Hō’ē ’Ēkālesia nō Zulma
Tē vai ra paha te mau mea hau atu tā te Atua e hina’aro ’ia ’ite ’o Zulma.
« E ’imi, e ’itea ïa ia ’outou » (3 Nephi 14 :7).
’Ua pārahi ’o Zulma i ni’a i te hō’ē o te mau pārahira’a o te ’ēkālesia ’e ’ua ha’amanina i tōna ’ahu ha’api’ira’a. Tē ’ana’ana ra te hō’ē mōrī ’ū i ni’a i te hi’o ha’amāramarama, ’e te ti’a ra te hō’ē sātauro i mua i te fare pure. ’Ua haere ’o Zulma i te hō’ē fare ha’api’ira’a nā te ’ēkālesia, nō reira, ’ua haere ’oia i te mau purera’a e piti taime i te mahana ’e te tahi atu mau pīahi. ’Ua au roa ’o Zulma i tāna ’ēkālesia. ’Ua here ’oia ia Iesu ’e ’ua au ’oia ’ia ha’api’i mai nō ni’a iāna.
’Ua pārahi ’oia ma te māniania ’ore ’a ha’amata ai te tahu’a i te paraparau. Terā rā, i teie mahana, e mea ta’a ’ē ri’i. I terā iho taime, ’ua puta mai ra te hō’ē mana’o i roto i tōna ferurira’a ’e tōna ’ā’au : tē vai ra te parau mau hau atu i reira.
’Ua fa’atu’atu’a a’era ’o Zulma i tōna mata. Parau mau hau atu ? E aha te aura’a o te reira ?
’Ua tae fa’ahou mai ra te mana’o. Tē vai ra te parau mau hau atu.
’Ua tāpiri ’o Zulma i tōna nā mata ’e ’ua fa’atumu i ni’a i te ferurira’a tāna i fāri’i. E rave rahi mau mea tāna i ha’api’i i te purera’a. I teienei, tē uiui nei ’oia ē, ’aita ānei hō’ē mea e mo’e ra. E mau mea hau atu paha tā te Atua e hina’aro ’ia ’ite ’oia. Nāhea rā te reira e ’itehia ai iāna ?
I muri a’e, ’ua paraparau ’oia i tōna tua’ana, ’o Alberto, nō ni’a i tōna mau mana’o.
« Tē mana’o nei ’oe ē, tē vai ra te parau mau hau atu i reira ? » Te uira’a ïa a Alberto.
’Ua tā’iri’iri te upo’o ’o Zulma. « Tē hina’aro nei au e ha’api’i mai nō ni’a i te tahi atu mau ’ēkālesia », tāna ïa parau.
« OK », ’ua pāhono atu ’o Alberto. « E haere au nā muri ia ’oe » !
E rave rahi matahiti te maoro, ’ua haere ’o Zulma rāua ’o Alberto e māta’ita’i e rave rahi ’ēkālesia. I muri a’e i te hō’ē purera’a, ’ua parau ’o Alberto, « ’Ua ha’api’i terā ’ēkālesia i te mau mea maita’i. »
’Ua fāri’i ’o Zulma, terā rā, tē tāmau noa ra rātou i te feruri ē, tē mo’e ra hō’ē mea, nō reira, ’ua ’imi tāmau noa rātou.
I te hō’ē mahana, ’ua ta’uma ’o Alberto nā ni’a i te ’ē’a o tō rātou fare. « ’Ua ’itehia iā’u te ’ēkālesia tā tātou e ’imi nei ! » Te parau ïa a Alberto. ’Ua ’apa maita’i atura ’oia ia Zulma.
’Ua ’ara’ara te mata ’o Zulma. « I hea ? Nāhea ? »
« ’Ua fārerei tō’u hoa i te tahi mau misiōnare nō te ’Ēkālesia a Iesu Mesia i te Feiā Mo’a i te mau Mahana Hope’a nei », te parau ïa a Alberto. « ’Ua fa’aro’o vau ia rātou, ’e tē ti’aturi nei au i te mau mea tā rātou i ha’api’i ! »
E ’oa’oa rahi tō Zulma ’e tō Alberto, ’e ’ua ’ori atura rāua nā roto i te fare. I muri iho rā, ’ua fāri’i ’o Zulma i te mau parau ’āpī ’ino. ’Aita ’o māmā i hina’aro ’ia fārerei ’oia i te mau misiōnare. « 12 noa tō ’oe matahiti », te parau ïa a māmā. « E mea ’āpī roa ’oe. »
E mea pa’ari a’e ’o Alberto, nō reira, ’ua fāri’ihia ’oia ’ia fārerei noa i te mau misiōnare. Tau hepetoma i muri iho ’ua bāpetizohia ’oia.
’Ua tāmau noa ’o Zulma i te ani ia māmā ē, e nehenehe ānei te mau misiōnare e ha’api’i iāna. I te pae hope’a, ’ua parau ’o māmā ē, ’ē.
I te ha’api’ira’a te mau misiōnare ia Zulma, ’ua ’ite ’oia i te hō’ē māhanahana i roto i tōna ’ā’au. E mea fifi roa nā te hō’ē misiōnare ’ia paraparau pāniora, ’aita rā e fifi. Te vāhi faufa’a, te huru ïa ’o Zulma. I tōna ha’api’ira’a mai nō ni’a ia Iosepha Semita ’e te Buka a Moromona, ’ua ’ite ’oia ē, ’ua ’itehia iāna te parau mau tāna e ’imi noa ra !
’Ua hina’aro ’o Zulma ’ia bāpetizohia ’oia. Terā rā, e aha tā māmā e parau ? E ’oa’oa rahi tō Zulma i te paraura’a ’o māmā ē, ’ē ! I te mahana nō tōna bāpetizora’a, ’ua ’ō’omo ’o Zulma i te ’ahu ’uo’uo. ’Ua ’ite ’oia ē, ’ua here te Atua iāna. ’Ua ’ite ’oia ē, ’ua ’ite ’oia iāna. ’E ’ua ’ite ’oia ē, ’ua tauturu ’oia iāna ’ia ’ite i tāna ’Ēkālesia i fa’aho’ihia mai ! ●
Teie ’o Zulma ’ei tamāhine na’ina’i. I te pae atau ’o te hō’ē ïa hōho’a nōna i teie mahana ’e tāna tāne, o Elder Walter F. Gonzalez nō te Hitu ’Ahuru.
Fa’ahōho’ara’a nā Scott Wakefield