Hō’ē taxi hō’ē tamari’i ha’api’i, ’e hō’ē pāhonora’a i te pure

Nā Sydney Chime Ihunwo

Tē ora nei te ta’ata pāpa’i i Rivers State, Nigeria.

’Ua fāri’i māua i te hō’ē muhumuhu ē, e ’itehia ’oia ia māua, nō reira, nō te aha ïa ’aita e haere ra ?

A Taxi, a Schoolboy, and an Answer to Prayer. Missionaries in Ghana with a schoolboy in a taxi outside.

I te hō’ē mahana ’ua hōro’ahia mai ia māua o tō’u hoa misiōnare i te i’oa nō te hō’ē ta’ata nō te ha’api’i, ’o tē ora ra i roto i te hō’ē mata’eina’a tei parauhia o Tema, i pīha’i iho i te ’oire nehenehe nō Accra, Ghana. E ’ere te nūmerara’a o te mau fare i te mea tano roa, nō reira, ’ua hōro’ahia mai te hō’ē fa’ata’ara’a pāpa’ihia nō te tauturu ia māua ’ia ’ite i te fare.

I tō māua taera’a i roto i te mata’eina’a, ’ua pe’e māua i te mau arata’ira’a, ’aita rā i ’itehia ia māua te reira ta’ata nō te mea, mai te mea ra ē, e rave rahi fare tei tū’ati i taua fa’ata’ara’a ra. Nō tō māua ta’a ’ore, ’ua fa’aoti a’era māua e pātōtō i ni’a i te mau ’ōpani nō te reira vāhi nō te ani, terā rā, mai te mea ra ē, ’aita hō’ē ta’ata i ’ite i te ta’ata tā māua e ’imi ra. ’Ua fāri’i au i te muhumuhu ’ia ani i te tauturu i te Metua i te ao ra.

I muri a’e i tā māua pure, ’ua puta mai te mana’o i roto iā’u ē, e ’itehia ia māua te ta’ata tā māua e ’imi ra, nō reira, ’ua fa’aitoito fa’ahou māua i te ’imi. ’Aita iho ā ’oia i ’itehia ia māua. ’Ua rohirohi māua, ’e ’ua fa’aoti māua e ho’i i roto i tā māua tuha’a fenua porora’a nō te mea tē vai atu ra ā te tahi mau fārereira’a tā māua. I tō māua taera’a i te vāhi tāpe’ara’a pere’o’o tārahu [taxi] ’ua ’ite a’era te ta’ata fa’ahoro pere’o’o tei ’āfa’i mai ia māua i roto i te reira mata’eina’a i tō māua hōho’a mata māuruuru ’ore ’e ’ua ani mai ra ē, ’ua ’itehia ānei ia māua te ta’ata tā māua e ’imi ra. Tā māua pāhonora’a, e ’aita iho ā ïa.

’Ua parau mai ra ’oia e haere māua i roto i te hō’ē fare ha’api’ira’a e vai ra i te hō’ē poro, ’e e ani i reira. ’Ua parau māua iāna ē, e ’ere te reira te fa’ata’ara’a tei hōro’ahia mai ia māua, terā rā ’ua onoono noa ’oia. ’Ua pou māua i rāpae i te pere’o’o ’e ’ua haere i te fare ha’api’ira’a—’eiaha nō te mea ē, ’ua feruri māua ē, e ’itehia ia māua te hō’ē ta’ata, nō te fa’a’ana’anatae noa rā i tō māua hoa.

’A ha’amata ai māua i te haere i te fare fa’aterera’a o te fare ha’api’ira’a, ’ua horo mai ra te hō’ē tamaiti iti ia māua ra. ’Ua ’ata’ata mai ra ’oia ’e ’ua parau mai ra ē, ’ōna ’e tōna taea’e o rāua ana’e te melo o te ’Ēkālesia a Iesu Mesia i te Feiā Mo’a i te mau Mahana Hope’a nei i taua vāhi ra, ’e e nehenehe tāna e tauturu ia māua.

’Ua hi’ohi’o a’era māua o tō’u hoa i te tahi ’e te tahi ma te ti’aturi ’ore. E temeio teie. ’Ua tauturu mai ra te tamaiti ia māua ’ia ’ite i te ta’ata tā māua e ’imi ra, ’e i te pae hope’a, ’ua fāri’i ’oia i te ’evanelia ’e ’ua bāpetizohia.

’Ua ha’api’i mai teie ’ohipa iā’u ē, e pāhono te Metua i te ao ra i te mau pure i tōna ra taime, ’e i tāna fa’anahora’a. Mai te mea ē, ’aita tātou e fāri’i ’oi’oi i te pāhonora’a i tā tātou mau pure, e nehenehe tātou e fa’a’ohipa i te fa’aro’o iāna ’e e ha’api’i ’ia fa’a’oroma’i.

Fa’ahōho’ara’a nā Corey Egbert