Mau uiraʼa ’e mau pāhonoraʼa

E aha tā ’outou e parau mai te mea ē, ’aita tō ’outou mau hoa e ti’aturi ē, e nehenehe te mau mea mai te ’ōrama mātāmua e tupu ?

Fa’ahotu i te fa’aro’o

I roto i te mau uira’a pae vārua, e ’ere te mana’o tumu ana’e tā tātou e hina’aro ; e hina’aro ato’a tātou i te fa’aro’o nō te ’ite ē, e nehenehe mau te ’ōrama mātāmua e tupu. E nehenehe tātou e fa’ahotu i te reira fa’aro’o nā roto i te anira’a i te Metua i te ao ra ’e te fa’aro’ora’a i te Vārua.

Katarina B., 17 matahiti, California, USA

Tuatāpapa i te Bibilia

’A ani i tō ’outou mau hoa ’ia tuatāpapa i te Bibilia. Mai te mea e ti’aturi rātou i te reira ’ei parau nā te Atua, e ti’aturi ïa rātou ē, e paraparau mai te Atua ia tātou i teie mahana nā roto i te mau ’ōrama mai te ’ōrama mātāmua, nō te mea ’ua nā reira ato’a ’oia i ni’a ia Adamu, ia Mose, ia Isaia, ’e i te tahi atu mau peropheta nā roto i te mau rāve’a rau.

Elder Muanda, 22 matahiti, misiōni nō Kenya Nairobi

’A Ani i te Atua

E ’ere nō te mea e rave rahi matahiti te vaira’a te tāivara’a, ’ua fa’a’ore ïa te Atua i tāna mau ’ōrama. Tītauhia ia tātou ’ia ha’eha’a te ’ā’au ’e ’ia ani i te Atua ma te hina’aro mau ’e te ’ā’au tae mau, mai tā Iosepha Semita i rave.

Jeremi E., 19 matahiti, Kinshasa, Democratic Republic of the Congo

Ti’aturi i te Atua

E ui au i tō’u mau hoa, « ti’aturi ānei ’oe i te Atua ? Ti’aturi ānei ’oe ē, ’ua hāmani ’oia i te mau mea ato’a ? Ti’aturi ānei ’oe ē, ’ua fā ’oia i te mau peropheta i tahito ra ? ’E mai te mea ē, tē ti’aturi ra ’oe, nō te aha ’aita ’oe e ti’aturi ra ē, e nehenehe ato’a te reira e tupu iteienei ? E nehenehe mau te reira e tupu. »

Sarah M., 16 matahiti, Utah, USA

Fa’a’ite i tō ’outou ’itera’a pāpū

E fa’a’ite au i tō’u ’itera’a pāpū i tō’u mau hoa ē, e heheu mai te Metua i te ao ra i te mau mea i tāna mau tamari’i mai te mea ē, e ani rātou ma te ’ā’au tae mau ’ia ’ite i te parau mau. Tē vai ra tō Iosepha Semita hina’aro ’ia ’ite i te parau mau, ’e ’ua rave ’oia mai te au i tōna fa’aro’o. E nehenehe ato’a ’outou e fāna’o i te hō’ē ’itera’a nehenehe mai te mea ē, e ani ’outou i te Metua i te ao ra nā roto i te pure ma tō ’outou ’ā’au ato’a.

Mara C., 20 matahiti, Lima, Peru

« Nā roto i te heheura’a a te ta’ata iho, e nehenehe ’outou e fāri’i i tō ’outou iho ’itera’a ē, te Buka a Moromona, ’o te parau ïa a te Atua, ’e e peropheta ’o Iosepha Semita, ’e nā te Fatu teie ’Ēkālesia. Ta’a ’ē noa atu tā verā mā e parau ’e e rave, ’aita e ta’ata e nehenehe e rave ’ē i te hō’ē ’itera’a nō ni’a i te parau mau i tu’uhia mai i roto i tō ’outou ’ā’au ’e tō ’outou ferurira’a nō ni’a i te parau mau. »

Peresideni Russell M. Nelson, « Heheura’a nō te ’Ēkālesia, heheura’a nō tō tātou orara’a », Liahona, Mē 2018, 95.

E aha tō ’oe manaʼo ?

« E ’ere i te mea ’ōhie ’ia ’āfaro vau ’e tō’u nā metua. Nāhea e ti’a ai iā’u ’ia ha’amaita’i i tō mātou auta’atira’a ? »

’A hāpono i tā ’outou pāhonora’a ’e, mai te mea e hina’aro ’outou, hō’ē hōho’a maita’i hou te 15 nō Mē 2020, i te liahona.ChurchofJesusChrist.org ’a pata « Submit an Article or Feedback »). ’Aore rā, ’a hāpono nā roto i te rata uira i tā ’outou pāhonora’a i te liahona.ChurchofJesusChrist.org.

E nehenehe te mau pāhonoraʼa e taui-ri’i-hia nō te roa ’e ’aore rā nō te māramarama. Te mau pāhonora’a i nene’ihia, nō te tauturu ïa ’e nō te hi’ora’a ātea, e ’ere rā i te mau fa’ahitira’a mana nō te ha’api’ira’a tumu a te ’Ēkālesia.

Hōho’a nā Guetty Images

• Nāhea Iosepha Semita i te ’īritira’a i te Buka a Moromona ?