’Ua fa’aho’ihia mai te ’Ēkālesia a Iesu Mesia !

Hou tātou ’a haere mai ai i te fenua nei, i ora nā tātou i pīha’i iho i tō tātou nā Metua i te ao ra. ’Ua here rāua ia tātou. E fa’anahora’a nehenehe tā te Metua i te ao ra nō tātou. E haere mai tātou i te fenua nei nō te fāri’i i te hō’ē tino ’e nō te ha’api’i mai ’e ’ia tupu i te rahi. I muri iho e ho’i tātou e ora i roto i tō tātou fare i te ra’i ra. E’ita rā tā tātou e nehenehe e rave tātou ana’e. E hina’aro tātou i te tauturu.

’Ua mā’iti te Metua i te ao ra i tō tātou taea’e matahiapo, ’o Iesu Mesia, ’ia haere mai i te fenua nei nō te tauturu ia tātou. ’Ua fa’a’ite mai Iesu ia tātou nāhea ’ia here ia vetahi ’ē ’e ’ia pe’e i te mau fa’auera’a a te Metua i te ao ra. ’Ua mā’iti ’oia i te mau ’Āpōsetolo nō te fa’atere i tāna ’Ēkālesia.

I muri iho, ’ua māuiui Iesu nō tātou i roto i te ’ō nō Getesemane. ’Ua ’ite ’oia i tō tātou mau māuiui ato’a ’e te ’oto. ’Ua pohe ’oia i ni’a i te sātauro nō tātou. Nō te reira, e nehenehe tātou e fāriu atu iāna ra ’ia pēpē tātou ’aore rā ’ia ’oto ’aore rā ’ia hina’aro i te tauturu. E nehenehe tātou e tātarahapa ’ia rave tātou i te hō’ē mea hape.

I te toru o te mahana i muri a’e i tō Iesu pohera’a, ’ua ti’afa’ahou mai ’oia. ’Ua ora fa’ahou mai ā Iesu ! Nā roto i te reira, e ti’afa’ahou ato’a tātou. E nehenehe tātou e ora fa’ahou i te ao ra i muri a’e i tō tātou pohera’a.

I muri a’e i tōna ti’afa’ahoura’a ’ua fā atu Iesu i tāna mau pipi i Ierusalema ’e i te mau fenua Amerika. ’Ua ani ’oia i tāna mau ’Āpōsetolo ’ia tāmau noa i te ha’api’i i te ta’ata nō ni’a i tāna ’evanelia. E rave rahi ta’ata tei fa’aro’o i te mau ’Āpōsetolo, ’ua bāpetizohia rātou ’e ’ua tomo mai i roto i te ’Ēkālesia.

I muri a’e i te pohera’a te mau ’Āpōsetolo, ’ua ha’amata te ta’ata i te ha’amo’e i te tahi mau tuha’a faufa’a o te ’evanelia a Iesu. ’Ua fa’aea rātou i te ti’aturi ē, e fa’auru noa te Metua i te ao ra i tāna mau tamari’i i ni’a i te fenua nei i te mau taime ato’a. ’Ua mo’ehia ia rātou ē, e fāna’o te mau ta’ata ato’a i ni’a i te fenua nei ’ia bāpetizohia. ’Ua fa’aea rātou i te ti’aturi ē, e arata’i noa te mau peropheta ’e te mau ’āpōsetolo i te ’Ēkālesia i te mau taime ato’a.

’Ua ma’iri e rave rahi matahiti. I te pae hope’a, ’ua tae i te taime nō te fa’aho’i mai i te mau tuha’a o te ’evanelia a Iesu e ma’iri ra. ’Ua tae i te taime nō te fa’aho’i mai i tāna ’Ēkālesia ! ’Ua hina’aro te Metua i te ao ra i te hō’ē ta’ata ’ia riro ’ei peropheta ’e ’ia tauturu nō te fa’aho’i mai i te reira i te fenua nei. ’Ua mā’iti ’oia i te hō’ē tamaiti ’āpī tei pi’ihia o Iosepha Semita.

I te hō’ē mahana, tē tai’o ra ’o Iosepha i te Bibilia. I roto i te Iakobo 1 :5, tē parau ra ē, e pāhono te Metua i te ao ra i tā tātou mau uira’a mai te mea e ani tātou ma te fa’aro’o. E uira’a tā Iosepha ! ’Ua ’ite ’oia ē e rave rahi ’ēkālesia e ha’api’i ra nō ni’a ia Iesu. ’Ua hina’aro rā ’oia ’ia ’ite ē, tē vai ra ānei hō’ē mai te ’Ēkālesia a Iesu i roto i te Faufa’a ’Āpī.

I te hō’ē mahana nehenehe roa nō te pu’e tau fa’atupura’a rā’au piri atu i te pu’e tau Pāsa, ’ua haere atura ’o Iosepha i roto i te uru rā’au tāpiri mai i tōna fare. ’Ua tūturi ’oia i raro ’e ’ua ha’amata i te pure. I muri iho, ’ua fāri’i a’era ’o Iosepha i te hō’ē mana’o pōuri. Tē tāmata nei ’o Sātane e ha’aparuparu iāna. ’Ua tāmau noa rā ’o Iosepha i te pure ma tōna pūai ato’a.

I muri iho, ’ua pou mai ra te hō’ē māramarama nehenehe. ’Ua ’ite atu ’o Iosepha i te Metua i te ao ra ’e ia Iesu Mesia. ’Ua parauhia te reira te ’ōrama mātāmua. ’Ua parau mai rāua ē, ’aita te ’Ēkālesia a Iesu i ni’a i te fenua nei. Terā rā, e’ita e maoro e tae mai. Te ha’amatara’a teie o te fa’aho’i-fa’ahou-ra’a mai !

’Ua tono mai te Metua i te ao ra i te mau melahi nō te fa’aho’i mai i te mau tuha’a faufa’a o te ’evanelia. ’Ua hōro’a mai te melahi Moroni i te mau ’api auro ia Iosepha ra ’ia fāri’i tātou i te Buka a Moromona nō te tauturu ia tātou ’ia ha’api’i mai nō ni’a ia Iesu Mesia.

’Ua hōpoi mai ’o Ioane Bāpetizo i te autahu’ara’a a Aarona ’ia bāpetizohia tātou. ’Ua hōpoi mai ’o Petero, Iakobo ’e ’o Ioane i te autahu’ara’a a Melehizedeka ’ia fāri’i tātou i te Vārua Maita’i ’e ’ia fāri’i i te mau ha’amaita’ira’a ’ia ma’i-ana’e-hia tātou.

’Ua haere mai o Eliaha ’ia ti’a ia tātou ’ia tā’atihia i tō tātou mau ’utuāfare i roto i te hiero.

’Ua fa’ati’ahia te ’Ēkālesia a Iesu Mesia i te Feiā Mo’a i te mau Mahana Hope’a Nei. Tē aura’a ra, tei ni’a fa’ahou te ’Ēkālesia a Iesu i te fenua nei ! E tuha’a teie mau mea tā’āto’a nō te fa’aho’i-fa’ahou-ra’a mai.

Tē tupu noa nei ā te fa’aho’i-fa’ahou-ra’a mai o te ’evanelia i teie mahana. Tē fa’a’ite nei te mau peropheta, te mau ’āpōsetolo, te mau misiōnare ’e te mau melo i te parau ’āpī maita’i a Iesu Mesia ’ati a’e te ao nei. Tē patuhia nei te mau hiero i roto i te mau fenua e rave rahi ’ia ti’a ho’i i te ta’ata ’ia tā’atihia i tō rātou mau ’utuāfare e a muri noa atu. ’E tē tauturu nei te ’Ēkālesia i te ta’ata i te mau vāhi tē vai ra te feiā po’ia ’aore rā, te ’ati rahi.

E nehenehe te mau ta’ata ato’a e rave i te hō’ē mea nō te tauturu i te fa’aho’i-fa’ahou-ra’a mai. E nehenehe ’outou e tauturu nā roto i te ha’api’ira’a mai nō ni’a i tō ’outou ’ā’amu ’utuāfare ’e te ravera’a i te mau bāpetizora’a i te hiero. E nehenehe ’outou e hōro’a i te tuha’a ’ahuru nō te patu i te mau fare purera’a ’e te mau hiero. E nehenehe ’outou e hōro’a i te mau ō ha’apaera’a mā’a nō te tauturu i te mau ta’ata nava’i ’ore. E nehenehe ’outou e parau i te ta’ata nō ni’a ia Iesu Mesia.

’Ua hōro’a mai Iesu ia tātou i tāna ’Ēkālesia nō te tauturu ia tātou ’ia ho’i i tō tātou fare i te ao ra. E nehenehe tātou e rave i te ’ōro’a mo’a ’e e ha’amana’o i te mau taime ato’a i te mea tāna i rave nō tātou. E nehenehe tātou e fa’a’ite i te here ’ia vetahi ’ē, mai tāna i nā reira. E nehenehe tātou e tauturu i te mau ta’ata ato’a ’ia ha’api’i mai nō ni’a i te ’evanelia ! ●

Fa’ahōho’ara’a nā Apryl Stott