E maha hōho’a nō roto mai i te hepetoma Pāsa

« E ’ere i tō teie nei ao tō’u bāsileia » (Ioane 18:36).

Hei rā’au taratara

Hi’o Mataio 27:29 ; Mareko 15:17 ; Ioane 19:2.

’Ua tu’u te mau fa’ehau Roma i te hō’ē hei tātarāmoa i ni’a i te Fa’aora. « Penei a’e, teie ’ohipa ri’ari’a ’o te hō’ē ïa rāve’a ’ino nō te fa’ahōho’a i te tu’ura’a i te hei o te hō’ē ’ēmēpera i ni’a i tōna upo’o. ’Auē te ’oto o teie ’ohipa, i te mea ho’i ē, te tātarāmoa e tāpa’o ïa nō tō te Atua riri ’a ’anatema ai ’oia i te repo nō te maita’i ’o Adamu, ’ia fa’ahotu mai te reira i te tātarāmoa. Terā rā, nā roto i te tāmaura’a i te hei, ’ua taui ’o Iesu i te tātarāmoa ’ei tāpa’o nō tōna hanahana » (Peresideni James E. Faust, ’āmuira’a rahi nō ’Ēperēra 1991).

’Ahu vare’au

Hi’o Mataio 27:28 ; Mareko 15:17 ; Ioane 19:2.

Te vare’au ’o te hō’ē ïa ’ū ari’i, ’e nō te fa’a’o’o’o, ’ua tu’u te mau fa’ehau i teie ’ahu i ni’a ia Iesu Mesia nō te mea ’ua ti’aoro ’oia ē, e ari’i ’oia nō te ’āti Iuda. ’Oia mau, te ti’ara’a mau, ’ua hau atu ’oia i te reira—’o ’oia te « Ari’i o te hui ari’i, ’e te Fatu o te mau Fatu » (1 Timoteo 6:15 ; Apokalupo 19:16).

« E hou ’oia i te toto, nō tōna māuiui rahi » (Mosia 3:7).

Tāvirira’a ’olive

Hi’o Mataio 26:36 ; Mareko 14:32 ; Luka 22:39–40 ; Ioane 18:1.

« E fa’ahōho’ara’a māuiui mau i te mea ē, ’ua hou ’oia i te toto’ [Mosia 3:7] ’a māuiui ai Iesu i Gesetemane, i te vāhi nō te tāvirira’a ’olive. Nō te hāmani i te hinu ’ōlive i te ’anotau ’o te Fa’aora, e tāvirihia nā mua te mau ’ōlive ma te fa’a’ohura’a i te hō’ē ’ōfa’i rahi nā ni’a iho i te reira. E tu’uhia te ’ōlive perehu i roto i te mau fa’ari’i marū, ’e te ’ā’ano, ’e e ’āpapahia ai te tahi i ni’a i te tahi. Nā tō rātou teiaha e fa’atahe i te hinu mātāmua ’e te maita’i roa a’e. I muri iho e fa’autahia te hō’ē rā’au rahi i ni’a iho i te ’āpapara’a pūtē, nā te reira e hōro’a fa’ahou mai ā i te hinu. I te pae hope’a, nō te fa’atahe i te mau tōpata hope’a, e fa’autahia i te hō’ē pae o te rā’au te mau ’ōfa’i ’e nā te reira e tāumi rahi atu ā. ’E ’oia mau, e mea ’ute’ute toto te hinu mātāmua e tahe mai » (Elder D. Todd Christofferson, ’āmuira’a rahi nō Atopa 2016).

« ’Aore ’oia i’ō nei, ’ua ti’a ïa i ni’a » (Luka 24:6).

Mēnema ’aore e ta’ata

Hi’o Mataio 28:1– 8 ; Ioane 20:1–18.

« Te mēnema ’aore e ta’ata i taua po’ipo’i Pāsa mātāmua ra, ’o te pāhonora’a ïa i te uira’a a Ioba, ’ia pohe te ta’ata nei, e ora fa’ahou ānei » ? [Ioba 14:14]. ’Ei ia ’outou ato’a na e fa’aro’o mai nei i tō’ū reo, tē parau atu nei au ē, ’ia pohe te ta’ata nei, e ora fa’ahou ā ’oia. ’Ua ’ite tātou, nō te mea tei ia tātou te māramarama o te parau mau i heheuhia mai » (Peresideni Thomas S. Monson, « ’Ua ti’afa’ahou ! » ’Āmuira’a rahi nō ’Ēperēra 2010).

Fa’ahōho’ara’a o te hō’ē hei rā’au taratara nā Dilleen Marsh

Te Mesia ’E ’O Pilato, nā Marcus Vincent, fa’ati’ahia e Church History Museum

Hōho’a nō te TĀVIRIRA’A ’ōlive nō roto mai i te Getty Images