Ha’api’ira’a nō roto mai i te Buka a Moromona.
Hō’ē tauira’a rahi o te ’ā’au
Maoti te tāra’ehara a Iesu Mesia, e’ita tātou e tāmā-noa-hia i te hara ; ’e fa’aora-ato’a-hia rā tātou i te hara.
Nā roto i te hi’ara’a o Adamu, ’ua tae mai te ma’i ’e te hara i roto i te ao nei. E nehenehe teie nā mea e piti e riro ’ei ’ati rahi. I roto i te mau ma’i ato’a, ’aita paha hō’ē a’e i hau atu i te parare ’e i te ’ino i te māriri ’aita’ata. I roto i te tahi mau fenua, hau i te hō’ē i ni’a i te toru o te huira’atira ’o te fa’atupu i te hō’ē huru ma’i māriri ’aita’ata, ’e ’o te tumu ïa nō te hō’ē i ni’a i te maha o te mau pohe ato’a.1 Pinepine te ma’i māriri ’aita’ata i te ha’amata nā ni’a i te hō’ē tao’a tahi, ’o te ’itehia nā roto ana’e i te hō’ē hi’o fa’arahi. E nehenehe te reira e tupu i te rahi ’e e parare ma te vitiviti.
E rapa’auhia te feiā ma’i māriri ’aita’ata nō te fa’a’ore taua ma’i ra. Te aura’a o te parau ē, te matarara’a hope, ’oia ho’i, ’aita hō’ē fa’ahou tāpa’o fa’a’itera’a nō taua ma’i ra. Terā rā, e mea vitiviti roa te feiā tōro’a i te parau ē, noa atu ē, tei roto te hō’ē ta’ata ma’i i te matarara’a, ’aita te reira e parau ra ē, ’ua ora roa ’oia.2 Nō reira, noa atu ē, e hōro’a mai te ’orera’a o te ma’i i te tauturu ’e i te ti’aturira’a, e ti’aturi te feiā ma’i māriri ’aita’ata i te hō’ē mea i’ō atu i te matarara’a—tē hina’aro nei rātou ’ia ora roa rātou. ’Ia au i te hō’ē mana’o, « Nō te fa’aora i te hō’ē ta’ata i te ma’i māriri ’aita’ata, e ti’a iāna ’ia tīa’i ’e ’ia hi’o ē, e’ita ānei te ma’i māriri ’aita’ata e ho’i fa’ahou mai, nō reira, e mea faufa’a te parau nō te taime. Mai te mea ē, e vai noa te ta’ata ma’i i roto i te matarara’a nō te tahi tau matahiti te maoro, penei a’e, ’ua ora ïa te ma’i māriri ’aita’ata. E nehenehe te māriri ’aita’ata e ho’i fa’ahou mai i muri a’e e rave rahi matahiti o te matarara’a »3
Te ma’i ’e te hara
E ’ino rahi tā te māriri ’aita’ata e fa’atupu i roto i te tino, ’ua hau atu rā te ’ino tā te hara e fa’atupu i ni’a i te vārua. E mea na’ina’i roa te hara ’ia ha’amata—i te tahi taime e’ita e ’itehia—terā rā, e nehenehe e tupu ’oi’oi i te rahi. E fa’arahi, i muri iho e ha’aparuparu, e i muri iho ’e tapārahi pohe i te vārua. O te tumu rahi te reira—’oia mau, te tumu hō’ē roa—o te pohe pae vārua i roto i te mau mea ato’a i poietehia. Te rā’au rapa’au o te hara o te tātarahapa ïa. E 100% te manuia o te tātarahapa mau nō te fa’aora i te ta’ata hara, ’aore rā, nō te fa’atupu i te fa’aorera’a i te mau hara. E hōro’a teie fa’aorera’a i te tauturu ’e te ’oa’oa i te vārua. Terā rā, te fāri’ira’a i te matarara’a i te hara ’e te ti’amāra’a i tōna mau tāpa’o ’e tōna mau aveave, ’aita te reira e fa’aora hope roa ra i te ta’ata hara. Tē vai ra hō’ē mea i ni’a i te ’ā’au o te ta’ata hara ’o te fa’atupu ’aore rā, ’o te nehenehe e fa’atupu i te hara. Nō reira, e nehenehe te hara e tupu fa’ahou mai, noa atu e hia rahira’a matahiti i muri a’e i te matarara’a. Te vai-noa-ra’a i roto i te matarara’a, ’aore rā, te tāpe’ara’a i te hō’ē matarara’a i te mau hara, e mea faufa’a rahi te reira nō te fa’aorara’a hope roa.
Tāmāhia ’e fa’aorahia
E tauturu teie fa’ahōho’ara’a ia tātou ’ia hāro’aro’a ē, i te pae vārua, tītauhia ia tātou ’eiaha ’ia mā noa, ’ia ora ato’a rā i te hara. E nehenehe te tama’i i rotopū i tō tātou hina’aro ’ia rave i te maita’i ’e tō tātou nātura ta’ata ’ia rave i te ’ino, e riro ’ei ’ohipa rohirohi. Mai te mea e ha’apa’o maita’i tātou, e upo’oti’a tātou ’eiaha nō te mea ē, ’ua ha’avī tātou i tō tātou hina’aro i ni’a i tō tātou nātura ta’ata, nō te mea rā ē, ’ua tu’u tātou i tō tātou hina’aro i mua i te Atua ’e ’ua taui ’oia i tō tātou nātura ta’ata.
’Ua ha’api’i mai te Ari’i Beniamina ē, « Nō te mea te ta’ata tino nei, o te ’enemi ïa o te Atua, ’e e ’enemi ’oia mai te hi’ara’a o Adamu mai ā, ’e e ’enemi ho’i a muri ’e a muri noa atu ; ’āre’a ’ia auraro ’oia i te parau a te Vārua maita’i, ’e ’ia fa’aru’e i te mau peu a te ta’ata tino nei… nā roto i te tāra’ehara a te Mesia ra te Fatu » (Mosia 3 :19). ’Ei pāhonora’a i teie mau ha’api’ira’a ’e i te tahi atu, ’ua pure te nūna’a o Beniamina, « E aroha mai ia mātou nei, ’a tu’u mai i te toto tāra’ehara o te Mesia, ’ia fa’a’orehia tā mātou nei mau hara, ’e ’ia mā tō mātou ’ā’au » (Mosia 4 :2 ; ha’apāpūra’a i ’āpitihia atu). I muri a’e i tō rātou purera’a, ’ua pāhono mai te Fatu i tā rātou anira’a e piti. ’A tahi, « ’O te Vārua o te Atua i ni’a mai ra ia rātou ra, ’ī ihora rātou i te ’oa’oa, i matara ho’i tā rātou mau hara, ’e ’ua hau tō rātou ’ā’au » (Mosia 4:3).
I tōna ’itera’a ē, tei roto tōna nūna’a « i te matarara’a », ’ua fa’aitoito ihora te Ari’i Beniamina ia rātou ’ia tītau i te fa’aorara’a hope nā roto i te ha’api’ira’a ia rātou nāhea ’ia vai noa i roto i te matarara’a (hi’o Mosia 4:11–30). ’Ua fafau mai ’oia ē, « ’Ia rave ’outou i te reira, e ’oa’oa ïa ’outou e’ita e fa’aea, e fa’a’īhia ho’i ’outou i te aroha o te Atua, e vai matara noa tā ’outou mau hara » (Mosia 4:12).
’Ua ti’aturi ’e ’ua nati te nūna’a ia rātou i ni’a i te mau parau a te Ari’i Beniamina, i muri iho, ’ua pāhono mai ra te Fatu i te tuha’a piti o tā rātou pure—’oia ho’i, « ’ia tāmāhia [tō rātou] ’ā’au ». Ma te māuruuru ’e te ’ārue, ’ua pi’i ihora te nūna’a, « [nā ] te Vārua o te Fatu pūai hope tei fa’ahuru ’ē ia mātou, ’oia ho’i tō mātou ’ā’au, i ’ore ai mātou i hina’aro ai i te rave i te ’ino, ’ia rave rā i te maita’i ma te fa’aea ’ore » (Mosia 5 :1–2). ’Ua fa’ata’a mai ra te Ari’i Beniamina ē, teie tauira’a rahi, tōna aura’a, ’ua fānauhia ïa rātou e te Atua (hi’o Mosia 5 :7).
Nāheahia te reira ?
’Ua ha’api’i mai te peropheta Alama ē, tītauhia ia tātou ’ia tātarahapa ’e ’ia fānau-fa’ahou-hia—fānauhia e te Atua, tauihia i roto i tō tātou ’ā’au (hi’o Alama 5 :49). Mai te mea e tātarahapa tāmau noa tātou, e ’īriti ’ē te Fatu i tā tātou mau hara ato’a ’e e ’īriti ’ē ’oia i te mea e fa’atupu ’aore rā, e fa’ati’a i te hara i roto ia tātou. Terā rā, ’ia au i te mau parau a Enosa, « E te Fatu, nāheahia te reira ? » (Enosa 1 :1). E mea ’ōhie roa te pāhonora’a, terā rā, e mea hōhonu ’e e mea mure ’ore. Nō te feiā tei fa’aorahia i te hō’ē mea, i te tino ’aore rā, i te vārua, ’ua parau te Fatu ē, « ’Ia ora ’oe i tō fa’aro’o » (hi’o Mareko 5 :34 ; Enosa 1 :8).
Te tauira’a rahi o te ’ā’au i tupu i ni’a ia Alama, ’ua tupu ïa « mai te au i tōna fa’aro’o », ’e ’ua tauihia te ’ā’au o tāna mau pipi ’a « ti’aturi ai rātou i te Atua mau ora ra » (Alama 5 :12, 13). ’Ua tauihia te ’ā’au o te nūna’a o te Ari’i Beniamina « nā roto i te fa’aro’o i te i’oa [o te Fa’aora] » (Mosia 5 :7).
Mai te mea e hina’aro tātou i teie huru fa’aro’o, e nehenehe ai tātou e ti’aturi i te Fatu ma tō tātou ’ā’au ato’a, tītauhia ïa ia tātou ’ia rave i te mea e arata’i atu i te fa’aro’o ra, ’e e rave i te mea tā te fa’aro’o e arata’i atu. I roto i te mau mea e rave tā te fa’aro’o e arata’i atu, i roto i te parau nō teie tauira’a o te ’ā’au, ’ua ha’apāpū mai te Fatu i te ha’apaera’a mā’a, te pure ’e te parau a te Atua. E noa atu ē, e arata’i atu te fa’aro’o i te mau mea e rave rahi ra, te tātarahapa tāna hotu mātāmua.
’A feruri na i teie nā ’īrava e piti nō roto mai i te Buka a Helamana ’o tē ha’afaufa’a nei i teie mau parau tumu. ’A tahi, tē tai’o nei tātou i te parau nō te hō’ē nūna’a ’o tei « ha’apae pinepine ra i te mā’a, ’e te pure, ’e te tupu… pāpū i roto i te fa’aro’o i te Mesia… ’e tae noa atu ’ua mā e ’ua mo’a tō rātou ’ā’au, ’e ’ua noa’a mai ra taua mo’ara’a ra nō te mea ’ua riro tō rātou ’ā’au i te Atua » (Helamana 3:35). I muri iho, nō roto mai ia Samuela te peropheta o te ’āti Lamana, ’ua ha’api’i tātou « te mau pāpa’ira’a mo’a, ’oia īa, te mau tohura’a a te mau peropheta mo’a… arata’i māite atu ho’i… nō te fa’aro’o i ni’a i te Fatu, ’e i te tātarahapa, ’o te fa’aro’o ’e te tātarahapa, i te ta’ata hō’ē tauira’a o te ’ā’au » (Helamana 15:7).
Tei te Atua te parau
E ti’a ia tātou ’ia pārahi ri’i ’e ’ia ’ite ē, teie tauira’a rahi tā tātou e paraparau nei, ’ua tupu ïa i roto ia tātou ; e ’ere nā tātou i fa’atupu. E nehenehe tā tātou e tātarahapa, e taui i tō tātou huru, i tā tātou peu, e tae noa atu i tō tātou mau hina’aro ’e tō tātou mau ti’aturira’a, terā rā, nō te taui i tō tātou nātura ta’ata, tei ’ō atu ïa te reira i tō tātou mana ’e tō tātou ’aravihi. Nō te mea teie tauira’a rahi, tei te Atua mana hope ïa te parau. Nā roto i te aroha, e tāmā ’oia i tō tātou ’ā’au ’e e taui i tō tātou nātura ta’ata « hope noa atu tō tātou itoito ato’a » (2 Nephi 25 :23). E mea tāmau ’e e mea pāpū tāna anira’a manihini : « e tātarahapa, ’e e haere mai iā’u ma te ’ā’au hina’aro hō’ē, ’e nā’u e fa’aora ia [’outou] » (3 Nephi 18 :32 ; ha’apāpūra’a i ’āpitihia atu).
Te hope’ara’a o te fa’aorara’ahia i te hara, maori rā, e « fa’arirohia tō [tātou] ra huru tāhuti ’e te ma’iri, ’ei huru parau-ti’a… ’ia riro ’ei tamaiti ’e ’ei tamāhine nāna ra ; E ’ia nā reira, e riro [tātou] ’ei ta’ata fa’a’āpīhia » (Mosia 27 :25, 26). E ’ana’ana tō tātou mata i te māramarama o te Mesia. Hau atu ā, tē fa’a’ite mai nei te mau pāpa’ira’a mo’a ia tātou ē, « o tā te Atua i fānau, e ’ore ïa e rave i te hara » (1 Ioane 5 :18). E ’ere nō te mea ’aita e ti’a ia tātou ’ia rave i te hara, nō te mea rā ē, terā ïa tō tātou nātura i teienei, ’eiaha e rave i te hara. ’Oia mau, e tauira’a rahi mau.
’A ha’amana’o ē, te fāri’ira’a i te tauira’a rahi o te ’ā’au, e ’ohipa ïa ’o tē tupu i te roara’a o te tau, e ’ere hō’ē noa taime. E tupu marū noa te tauira’a, i te tahi taime, e’ita e ’itehia, e tupu mau rā te reira, e mea pūai ’e e mea tītauhia.
Mai te mea ē, ’aita ā ’outou i ’ite a’e nei i taua huru tauira’a rahi ra, tē ani nei au ia ’outou : ’ua tātarahapa ānei ’outou ’e ’ua fāri’i ānei ’outou i te matarara’a o tā ’outou mau hara ? Tē tuatāpapa ra ānei ’outou i te mau pāpa’ira’a mo’a ? Tē ha’apae ra ānei ’outou i te mā’a ’e te pure pinepine ra ānei, ’ia ti’a ia ’outou ’ia tupu pāpū atu i roto i te fa’aro’o i te Mesia ? ’Ua nava’i ānei tō ’outou fa’aro’o nō te ti’aturi i te Fatu ma tō ’outou ’ā’au ato’a ? Tē ti’a pāpū ra ānei ’outou i roto i te reira fa’aro’o ? Tē ha’apa’o maita’i ra ānei ’outou i tō ’outou mau mana’o, te mau parau, ’e te mau ’ohipa, ’e te ha’apa’o ra ānei ’outou i te mau fa’auera’a a te Atua ? Mai te mea ē, tē rave nei ’outou i teie mau mea, e ’oa’oa ’outou i te mau taime ato’a ’e e ’ī ho’i i te here o te Atua ’e e tāpe’a ho’i i te matarara’a o tā ’outou mau hara. E mai te mea e vai noa ’outou i roto i te matarara’a, e fa’aorahia ’outou, ’e e tauihia !
E mana tō Iesu Mesia nō te tāmā ia tātou i tā tātou mau hara ’e nō te fa’aora ato’a ia tātou i tō tātou huru hara. E mea pūai ’oia nō te fa’aora, ’e nō te reira hope’ara’a e mea pūai ’oia nō te taui. Mai te mea ē, e fa’aha’eha’a tātou i tō tātou ’ā’au i mua iāna, ma te fa’a’ohipa i te fa’aro’o nā roto i te ravera’a i te mau tauira’a ato’a e ti’a ia tātou ’ia rave, e fa’a’ohipa ’oia i tōna mana i roto ia tātou nō te fa’atupu i teie tauira’a rahi o te ’ā’au (hi’o Alama 5 :14).