Hau atu i te faufa’a rahi i te hō’ē fifi rima ’ārio

Sylvie Houmeau

Quebec, Canada

I te anira’ahia iā’u ’ia arata’i i te hō’ē ’āparaura’a i roto i te Sōtaiete Taututu nō ni’a i te anira’a a te Fa’aora ’ia fa’a’amu i tāna mau māmoe, ’ua fa’aoti a’era vau ē, mai te mea e hina’aro vau e fa’aitoito i te mau tuahine, e ti’a iā’u ’ia rave i te hō’ē ’ohipa nō te hō’ē o tāna mau māmoe.

’Ua ha’aputuputu vau i tō’u itoito ’e ’ua ani i te hō’ē tuahine paruparu ’ia haere mai nā muri iho iā’u i te hō’ē fa’a’oa’oara’a nā te Sōtaiete Tauturu. ’Ua fāri’i ’oia i tā’u anira’a ’e ’ua ’oa’oa roa māua. ’Ua feruri au ē, e hi’ora’a maita’i roa teie, ’e ’ua hina’aro roa vau e fa’a’ite i tō’u ’itera’a. Terā rā, e mau mea hau atu tā te Fatu i hina’aro ’ia ha’api’i mai iā’u.

I te hō’ē po’ipo’i ’a ’ō’omo ai au i tō’u ’ahu, ’ua ’ite a’era vau ē, ’aita e fifi rima ’ārio fa’ahou tō’u. ’Ua hōro’ahia mai teie fifi rima ’ei tao’a hōro’a nō te mahana fānaura’a ’a haere ai au i Farāni, nō reira, e aura’a ta’a ’ē tō te reira nō’u. ’Ua ha’amata vau i te ’imi i te reira i te mau vāhi e mea pāpū ē, tē vai ra i reira, ’aita rā i ’itehia. ’Ua parau a’era vau i roto iā’u iho ē, mai te mea ē, e pure au, e ’ite-’oi’oi-hia tō’u fifi rima.

’Ia oti tā’u pure, ’ua ’imi au i te mau vāhi ato’a. E piti mahana tō’u purera’a ma te ’ā’au tae ’e te hina’aro mau. ’Ua tāparu vau i te Metua i te ao ra ’ia tauturu mai iā’u ’ia ’itehia te reira, ’aita rā e rāve’a e ’itehia ai. ’Ua teimaha roa tō’u ’ā’au nō te mea e mea faufa’a roa teie fifi rima nō’u.

I te hō’ē pō, ’ua ’āpiti mai tā’u tamaiti iā’u nō te pure i pīha’i iho i tō’u ro’i. I muri a’e i tā māua pure, ’ua rave mai ra ’oia i te hō’ē mea ’e ’ua hōro’a mai ra iā’u ra. ’O tō’u ïa fifi rima ! ’Ua ’itehia iāna i raro a’e i te ro’i. ’Ua ma’irihia paha te reira i roto i tā’u ’imira’a. ’Ua ta’i au i te ’oa’oa nō te ’ite-fa’ahou-ra’a-hia mai te reira.

’Aita i maoro, ’ua puta mai ra te hō’ē mana’o i roto iā’u : « Tē pure tu’utu’u ’ore ra ānei ’oe nō tō ’oe mau tuahine i roto i te ’Ēkālesia ? ’Ua fāito ānei tō rātou faufa’a nō ’oe mai tō tō ’oe fifi rima ? E aha te parau nō tō ’oe mau tuahine i rāpae i te ’Ēkālesia ? Tē pure ato’a ānei ’oe nō rātou ? »

I tō’u fa’a’itera’a i tō’u ’itera’a i roto i te Sōtaiete Tauturu nō ni’a i tō’u fifi rima tei mo’e, ’ua tupu te hō’ē ’āparaura’a nehenehe roa. ’Ua parau vau i te mau tuahine ē, ’ua ha’api’i mai au ē, ’ia ani ana’e mai te Fa’aora ia tātou ’ia fa’a’amu i tāna mau māmoe, e ti’a ia tātou ’ia ha’amana’o ē, « e faufa’a rahi tō te mau vārua ta’ata i tō te Atu’a hi’ora’a mai » (Te Parau Ha’api’ira’a ’e te mau Parau Fafau 18 :10). Tē hina’aro nei ’oia ia tātou ’ia ha’amana’o i te feiā ’ati a’e ia tātou, ’e ’ia here, ’ia ’atu’atu, ’e ’ia pure ma tō tātou pūai ato’a nō rātou. ’Ia nā reira tātou, e ’ite tātou ē, e faufa’a rahi roa a’e tō te ta’ata hō’ē i tō te fifi rima ’ārio.