Ni’a noa i te rorouira : Feiā ’Āpī Pa’ari
Te ’itera’a i te ’oa’oa i roto i te ravera’a i te ’ohipa a te Fatu
’Ei feiā ’āpī pa’ari, e mea ’ohipa rahi te orara’a. E rave rahi te mau mea tā tātou e nehenehe e rave : fa’ananea atu ā i tā tātou ha’api’ira’a, te ’imira’a i te hō’ē hoa mure ’ore, rave i te fa’aotira’a nō te hō’ē tōro’a ’ohipa, ha’amata i te hō’ē ’utuāfare. Ta’a ’ē atu teie mau ’ohipa maita’i, ’ua fa’aitoito-ato’a-hia tātou ’ia « ’ite-tāmau-hia i te ravera’a i te ’ohipa a te Fatu ».1
« ’Ua tae i te taime nō tātou pā’āto’a ’ia māramarama rahi atu ā i tā tātou hōpoi’a i roto i te ha’ape’epe’era’a i te ’ohipa nō te fa’aorara’a. Mai te mea ē, e fa’ariro tātou i te ’ohipa misiōnare a te melo… te ’ohipa hiero ’e te ’ohipa ’ā’amu ’utuāfare, ’e te ha’api’ira’a i te ’evanelia, ’ei tuha’a mātarohia nō tō tātou orara’a, e ’itehia ia tātou te ’oa’oa rahi ’e e fāri’i tātou i te mau hōro’a pae vārua e tītauhia e tātou nō te ha’apūai i te ’Ēkālesia ».2
Teie te tahi feiā ’āpī pa’ari ’ohipa roa tei fāri’i i te ’oa’oa i te fa’ata’ara’a i te taime nō te ’ohipa a te Fatu.
’Ā’amu ’utuāfare : ’A ha’amata i teienei
« E rave rahi ’ohipa tā te Fa’aho’i-fa’ahou-ra’a mai i rave nō’u iho nō te mea ’ua ’ite au ē, e nehenehe te ’utuāfare e vai ’āmui e a muri noa atu », te parau ïa a Itumeleng Tlebere nō Maseru, Lesotho. « E nehenehe au e ’ite i tō’u metua tupuna ’e tō’u mau tupuna tei pohe. Nō reira vau e au roa ai i te ’ā’amu ’utuāfare. Nō te mea o vau te u’i mātāmua i roto i te ’Ēkālesia, e rave rahi ’ohipa tā’u e rave nō rātou ».
’Ua ’ite ’o Itumeleng ē, e ’ere i te ’ohipa ’ōhie ’ia tuatāpapa i te mau parau ’e te mau ha’amāramaramara’a, terā rā, tē fa’aitoito nei ’oia i te tahi atu feiā ’āpī pa’ari ’ia tomo i roto i tō rātou ’ā’amu ’utuāfare : « ’A ha’amata i te rave i te reira … ’Ua fa’atupu te ’ā’amu ’utuāfare i te māuruuru i roto iā’u nō te mau mea ato’a tā’u i fāri’i ». E nehenehe te reira e tupu ato’a i ni’a ia ’outou.
Te aupurura’a : ’Ia riro ’ei rima nō te Atua
’Ua fa’a’ite ’o Lucy Fergeson nō Utaha, Marite, nāhea te aupurura’a i te tauturura’a iāna i roto i te hepetoma ’ino roa a’e o tōna orara’a—terā rā, ma te mana’o-’ore-hia. E hepetoma hi’opo’ara’a hope’a i te fare ha’api’ira’a, hō’ē hepetoma ’ī maita’i i te ’ohipa, ’e ’ua fa’aru’ehi’a ’ōna e tōna hoa arapae. E ’ua parau ’oia ē, « ’ua hina’aro vau e ha’amo’e, terā rā, ’ua fa’anaho māua tō’u hoa aupuru e hāmani i te mau faraoa monamona muffins nā te mau tuahine tei fa’ata’ahia nā māua e aupuru ».
’A tunu ai rāua, ’ua fa’aro’o te hoa aupuru ’o Lucy, ’ua ha’apāpū, ’e ’ua hōro’a i te mana’o tauturu. « E ’ere te hāmanira’a ’e te ’āfa’ira’a i te muffins i te hō’ē mea faufa’a roa ’aore rā, nō te fa’atupu i te ta’a-’ē-ra’a » te mana’o ïa o Lucy. « Terā rā, i te fa’aho’ira’a mai tō’u hoa aupuru iā’u i te fare, ’ite a’era vau ē, o terā mau ïa tā’u i hina’aro, ’ia maita’i ri’i a’e au, ’e i te tahi taime, e tono mai te Atua i te tahi atu mau ta’ata ’ia riro ’ei rima nōna. Te vāhi maita’i nō’u, ’o te taera’a mai ïa te tauturu nā roto mai i tō’u hoa aupuru ’eiaha rā nā roto mai i tō’u mau tuahine aupuru. Tē māuruuru nei i te mea ē, ’ua tauturu ’oia iā’u ’ia ’ite ē, ’aita vau i vai ’ōtahi noa ’e ’ua herehia vau ».
Te ’ohipa misiōnare : E ora nō te riro ’ei hi’ora’a
’Aita e tītauhia ia ’outou ’ia riro ’ei misiōnare rave tāmau nō te ha’aparare i te ’evanelia. Tē fa’ata’a nei ’o Vennela Vakapalli, Andhra Pradesh, nō Initia, « ’Ia haere au nā ni’a i te pere’o’o uta ta’ata, ’ia haere au nā ni’a i te pere’o’o auauahi, e hōhora vau i te Buka a Moromona ’e e tai’o i te reira. ’E e ani mai te rahira’a o te ta’ata iā’u i te reira ».
Tē fa’a’ite ra ’o Ashlee Dillon nō Utah, Marite : « ’Eiaha nō te mea ē, ’aita vau i tāvini i te hō’ē misiōni, e ’ere ïa vau i te hō’ē misiōnare. ’Aita vau e vaiiho nei i tō’u ’utuāfare nō te tāvini i te Fatu, tē tāvini nei rā vau e tō’u ’utuāfare i te Fatu. Tē tāvini nei au ia vetahi ’ē, ’e tē ora nei au ’ia riro ’ei hi’ora’a nō te hō’ē pipi nā Iesu Mesia ».
Te ti’ara’a metua : Ha’api’i i te mau tamari’i i te ’evanelia
Ingrid de Bastian Ortiz, nō Veracruz, Mehiko, e metua vahine 26 matahiti nō e toru tamari’i. Tē fa’ata’a nei ’oia ē, « ’ei metua nō te mau tamari’i ’āpī, tē vai ra te mau mahana fifi roa, ’e ’aita e hope’ara’a te ’ohipa ’e te mau tamari’i e ti’a ’ia ha’apa’o. Terā rā, ’ua ’ite māua i te hōpoi’a rahi nō te ha’api’ira’a i te ’evanelia i tā māua mau tamari’i ’ia ’ite ho’i rātou ē, e mau tamari’i rātou nā te Atua.
« Tā’u ’ohipa ’ei metua vahine ’o te tauturura’a ïa ia rātou ’ia ’ite rātou iho ē, e fa’anahora’a nō te ’oa’oa tā tō tātou Metua i te ao ra nō rātou ».
Noa atu ē, ’aita ā ’outou i riro ’ei metua, e nehenehe ’outou e rave i te hō’ē tuha’a i roto i te tauturura’a ’ia ha’api’i i te mau tamari’i. « E mea faufa’a mau ’ia ’ite te mau tamari’i i teie mau parau tumu ’e mau ha’api’ira’a », te parau ïa a Ingrid, « ’E ’ei feiā ’āpī ’ōtahi ’aore rā, ’ei feiā pa’ari fa’aipoipohia, e nehenehe tā tātou e tauturu i roto i te tahi mau pi’ira’a o te Paraimere ’e te ha’apa’ora’a tamari’i ».
E feiā ’āpī pa’ari ’ohipa roa tātou pā’āto’a. Terā rā, noa atu te huru o tō ’outou orara’a, e ’itehia ia ’outou te mau rāve’a ’ōhie nō te ravera’a i te ’ohipa a te Fatu i roto i te mau tuha’a ato’a o tō ’outou orara’a—te mea rahi ’e te mea na’ina’i.