Ni’a noa i te rorouira : Feiā ’Āpī Pa’ari
Tē mana’o ra ānei ’outou ē e ’aita tā ’outou e ’ōpuara’a ’ei feiā ’āpī pa’ari ? ’A feruri fa’ahou
E riro paha te ferurira’a i ni’a i te arata’ira’a i te ’Ēkālesia i te hō’ē mahana i te fa’ataiā ri’i, tē vai nei rā te mau rāve’a nō te ha’amata i te arata’i i teienei.
I roto i te mau mahana hou te tae-piti-ra’a mai o Iesu Mesia, e tupu « te mau tama’i ’e te mau ro’o tama’i.
« … E ti’a mai ho’i te tahi nuna’a e aro mai i te tahi nuna’a, ’e te tahi bāsileia e aro mai i te tahi bāsileia ; e tupu mai te o’e ’e te ma’i rahi ’e te ’āueuera’a fenua i tera vāhi ’e tera vāhi.
« ’E ’oia ato’a, nō te mea e rahi te ’ino i te tupura’a, e riro te here o te ta’ata e rave rahi i te mōrohi ’ē atu » (Iosepha Semita—Mataio 1:28–30).
I rōpū i teie huru ’ārepurepura’a, ’o vai te tauturu i te fa’aho’ira’a mai i tō tātou mau taea’e ’e mau tuahine, i roto ānei ’e i rāpae i te nana, i tō tātou Metua i te ao ra ?
I reira tātou e haere mai ai.
Nāhea e ti’a ai ia tātou ’ia arata’i
’Ua pi’ihia tātou ’o te hō’ē o te mau u’i rahi roa a’e o te feiā ’āpī pa’ari. Tē fa’ata’a nei te peresideni Russell M. Nelson ia tātou mai te feiā « ’o tā te Atua i hōro’a i tōna ti’aturira’a nō te tono i te fenua nei i roto i te tau tu’ura’a rahi roa a’e nō te tua’ā’ai o teie nei ao » (« Ti’a ’ei feiā mileniuma mau », Liahona, ’Ātopa 2016, 46).
Nō reira, e nāhea e nehenehe ai ia tātou e tae i te fāito o tō tātou ’aravihi nō te riro ’ei feiā fa’atere rahi i roto i te ’Ēkālesia a te Fatu ? ’Oia mau, ’ia hi’o ’outou ’ati a’e ia ’outou, e ’ite mai paha ’outou ē ’ua riro a’ena ’outou ’ei feiā fa’atere nā roto i te hō’ē rāve’a ’aore rā te tahi atu huru.
E nehenehe ’outou e arata’i i roto i te hō’ē pi’ira’a o te ’Ēkālesia. ’Ei misiōnare, e nehenehe ’outou e arata’i i te hō’ē ’āparaura’a, e riro ’ei ha’apa’o i te ’ohipa porora’a ’evanelia, ’aore rā e riro ’ei taea’e fa’atere nō te ārea ’aore rā ’ei tuahine fa’atere. E nehenehe ’outou e riro ’ei arata’i i roto i tō ’outou ’utuāfare ’aore rā i rotopū i tō ’outou mau hoa. E nehenehe ’outou e arata’i i tō ’outou mau tupuna i te fa’aorara’a nā roto i te ’ohipa ’ā’amu ’utuāfare. E nehenehe ato’a ’outou e riro ’ei arata’i politita ’e e nehenehe ’outou e tāmau noa i te arata’i e rave rahi huru ’ohipa ’o tā ’outou i mā’iti.
Te uira’a rā teie ïa, nāhea tātou ’ia arata’i ? ’Ua arata’i te Fa’aora nā roto i tōna hi’ora’a. ’Ua arata’i ’oia ma te « Haere mai, ’a pe’e mai iā’u » ’eiaha rā « E mea maita’i a’e tō’u ’ē’a ». ’Ua tāvini ’oia, ’ua ha’api’i, ’ua here ’e ’ua aupuru i te feiā e ha’a’ati ra iāna. ’O Iesu Mesia te hi’ora’a hō’ē roa o te hō’ē feiā fa’atere. ’E nō te riro mai ’ei hō’ē u’i rahi feiā fa’atere, e nehenehe tātou e ha’amata ma te tītaura’a ’ia riro mai te Fa’aora te huru ’e te ravera’a i teie mau ’ohipa ri’i :
-
’Ia pure nō te feiā tei roto i te fifi, tē hina’aro nei i te tauturu ’aore rā te feiā ’o ’outou tei fa’ata’ahia e ha’apa’o ’e ’a ’imi ’ia ’ite mai e nāhea i te tauturu ia rātou. ’A pure nō rātou mā tō rātou i’oa tāta’itahi, hō’ē ā mai tā te Fa’aora i tāvini « ta’ihō’ē » (3 Nephi 11:15).
-
’A rave i te taime nō te ’imi tā’ā ’ē i roto i te mau pāpa’ira’a mo’a i te mau hi’ora’a maita’i o te feiā fa’atere, o te Fa’aora iho ā ra.
-
’A pure nō tā ’outou pāroita, tā ’outou titi ’e te feiā fa’atere rahi o te ’Ēkālesia. ’A pure ato’a nō te feiā fa’atere o te hau fenua, ’ia nehenehe ia rātou ’ia fa’auruhia ’e ’ia ’ohipa ma te vārua o te hau ’e te tāhō’ē.
-
’A ha’amatau mai i te feiā e ha’a’ati ra ia ’outou. ’A ’ite mai i tō rātou mau hia’ai, tō rātou ’utuāfare, tā rātou mau ha’api’ira’a ’e tō rātou mau hina’aro ’e te mau ’ana’anataera’a i roto i te orara’a (hi’o Ephesia 2:19).
-
’A tai’o i tō ’outou ha’amaita’ira’a patereareha ’e ’a feruri nāhea ’outou ’ia maita’i atu ā.
’A ha’a maita’i ai tātou mai tā tātou e nehenehe nō te arata’i nā roto i te parau-ti’a, e riro mai tātou ’ei mau pipi mau ’e ’ei mau pe’e nā Iesu Mesia ’e e fa’ati’a ia tātou nō te hoara’a atu i te Vārua Maita’i. ’A fafau ai ’e ’a ha’apa’o ai tātou i te mau fafaura’a mo’a, e ti’ara’a tō tātou ’ia fāri’i i te fa’aineinera’a ’e te ha’ana pae vārua e hina’arohia nō te haere e aro i te ’enemi.
E nehenehe ’outou e ha’amata i teienei.
E aha tō ’outou huru ’ia riro mai ’ei ta’ata fa’atere ? ’Aore rā, nō te fa’ahiti i te Fa’aora, « E aha tō ’outou huru [ta’ata fa’atere] e au ai ? ’Āmene, e parau atu vau ia ’outou, mai tō’u nei ïa » (3 Nephi 27:27).
Nō reira ’a ha’afātata ai tātou i te tae-piti-ra’a mai, e hina’aro te Fatu e rave rahi atu ā feiā fa’atere parau-ti’a ’o te pe’e i tāna peropheta ’e ’o te fa’aō atu i roto i teie arora’a. E hina’aro ’oia ia tātou. Tei roto tātou i te hora 11 ’e e mea rahi te ’ohipa e ti’a ia tātou e rave. E nehenehe tātou e ha’amata i te fa’aineine ia tātou nō te riro ’ei hō’ē u’i rahi feiā fa’atere i teienei. ’Aita i tāere roa nō te ha’amata. Mai te mea tē vai nei te mau mea e tītauhia ia ’outou ’ia paraparau i tō ’outou ’episekōpo, e nehenehe ’oia e tauturu ia ’outou i ni’a i te ’ē’a nō te tātarahapara’a. Mai te mea e hina’aro ’outou i te arata’ira’a nō ni’a i te ha’amaita’ira’a ia ’outou iho, ’a ha’amata i te ha’amaita’i i tō ’outou aura’a ’e te Metua i te Ao ra ’e ia Iesu Mesia ; e nehenehe rāua e fa’a’ite ia ’outou i hea e haere ai mai reira atu. ’Outou ’e ’o vau nei ’ua pi’ihia tātou i teienei ’ia rave i te ’ohipa a te Fatu ’e ’ia tauturu i tō tātou peropheta i te arata’ira’a i te ’utuāfare ʼo ’Īserāʼela i te ha’apūra’a, ’e mai te mea e tāmata noa tātou i te rave mai tā tātou e nehenehe, e manuia tātou.