Nā te hō’ē manu na’ina’i i fa’aha’amana’o mai iā’u
Laura Linton
Utah, USA
Fa’ahōho’ara’a nā Carolyn Vibbert
E 26 matahiti tō’u ’a mo’e ai tā māua ’o tā’u tāne tamari’i mātāmua. ’Ua ’itehia ē, e māriri ’aita’ata tō Kennedy i roto i te roro, 13 ’āva’e noa tōna. I muri a’e e toru tāpūra’a, e pae haerera’a i ni’a i te mātini fa’a’āpī toto, (chimio) ’e e rave rahi rā’au ’e e rave rahi rapa’āura’a, ’ua pohe ’oia i roto i tō māua rima i te 20ra’a o tōna ’āva’e.
’Ua hope au i te māuiui i te mo’era’a tā’u tamāhine iti nehenehe, te māere ’e te pe’epe’e. Nō te aha te reira i tupu ai ? Nāhea vau e nehenehe ai e haere i mua ? E rave rahi tā’u uira’a, ’aita rā tā’u hō’ē a’e pāhonora’a. Tau mahana i muri a’e i te hunara’a, ’ua haere māua ’o tā’u tāne e hi’o i te vāhi hunara’a, tē vai noa ra ā te mau tiare nehenehe ’e te mau rīpene i ni’a iho mai te mahana hunara’a mai ā.
’A feruri noa ai au nō ni’a i tā’u tamāhine, ’ite atura vau i te hō’ē fanau’a manu, e mea ’āpī roa ā nō te rere, tē ou’au’a noa ra nā ni’a i te ’aihere. Fa’aha’amana’o mai nei teie manu iā’u ia Kennedy nō te mea e mea au nāna te ’ānimara. ’Ōu’a atura te manu i ni’a i te mēnema ’e ha’uti a’era nā roto i te mau rīpene ’e te mau tiare. ’Ua ’ata’ata vau, ma te ’ite ē, teie mau te mea tā Kennedy e hina’aro. I muri iho, ’ua ’ōu’a mai ra te manu iti i pīha’i iho iā’u. ’Aita vau i ha’uti noa a’e. ’Ua ’ōu’a mai ra te manu iti na’ina’i i pīha’i iho iā’u, ’ua turu’i mai i ni’a i tō’u ’āva’e, ’ua tāpiri i tōna nā mata, ’e e ta’oto atu ra.
’Aita tā’u e nehenehe e fa’ata’a i te mau mana’o tei tupu mai i roto iā’u i taua taime ra. Mai te huru ra ē, ’ua fāri’i au i te hō’ē tauahi nō roto mai i tā’u Kennedy. ’Aita e ti’a iā’u ’ia tāpe’a i tā’u tamāhine, teie rā manu iti na’ina’i—hō’ē teie mea i hāmanihia e tō tātou Metua i te ao ra—e nehenehe tāna e haere mai ’e e tu’u i tōna upo’o iti i ni’a iā’u, ma te fa’aha’amana’o mai iā’u ē, ’ua ta’a i te Metua i te ao ra i tō’u mauiui ’e e vai noa ’oia i reira nō te tāmāhanahana iā’u ’e nō te tauturu iā’u i roto i teie tāmatara’a.
’Ua parau o Elder David A. Bednar nō te pupu nō te Tino ’Ahuru ma Piti ’Āpōsetolo, « ’Ia ’ore ana’e te mau parau e hōro’a mai i te tāmāhanahanara’a o tā tātou e tītau… mai te mea e’ita te parau araro ’e te ferurira’a e nehenehe e auraro i te ’ite-māite-ra’a i te mau mea ti’a ’ore ’e te mau mea ’ino o te orara’a nei… e mai te mea ho’i ē, ’o tātou ri’i ana’e iho, ’oia mau, ’ua ha’amaita’ihia tātou i te aroha mau o te Fatu (« Te aroha mau o te Fatu », Liahona, Mē 2005, 100).
’Aita vau i fāri’i atura i te mau pāhonora’a ato’a i tā’u mau uira’a, terā rā, nā teie aroha mau i ha’apāpū iā’u ē, ’ua here te Metua i te ao ra ia māua o Kennedy ’e nā roto ho’i i te tusia tāra’ehara a tāna tamaiti, ’o Iesu Mesia, tē vai nei tō’u ti’aturira’a ē, ’o Kennedy, tā’u tāne ’e ’o vau, e ’āmui fa’ahou mātou ’ei hō’ē ’utuāfare i te hō’ē mahana.