Ngaahi Peesi Fakalotofonuá
Ko Hono Langa ha Halafononga ko ha Fāmili
ʻI Sune 2017, ne kau atu ʻa Misa Keleniteila Fonokalafi mo hono uaifi ko Lasiní ki ha faeasaiti Fakafalala pē Kiate Kita ʻo na ʻilo ai fekauʻaki mo e polokalama BYU PathwayConnect. Ne toki nofó ni ʻa Keleniteila mei ha kalasi ʻi ha ʻapiako fakalotofonua peá ne fakakaukau ai ʻe tokoni ʻa e polokalama ko ʻeni ʻa e Siasí ke kamata ʻene halafononga fakaakó. Ka ʻi he ʻosi ʻa e faeasaití, ne ongoʻi ʻe he ongo meʻá ni ne feʻunga ange ʻa e polokalamá ni—ʻi he taimí ni—kia Lasini. Naʻá ne lēsisita leva ki he kalasí ʻi Sepitema 2017.
ʻI he māhina ʻe 10 ne hokó, naʻá ne femoʻuekina ʻi hono fakafononga atu hono husepānití ki he ngāué he pongipongi kotoa, tokangaʻi ʻa hona ʻapí pea mo tokangaʻi ʻa hona kiʻi foha taʻu 1. ʻI he efiafí naʻá ne tokanga taha leva ki heʻene ngāue ki he kalasi PathwayConnect, pea naʻá ne faʻa ʻā fuoloa ke ako; naʻá ne saiʻia ʻi heʻene lava ke akó. Naʻá ne vahevahe mo hono husepānití ʻa e ngaahi fakaikiki kotoa, ʻo ueʻi fakalaumālié ai ia ʻi heʻene sio ki he vilitaki mo e tupulaki fakalaumālie ke lēsisita ki he polokalamá ʻi he hū hono hokó.
Ne ʻosi ʻa Lasini mei he PathwayConnect ʻi Siulai 2018, ko ha māhina pē ia ʻe tolu pea talitali lelei ʻe he ongomātuʻá ni ʻa ʻena tama fika uá—ko ha kiʻi taʻahine—ki he māmaní. Naʻe toki kamata leva ai ʻa Keleniteila ʻene taʻu ako ʻi he PathwayConnect ʻa ia naʻá ne lavaʻi lelei ia ʻi Siulai 2019.
ʻOku manatu ʻa Lasini naʻe faingataʻa moʻoni ke tokanga ʻa hono husepānití ki heʻene ngaahi ngāue fakakalasí he taʻu ko iá. ʻOkú ne pehē, “Naʻá ne feilaulauʻi e ngaahi pongipongí, poʻulí, mo e fakaʻosinga ʻo e uiké.” Ne kau ʻi he ngaahi ngāue angamaheni ʻa Keleniteila he lolotonga e uiké ʻa ʻene, ʻā he 4:40 he pongipongi kotoa ki heʻene ngāue maʻuʻanga moʻui taimi kakató, pea mo e Efiafi Fakafāmili ʻi ʻApi ʻi he pō Mōnité, Fakataha Alēleaʻanga ʻa e Siteiki ʻOkalani Nuʻu Sila Papatoetoé ʻi he pō Pulelulú, ngaahi fakataha ʻa e PathwayConnect ʻi he Tuʻapulelulú pea ko e toenga ʻo e taimí ne fai ai ʻene akó.
“Naʻá ne tokoni mai ʻi he meimei pō kotoa ke fakamohe e fānaú peá ne [toki] ʻā leva ʻo aʻu ki he 12:00 am ʻo fai ʻene ngāué . . . naʻá ne fakapapauʻi ʻe lahi hono taimi mo e ngāue ki heʻene ngāue fakaako mei ʻapí.”
Neongo ko e aʻusia kāfakafa e ʻosi mei he PathwayConnect ki he ongomātuʻa Fonokalafí, ka ʻoku mahulu ange ʻa e ngaahi lelei kuó na maʻu ʻi he akó pē.
Ne fakamatala ʻa Lasini ʻo pehē, “Kuó ma ako fakataha ʻoku mahuʻinga e feilaulaú mo e feingá ki he ʻEikí. ʻOku ʻikai ke aʻusia e lavameʻá ʻi ha taimi nounou pē. Neongo e faingataʻa e feinga ke ʻohake ha fāmili kei tupu hake, ngaahi fatongia faka-Siasí, ngāué mo e akó, naʻá ma ongoʻi fiefia maʻu pē.”
Ne fakamanatu ange foki ʻe he aʻusiá ni kiate kinaua ʻoku ofi mai maʻu pē ʻa e ʻOtuá ki Heʻene fānaú ke tokoniʻi kitautolu ʻi he ngaahi taimi faingataʻá. Ko e taimi ʻoku lōmekina ai kitautolu ʻe he ngaahi ngāué, ʻoku ʻikai haʻatau fili ka ke tafoki ki he ʻEikí he ko Ia pē te Ne lava ʻo liliu hotau lotó, ngaahi holí mo e meʻa ʻoku tau loto ke faí. Koe moʻoni kuó Ne toʻo ʻetau [ngaahi] kavengá he taimi kotoa peá Ne poupouʻi kitautolu ke tau hoko atu.”
Ko e meʻa hoko kia Sisitā Fonokalafí ko e hoko atu ke maʻu ha tohi fakamoʻoni ako [certificate] mei BYU-Idaho ʻa ia naʻá ne toki kamatá. ʻOkú ne fakaʻamu ke maʻu hono BA ʻi he Takimamatá mo e Talitali Kakaí [Hospitality] pea fakaʻaongaʻi lelei ʻa hono taleniti lea ʻi he ngaahi leá fakafonua kehekehé. ʻOku siofi lelei ʻe hono husepānití ʻa ʻene fakalakalaká pea ʻokú ne loto falala ʻe vavé ni pē foki haʻane toʻo haʻane ngaahi kalasi.
ʻOku toe ha ngaahi taʻu pea mo ha ngāue lahi mo e feilaulau ki heʻena fakaʻosi ako hokó, ka ʻoku mateuteu e ongomātuʻa Fonokalafí ki ai. ʻOku pehē ʻe Lasini, “ʻOku faingataʻa ʻa e moʻuí, ka ʻoku faingofua pē ʻa e moʻui ʻi he ongoongoleleí. Ko e meʻa ia kuó ma ako ʻi homa halafononga ʻo e Pathway!”