Ha’apūai i tō ’outou fa’aro’o nā roto i te ’ōrama mātāmua
Tē pure nei au ’ia pe’e ’outou i te hōho’a pure a Iosepha, ’ia ha’api’i mai i te mau parau mau tāna i ha’api’i mai, ’e ’ia ha’apūai i tō ’outou fa’aro’o i roto i tō ’outou Metua i te ao ra ’e tāna tamaiti, ’o Iesu Mesia.
I te 16ra’a o tō’u matahiti, ’ua tere au mai tō’u fare i Idaho nō te haere i te ’āmuira’a i te pae hiti’a o te rā o te fenua Marite, e ’āmuira’a nā te feiā ’āpī tamāroa ’e te feiā ’āpī tamāhine nō te mau tuha’a fenua ato’a e 50 ’e fātata e 40 rahira’a fenua. Nā mua a’e i te reira, e mea varavara roa te taime ’a vai ai au i roto i te hō’ē huru tei fa’ata’a ’ē mai iā’u.
I te hō’ē pō, i roto i te hō’ē putuputura’a fa’anaho-’ore-hia ’ua tupu a’era te hō’ē ’āparaura’a nō ni’a i te tahi mau ti’aturira’a ’e mau ’ohipa a te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua fāriu mai ra te hō’ē pupu pīahi rahi i ni’a iho iā’u ’e ’ua ha’amata a’era i tē uiui mai i te mau uira’a, e mea fa’a’ino te tahi mau uira’a i tō tātou mau ti’aturira’a.
’Aita vau i ineine roa nō te reira. Terā rā, i muri a’e mā’a taime iti te ferurira’a, ’ua ha’amata a’era vau i te fa’a’ite i te tahi mau parau tumu faufa’a o te ’evanelia. ’Ua fa’ata’a atura vau ē, e Metua i te ao ra tō tātou, e mau tamaiti ’e e mau tamāhine tātou nāna, ’e tei ni’a tātou i te fenua nei nō te fa’ahotu i te fa’aro’o ia Iesu Mesia ’e nō te ha’amaita’i ia tātou iho nā roto i te mā’itira’a i te maita’i ’eiaha te ’ino.
Nā roto i tō’u fa’a’itera’a i teie mau parau tumu, ’ua arata’i te reira iā’u i ni’a i te ’itera’a pāpū o Iosepha Semita. ’Aita te tahi atu mau pīahi i ui mai nō ni’a ia Iosepha Semita, terā rā, ’ua ho’i mai au i te ’ōmuara’a nō te mau tumu o tō’u mau ti’aturira’a. ’A paraparau ai au nō ni’a i te fāra’a mai te Metua mure ’ore ’e te tamaiti i roto i te uru rā’au mo’a, i terā iho taime ’ua fa’aea noa ihora te mau ta’ata ato’a ma te māmū. ’Ua tomo mai ra te hō’ē mana’o mo’a ’ite-pāpū-hia i roto i te piha, ’e ’ua vai mai ra te hō’ē mana’o pūai o te mana pae vārua i ni’a iho iā’u ’e i tā’u mau parau.
I muri iho, ’ua ha’amāuruuru mai e rave rahi pīahi iā’u nō tō’u ’itera’a pūai. ’Ua ani mai te tahi pae i te tahi atu mau ha’amāramaramara’a nō ni’a i te ’Ēkālesia. ’A ho’i ai au i roto i tō’u piha i taua pō ra, ’ua ’ite a’era vau ē, te ta’ata tei putapū rahi i roto i teie ’ohipa, ’o vau ïa. ’Ua ’ite au nā roto iā’u iho i te mana nō te fa’a’itera’a i te ’itera’a pāpū nō ni’a i te Atua te Metua mure ’ore, ’o Iesu Mesia, ’e te ’ōrama mātāmua.
Mai te taime nō taua ’itera’a ra, a 50 matahiti i ma’iri a’e nei, ’ua fa’a’ite pāpū vau e rave rahi hānere taime nō te Metua mure ’ore, te tamaiti ’e te peropheta Iosepha Semita. I roto i teie mau ’ohipa, ’ua fāri’i tāmau vau i te fa’a’itera’a pāpū a te Vārua Maita’i.
Tē hina’aro nei au e fa’a’ite atu e pae parau tumu tā’u i ha’api’i mai i roto i tō’u hāro’aro’ara’a vārua i te ’ōrama mātāmua. ’Ua ha’apūai teie mau parau tumu i tō’u fa’aro’o ’e i tō’u hina’aro ’ia pe’e i tō tātou Metua i te ao ra ’e i tāna tamaiti here. Maita’i ē, ’ua ha’apūai ato’a te reira ia ’outou.
1. Te Metua, te Tamaiti, e te Vārua Maita’i, e mau tino ta’a ’ē rātou te tahi i te tahi.
I te roara’a o te mau tenetere, ’ua tāu’aparau te mau ’aivana’a ’e te mau philosopho i ni’a i te nātura mau ’o te Atua Metua, ’o Iesu Mesia, ’e te Vārua Maita’i. E rave rahi tei ti’aturi ē, hō’ē ta’ata ’o rātou. Maoti te ’itera’a ’o Iosepha i roto i te uru rā’au mo’a a 200 matahiti i ma’iri a’e nei, ’ua ’ite tātou i te parau mau pāpū nō ni’a i te nātura ’o te Atua.
’A tahi roa, tē ora nei oia ! ’A piti, te metua ’e te tamaiti e nā ta’ata ta’a ’ē rāua te tahi ’e te tahi, ’e te hanahana, e mau tino ti’afa’ahou, ta’a ’ē te tahi i te tahi. I muri mai, ’ua ha’api’i mai Iosepha ē, «’aita tō te Vārua Maita’i e tino i’o ’e te ivi, terā rā, e tino vārua ’oia. ’Āhiri ’aita rā, e ’ore roa ïa e ti’a i te Vārua Maita’i ’ia pārahi i roto ia tātou nei » (PH&PF 130 :22).
E mau tamaiti ’e e mau tamāhine tātou nā te Atua
Nā roto i te ’ōrama mātāmua ’e te tahi atu mau ’itera’a, ’ua ha’api’i mai te peropheta Iosepha Semita ē, e ’ere te Atua i te hō’ē mana ātea tei hāmani i te fenua nei ’e tōna mau ta’ata ’e i muri iho, ha’amo’e mai nei ia rātou. Te ti’ara’a mau, tātou tāta’itahi, « e mau tamāhine [’aore rā, tamaiti] here nā te mau metua i te ao ra. »1
Tē fa’ahiti ra te Parau poro’i nō te ’utuāfare : « ’Ua hāmanihia te mau ta’ata ato’a—te tāne ’e te vahine—i te hōho’a ’o te Atua. ’Ua riro tātou tāta’itahi ’ei tamaiti ’e ’ei tamahine vārua herehia e nā metua i te ra’i ra, ’e nō reira, e huru ’e e hope’a hanahana tō tātou tāta’itahi. »2 ’Ua parau pāpū te Metua mure ’ore i taua hope’a ra : « Inaha, o teie ho’i tā’u ’ohipa e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei » (Mose 1 :39).
Tei te Atua ra tō tātou ihota’ata, ’e tei ’ō nei tātou i ni’a i te fenua nei nō te riro hau atu mai iāna te huru. Nā teie hāro’aro’ara’a i te ’ōrama mātāmua i tauturu iā’u ’ei taure’are’a, ’ia ’ite ē, e Metua i te ao ra tō’u tei here iā’u ’e tei hina’aro ’ia ho’i au iāna ra.
3. E nehenehe tā tātou mau hara e fa’a’orehia
Hō’ē o te mau māna’ona’ora’a rahi o Iosepha, ’oia ho’i, ’ia fa’a’orehia tāna mau hara. I roto i te hō’ē ’ā’amu o te ’ōrama mātāmua, ’ua parau te Fatu i teie mau parau i te tamaiti ’āpī e ’imi nei i te parau mau : « E Iosepha, tā’u tamaiti, ’ua fa’a-’orehia tā ’oe mau hara. ’A haere i tō ’oe tere, ’a haere i roto i tā’u ha’apa’ora’a, ’e ’a ha’apa’o i tā’u mau fa’auera’a. Inaha, ’o vau nei te Fatu o te hanahana. ’Ua fa’asātaurohia vau nō te ao nei, ’e te mau ta’ata ato’a e ti’aturi i tō’u i’oa, e fāri’i rātou i te ora mure ’ore. »3
’Ua ha’api’i mai Iosepha ē, nā roto i te tāra’ehara a Iesu Mesia, e nehenehe tāna mau hara e fa’a’orehia ’e ’ia riro ’ei mea mā ’e te vi’ivi’i ’ore i mua i te Atua. ’Ua hōro’a mai ’oia i te hō’ē ’itera’a pāpū ē, ’ua rave Iesu Mesia i ni’a iho iāna i te mau hara ’e te mau hōpoi’a a te mau ta’ata ato’a tei ora ’e ’o tē ’ore nei i ni’a i te fenua nei.
Nā roto i te ’ōrama mātāmua, tē ha’api’i mai nei tātou ē, maoti te aroha ’o tō tātou Fa’aora, ’o Iesu Mesia, e nehenehe ato’a tā tātou mau hara e fa’a’orehia, ’e i te hō’ē mahana, e ti’a mai ma te mā i mua i te Metua.
Tē fa’aro’o mai nei ’e te pāhono mai nei tō tātou Metua i tē ao ra i tā tātou mau pure
I roto i te uru rā’au i taua mahana ra i te matahiti 1820, ’ua ha’api’i mai Iosepha ē, e fa’aro’o ’e e pāhono mai te Metua i te ao ra i te pure. I muri a’e, ’ua parau ’oia, « E mea pāpū roa iā’u e fāri’i au i te fa’a’itera’a mo’a, nō te mea i fāri’i a’ena vau i te hō’ē fa’a’itera’a » (Joseph Smith—’Ā’amu 1 :29). Tē ha’api’i nei teie hi’ora’a ia tātou ē, e nehenehe tātou e ha’afātata i tō tātou Metua i te ao ra i roto i te pure nō te fāri’i i tā tātou iho mau pāhonora’a.
’Ua rave tāmau noa ’o Iosepha i teie hōho’a nō te pure. ’Ua ti’aturi ’oia ē, e fa’aro’o mai ’e e pāhono mai te Fatu i tāna mau pure. ’Ua pure ’oia nō ni’a i te mau mea tā ’outou ato’a paha i pure.
’Ua pure ’oia nō te pa’ari (hi’o Iosepha Semita—’Ā’amu 1 :12–13).
’Ua pure ’oia nō te bāpetizora’a (hi’o Iosepha Semita—’Ā’amu 1 :68).
’Ua pure ’oia nō te fa’aorara’a (hi’o Te Parau Ha’api’ira’a ’e te mau Parau Fafau 121 :1–4).
’Ua pure ’oia nō te mau misiōnare (hi’o Te Parau Ha’api’ira’a ’e te mau Parau Fafau 109 :22).
’Ua pure ’oia nō te ’Ēkālesia, tōna mau melo, ’e tōna mau ti’a fa’atere (hi’o Te Parau Ha’api’ira’a ’e te mau Parau Fafau 109 :71–76).
’E ’ua pure ’oia nō tōna ’utuāfare (hi’o Te Parau Ha’api’ira’a ’e te mau Parau Fafau 109 :68–69).
Teie te hō’ē hōho’a nō tātou. ’Ua fa’a’ite mai Iosepha ia tātou ē, e nehenehe tātou pā’āto’a e haere i tō tātou Metua ra nā roto i te pure.
5. ’Ua ’ite te Metua ’e te tamaiti iho ia tātou
Mai roto mai i te ’ōrama mātāmua, ’ua ha’api’i mai tātou ē, ’ua ’ite teie mau tino tīrētiēra ia tātou, mai ’ia rāua i ’ite ia Iosepha. ’Ua pi’i te Metua ia Iosepha i tōna i’oa ’e, « ma te fa’atoro atu i tōna rima i ni’a i te tahi », ’ua parau ihora, « o tā’u Tamaiti here teie. ’A fa’aro’o Iāna !» (Iosepha Semita—’Ā’amu 1 :17).
’Ua ’ite te Metua ’e te Tamaiti i te mau hina’aro, te mau pe’ape’a ’e te mau hia’ai ’o Iosepha, mai tāna i ’ite i tō tātou. ’Ua ’ite ato’a rāua i tō tātou mau manuia ’e te mau ’oto.
I tō’u ’āpīra’a, ’ua pure au nō te mau mea e rave rahi. ’Ia hi’o vau i muri i teienei, tē vai ra te tahi mau mea e ’ere i te mea faufa’a roa. Terā rā, e mea faufa’a te reira nō’u i taua taime ra, ’e ’ua hāro’aro’a vau i tō’u ’āpīra’a ē, e Metua i te ao ra tō’u tei fa’aro’o mai iā’u. ’Aita vau i fāri’i i te mau taime ato’a i te hō’ē pāhonora’a vitiviti, terā rā, ’ua ’ite au ē, i tōna iho taime ’e nā roto i tāna iho ravera’a ’e fa’atura ’oia i tā’u anira’a i roto i te huru e tano nō’u.
’A ti’aturi ē, e paraparau mai te Atua ia ’outou. ’A ti’aturi i te reira mau mana’o ’o tē tae mai i roto i te hōhonura’a o tō ’outou ’ā’au. ’Ua ti’aturi au i te pure ’e ’ua hāro’aro’a vau i tōna mana nō te mea ’ua ’ite au i te ’ohipa tei tupu i ni’a i te peropheta Iosepha Semita. ’Ua ’ite au ē, ’ua ’ite te Atua i tō’u i’oa ’e e pāhono mai ’oia iā’u, mai tāna i ’ite i tō ’outou i’oa, ’e e pāhono mai ’oia ia ’outou.
’Itera’a pāpū
Nō te rahira’a matahiti e 68 ’a ora ai au i ni’a i te fenua nei, ’ua tāmata vau i te hōho’a o te pure a Iosepha. Mai te mau pipi mau ato’a a te Fa’aora, ’ua fāri’i ato’a vau i te mau pāhonora’a nō te ra’i mai. ’Ua ’ite au ē, ’o Iesu te Mesia. ’O ’Oia te Tamaiti a te Atua. ’Ua ti’afa’ahou ’oia ’e tē ora nei ’oia i teie mahana. E mana tōna nō te fa’a’ore i tā tātou mau hara. Nā roto i tō tātou fa’aro’o, te ha’apa’o, ’e te tātarahapa, e nehenehe tāna e fa’aho’i ia tātou ma te hau i tō tātou fare i te ra’i ra.
’Ei ’Āpōsetolo nā te Fatu ’o Iesu Mesia ’e ’ei ’ite fa’atōro’ahia nōna, tē fa’a’ite nei au ma te pāpū ’e te ’ite mau tei ha’apāpūhia e te Vārua Mo’a ē, ’ua fā mai te Metua ’e te Tamaiti ia Iosepha Semita i roto i te uru rā’au mo’a. Tē pure nei au ’ia pe’e ’outou i te hōho’a pure a Iosepha, ’ia ha’api’i mai i te mau parau mau tāna i ha’api’i mai, ’e ’ia ha’apūai i tō ’outou fa’aro’o i te Metua i te ao ra ’e i tāna tamaiti ’o Iesu Mesia.
Fa’ahōho’ara’a na’ David Malan
Fa’ahōho’ara’a nā Kendall Ray Johnson