’Ia ora na mai roto mai i te uru rā’au mo’a !

’Ia ora, ’o Margo ’e ’o Paolo māua.

I teie ’āva’e, nō te fa’ahanahana i te fa’aho’i-fa’ahou-ra’a mai, e māta’ita’i tātou i te vāhi ’a tupu ai te ’Ōrama Mātāmua a 200 matahiti i teienei !

I te 14ra’a o tōna matahiti, tē ora ra ’o Iosepha Semita i roto i te hō’ē fare rā’au i New York, USA. E pae taea’e tōna ’e e toru tuahine. E fa’aro’o ’oia i te parau a tōna nā metua ’e e mea hoa ’oia ia vetahi ’ē. ’Ua tai’o ’oia i te Bibilia ’e tōna ’utuāfare, ’aita rā rātou e haere i te hō’ē ā ’ēkālesia.

E ta’ata rave ’ohipa ’o Iosepha. ’Ua tauturu ’oia ’ia tāpū i te mau tumu rā’au ’ia nehenehe i tōna ’utuāfare ’ia tanu i te mā’a. ’Ua tauturu ato’a ’oia i tōna ’utuāfare ’ia ha’aputu i te tāpau o te mau tumu rā’au mapere (érable) nō te hāmani i te tihota.

’Ua hina’aro ’o Iosepha ’ia ’ite i te hō’ē ’ēkālesia mai tei roto i te Bibilia. I te hō’ē mahana, ’ua haere ’oia i roto i te hō’ē uru rā’au ’e ’ua pure. ’Ua fā mai te Metua i te ao ra ’e ’o Iesu iāna. ’Ua parau mai rāua iāna ē, ’ua fa’a’orehia tāna mau hara. ’Ua parau ato’a mai rāua ē, ’eiaha ’oia e ’āmui atu i te hō’ē noa a’e o te mau ’ēkālesia. E’ita e maoro e fa’aho’ihia mai te ’Ēkālesia a Iesu !

E rave rahi feiā pa’ari tei fa’a’o’o’o ia Iosepha nō te mau mea tāna i ’ite. ’Ua parau rātou ē, nāna noa te reira mau parau. Terā rā, ’ua tāmau noa ’o Iosepha i te parau i te parau mau. ’Ua parau ’oia, « ’ua pāpū te reira iā’u, ’e ’ua pāpū ato’a iā’u ē, ’ua ’ite te Atua i te reira, ’e ’aita e nehenehe iā’u ’ia huna i te reira » (Iosepha Semita—’Ā’amu 1 :25).

I teie mahana, e nehenehe te ta’ata e haere e māta’ita’i i te vāhi i reira Iosepha i te purera’a. E mea nehenehe roa ’e e mea hau.

’Ua ora teie mau tamari’i i te vāhi ’a pa’ari ai Iosepha Semita !

’Ua ’ite au ē, e vāhi ta’a ’ē te uru rā’au mo’a nō te mea ’ua pure Iosepha Semita ’e ’ua ’ite ’oia i te Metua i te ao ra ’e ia Iesu i reira.

Piper D., e 5 matahiti, New York, USA

Tē māuruuru nei au i te mea ē, tē ora nei mātou i pīha’i iho i te fare ’o Iosepha Semita. E mea au nā’u ’ia haere i te fare ’o Grandin ’e te mātini nene’i parau. E mea au mau nā’u ’ia ’ite i hea rātou i te tā’amura’a i te mau buka mātāmua o te Buka a Moromona.

Roscoe B., e 9 matahiti, New York, USA

Māuruuru nō te māta’ita’ira’a i te uru rā’au mo’a nā muri iho ia mātou. E fārerei fa’ahou tātou !

Te mau hōho’a o te mau tamaroa nā Julie Poulson ; Fa’ahōho’ara’a nā Katie McDee