E nehenehe tātou e ha’aparare i te māramarama o te ’evanelia

Te ti’ara’a feiā ’āpī pa’ari o te hō’ē ïa taime nō te tupura’a i te rahi, te mau rāve’a, ’e hō’ē fāna’ora’a nō te ha’amata i te patu i tō ’outou orara’a. ’E e nehenehe te reira e riro ’ei ’ohipa teimaha, ’ei ’ohipa ’oa’oa, ’e te hitahita ato’a (pāpū rā ē, nō tātou mau te reira).

’Aita paha tātou i ’ite pauroa i te mau pāhonora’a i te mau uira’a teimaha o te orara’a nei, tē vai ra rā hō’ē mea tā tātou i pāpū maita’i—’oia ho’i, ’ua riro te feiā ’āpī pa’ari ’ei pūai faufa’a i te mau taime ato’a i roto i te fa’aho’i-fa’ahou-ra’a mai o te ’Ēkālesia a Iesu Mesia e tāmau noa nei.

I roto i te fa’anahora’a i te tuha’a o teie ’āva’e, ’ua paraparau mātou i te feiā ’āpī pa’ari e rave rahi nō ni’a i tō rātou ’āmuira’a i roto i te ha’aputuputura’a ia ’Īserā’ela. ’E ’ua ha’eha’a roa mātou ’ia ’ite i tō rātou here ’ā’au tae mau ’e te ha’apa’o i te ’evanelia a Iesu Mesia. Noa atu te huru o tō rātou orara’a, ’ua hāro’aro’a teie feiā ’āpī mo’a i tā rātou ’ohipa faufa’a rahi i roto i teie tau tu’ura’a hope’a. I roto i te « Nāhea te feiā ’āpī pa’ari i te fa’atupu i te ta’a-’ē-ra’a i roto i te fa’aho’i-fa’ahou-ra’a mai ’o tē tāmau noa nei » i ni’a i te ’api 44, e nehenehe ’outou e tai’o e mea nāhea te feiā ’āpī pa’ari nō te fenua Initia, Hongrie, Barbades, Auteraria, ’e te mau Hau ’Āmui nō Marite e fa’aineine nei i te ao nei nō te tae-piti-ra’a mai o te Fa’aora.

I roto i te parau pāpa’i i roto i te roro uira, tē hōro’a nei o Cesar i te mana’o nō ni’a i te huru e nehenehe ai tātou e ’ite i tā tātou ’ōpuara’a ’e ’ia riro mai ’ei feiā fa’atere maita’i a’e. ’Ua paraparau o Lauri nō ni’a i te mau ha’amaita’ira’a tā tātou e fāri’i ’ia pe’e ana’e tātou i te a’o a te peropheta. Tē fa’a’ite nei te tahi atu feiā ’āpī pa’ari i tō rātou mau ’itera’a nō te tāvinira’a i te hiero, te aupurura’a, te ’ā’amu ’utuāfare, ’e te ’ohipa misiōnare. ’E tē fa’a’ite atu nei mātou i te hō’ē hi’ora’a nō roto mai i te hō’ē feiā ’āpī pa’ari nō Taratoni ’o tē fa’ahōho’a nei nāhea te mau melo feiā ’āpī i te ravera’a i te ’ohipa a te Fatu i roto i te mau fenua na’ina’i a’e o te ’Ēkālesia.

Noa atu te vāhi tei reira ’outou, ’e noa atu te huru o tō ’outou orara’a, e nehenehe ’outou e fa’atupu i te ta’a-’ē-ra’a i roto i te ha’aputuputura’a ia ’Īserā’ela hau atu i tā ’outou e feruri nei. ’Ei feiā ’āpī pa’ari, ’o tātou te feiā fa’atere nō ananahi o teie ’Ēkālesia. ’E nā te ho’a uira o tā tātou mau tauto’ora’a i teie mahana ’e fa’a’ama ’e e ha’aparare i te māramarama o te ’evanelia nā te ao ato’a nei ananahi.

Ma te aroha mau,

Chakell Wardleigh ’e Mindy Selu

Pāpa’i ve’a fa’atere nō te tuha’a feiā ʼāpī paʼari nō te mau ve’a a te ’Ēkālesia

« Te aura’a o te fa’aho’i-fa’ahou-ra’a mai e tupu noa nei ā, ’oia ho’i, te paraparau noa mai nei ā te Atua i tāna mau tamari’i. Te ora nei ’oia ’e te ’ohipa noa nei i teie mau mahana, ’aita ’oia i ma’iri. Te ha’apa’o nei ’oia ia tātou, ’e te hina’aro nei te peropheta ’ia ’ite tātou te feiā ’āpī pa’ari ē, te here nei ’oia ia tātou. Nō reira, ’ia riro ’outou ’ei hi’ora’a ’e ’ia fa’a’ite i te reira here ia vetahi ’ē. ’A fa’a’oroma’i ’e a fa’a’ite i te maita’i ’e a toro i te rima nō te tauturu ia vetahi ’ē ’ia ’itehia ia rātou te hau, te ’oa’oa rahi a’e ’e te ’ōpuara’a e ’itehia i roto i te ’ēvanelia a Iesu Mesia i fa’aho’ihia mai.

—Parker Smith, Oregon, USA

Nō roto mai i te feiā fa’atere o te ’Ēkālesia

« ’Ia hope tō tātou tau i roto i te tāhuti nei, e aha te mau ’itera’a e ti’a ia tātou ’ia fa’a’ite nō ni’a i tā tātou iho hōro’ara’a nō teie pu’e tau faufa’a o tō tātou orara’a, ’e nō te fa’ahaerera’a i te ’ohipa a te Fatu i mua ? E ti’a anei ia tātou ’ia parau ē, ’ua viri tātou i tō tātou rima ’ahu i ni’a ’e ’ua rave ma tō tātou ’ā’au ato’a, tō tātou pūai ato’a, tō tātou mana’o ato’a, ’e tō tātou itoito ato’a ? ’Aore rā, e fāri’i ānei tātou ē, tā tātou ’ohipa rahi a’e, o te hi’o noa ïa ?

Elder Dieter F. Uchtdorf nō te pupu nō te Tino Ahuru ma Piti ’āpōsetolo, « Te ta’oto ra ānei ’outou i roto i te fa’aho’i-fa’ahou-ra’a mai ? » Liahona, Me 2014, 59.