon sa unsang paagi si Alex migamit og usa ka istorya gikan sa Basahon ni Mormon aron sa pagtabang kanato nga makasabut nga bisan niadtong mipauli og sayo tungod sa mga isyu sa katakus, aduna gihapoy paglaum (tan-awa sa pahina 44).

Sa digital lamang nga mga artikulo, imong mabasa kon giunsa ni Emily pag-usab ang mga pagbati sa kabalaka, kahadlok, ug kawalay paglaum nga iyang nasinati ngadto sa usa ka personal ug sagrado nga kalipay. Ug si Kevin, usa ka propesyonal nga magtatambag, mitanyag og mga sugyot kon sa unsang paagi ang mga minahal makasuporta niadtong nanlimbasug sa sayo nga pagpauli.

Ang rason nganong mipauli kita dili sama ka importante sa unsay atong buhaton kon makapauli na kita. Uban sa tabang sa Manluluwas, kita mahimong mamaayo, mouswag, ug mopadayon sa pagpangita og dugang nga kalipay sa atong mahangturong panaw.

Matinuoron,

Liahona Ficquet

Labing Maayo nga Tambag …

Ang mga batan-ong hamtong mipaambit sa ilang labing maayo nga tambag mahitungod sa sayo nga pagpauli gikan sa imong misyon:

“Hibaloi lang nga ma-OK ra ang tanan. Gihatagan ako niini nga tambag: lisud kini hangtud nga makahukom ka nga dili. Makahukom ka kon unsa nga matang sa umaabut ang imong maangkon.”

—Nathaniel Park, Western Australia, Australia

“Dili kinahanglang mao kini ang mohulagway kanimo.”

—Elena Kingsley, Utah, USA

“Bisan unsa pa ang mga sirkumstansya, sulayi sa pagpangita og bag-ong mga buluhaton alang sa imong kaugalingon, sa pagpahiangay ngadto sa kinabuhi human sa misyon.”

—Rosa-Lynn Ruiter, Netherlands

“Ang katapusan sa usa ka misyon mao ang sinugdanan sa bag-o. Pangitaa kana nga misyon!”

—Roberto Alfonso Martinez IV, Utah, USA

“Ang Dios nahigugma kanimo ug adunay plano alang kanimo. Padayon diha sa pagtuo!”

—Rebecca Stockton, Arizona, USA

Unsa ang labing maayong tambag nga imong nadawat sukad mahitungod sa kaminyoon? Ipadala kanamo ang imong mga tubag diha sa liahona.lds.org hangtud sa Hulyo 31, 2019.