Ngaahi Peesi Fakalotofonuá
Ko e Malu ʻi he Ngaahi Fale Lotú ko e Fatongia ia ʻo e Kau Māʻoniʻoni ʻi he Ngaahi ʻAho Kimui Ní Kotoa Pē
Ko e fakafoʻou ki he ngaahi fakahinohino ki he malú ko ha tali ia ki he “ngaahi tuʻunga feliuliuaki ʻi he māmaní”.
Kuo fakafoʻou ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa ʻene ngaahi fakahinohinó ke tokoni ki he kau takimuʻa mo e kau mēmipa ʻo e Siasí ke nau malu lolotonga ʻenau ʻi he ngaahi ʻapi Siasí. Naʻe tohi e kau Pīsopeliki Pulé ʻo pehē ki he kau taki ʻo e Siasí, “ko e ngaahi tuʻunga feliliuaki ʻi he māmani” ʻa e tupuʻanga ʻo e ngaahi fakafoʻou ko ʻení.
Naʻe pehē ʻe he tohi ne fakamoʻoni hingoa ki ai ʻa e Pīsope Pule ʻo e Siasí, Sēlaati Kōsē mo hono tokoní, Pīsope Tiini M. Tevisi mo Pīsope W. Kulisitofā Uātele. Ko e ngaahi fakahinohino ko ʻení ʻoku fakataumuʻa ia ke akoʻi ʻa e kau takí mo e kau mēmipá ki he founga ʻe toe lahi ange ai ʻa e malú ʻi he ngaahi falelotu ʻo e Siasí mo e ngaahi ʻekitivitií. “ʻOku mau fakaafeʻi ʻa e kau takí ke aleaʻi ʻa e ngaahi meʻá ni ʻi he ngaahi fakataha alēlea fakauōtí mo e siteiki pea ke ngāueʻaki kinautolu ke akoʻi ʻaki ʻa e kau mēmipá, ʻo fakatatau ki he fie maʻú, ke feau ʻa e ngaahi hohaʻa fakalotofonuá. ʻOku totonu ke fakaʻaongaʻi ʻa e ngaahi fakahinohino ko ʻeni ʻi ha founga totonu, pea tokangaekina foki mo e ngaahi lao fakalotofonuá.”
ʻOku fakahinohinoʻi ʻe he ngaahi fakahinohino ko ʻeni ʻa e Kau Māʻoniʻoni ʻi he Ngaahi ʻAho Kimui Ní ke fakafalala ki he kau ngāue maluʻi fakalao fakalotofonuá ʻi he ngaahi fakatuʻutāmaki fakatuʻupakē pea mo fokotuʻu atu ha ngaahi meʻa ʻe ala fai ʻe he kau mēmipá ke fakaleleiʻi ange ai ʻa e tuʻunga malú. Kau heni ʻa hono fakatokangaʻi ʻa hoto ʻātakaí, maʻu pē ha nonga, anga fakakaungāmeʻa mo fakaʻapaʻapa ki he tokotaha ʻaʻahi kotoa pē, ʻoua ʻe nofo tokotaha ʻi ha falelotu, pea muimui ʻi he fakahinohino ʻa e Laumālie Māʻoniʻoni ki ha tataki mo e maluʻanga. ʻOku toe tokoni foki ʻa e ngaahi fakahinohinó ki he kau takí ke toe lelei ange ʻenau fakafeangai ʻi ha taimi ʻe uesia ai ʻa e fakatahaʻanga lotú ʻe ha tokotaha pē ha kulupu.
ʻOku fakaʻosi ʻaki ʻa e fakahinohinó ha faleʻi fekauʻaki mo hano fakafepakiʻi ha taha fana meʻafana pe ko ha taha fakafepaki pehē. Ko e ngaahi fakahinohino ko ʻení ʻoku akoʻi ia ʻe ha kau ngāue maluʻi fakalao mo e kau mataotao ʻi he ngaahi ngāueʻanga fakamaluʻí ko ha ngaahi founga totonu taha ia ki hano matatali ʻo ha faʻahinga tuʻunga pehē. ʻOku faleʻi ʻa e kau takí mo e kau mēmipá ke nau lele, toitoi pe fakafepaki ʻo fakatatau pē ki he tūkunga lolotongá.
Lele. Hola leva kapau ʻoku ʻi ai ha hala ʻe ʻatā. Fakatovave leva ki he hūʻanga ki tuʻa malu tahá pea mamaʻo mei he falelotú ki ha feituʻu ʻoku malú. Mavahe fakalongolongo pē pea ʻoua ʻe tohoakiʻi mai e tokanga ʻa e tokotaha ʻohofí. ʻOku fie maʻu e kakai lalahi ke nau fakapapauʻi ʻoku malu ʻa e longaʻifānau kotoa pē pea ʻoku ʻiloʻi kotoa kinautolu. ʻOua naʻa toe foki ki he falelotú pē ʻōfisi pe ko ha lokiako ki haʻo ngaahi meʻa fakataautaha. ʻOua naʻá ke toʻo ha meʻa ʻe ala pehē ko ha meʻatau ʻe he kau ngāue maluʻi fakalaó.
Toitoi. Kapau ʻe ʻikai lava ke ke hola ʻo hao, toitoi ke ʻoua naʻa lava ʻo sio atu ʻa e tokotaha ʻohofí ʻo ʻiloʻi koe. Kapau ʻe lava, tāpuni, loka, pea fakafaingataʻaʻiaʻi ha hū mai ʻi he matapā ki he lokiakó, ʻōfisí pe ha loki kehe ʻokú ke toi ai. Tamateʻi e ʻuhilá, tamateʻi mo e ngaahi telefoni toʻotoʻó peá ke ʻai ke ke ʻi lalo he falikí pea mamaʻo mei he ngaahi matapā sioʻatá. Kapau leva ʻe fai ha fefanaʻaki ʻi he vā ʻo e kau ngāue maluʻi fakalaó mo e tokotaha ʻohofí, ʻoku fie maʻu ʻa e tokotaha kotoa pē ke nofo maʻu ʻi he loki kuo ʻosi hono tātāpuni malu kae ʻoua kuo fakangofua atu ʻe he kau ngāue maluʻi fakalaó.
Fakafepaki. Ko e meʻa ke fai fakamuimui tahá, kapau ʻoku ʻikai ha taimi ke lele pe toitoi, fakafepakiʻi ʻa e tokotaha ʻohofí. Ngāueʻaki ha faʻahinga meʻa pē ʻe ala lava ko ha meʻatau pea tau ke taʻofi ʻa e tokotaha ʻohofí. Kapau ʻoku ʻi ai mo ha niʻihi kehe, mou fokotuʻutuʻu ke maluʻi kimoutolu.