E aha te aura’a o te Pāsa nō’u ?

30 nō Māti–12 nō ’Ēperēra Pāsa

I te Pāsa, tē fa’ahanahana nei tātou i « te mahana faufa’a roa a’e i roto i te ’ā’amu »¹—te Ti’a-fa’ahou-ra’a o tō tātou Fa’aora o Iesu Mesia. E ’ohipa tumu teie i roto i fa’anahora’a nō te ’oa’oa a te Metua i te ao ra.

I roto i te orara’a hou te tāhuti nei, ’ua mā’itihia Iesu ’ei Fa’aora nō tātou. ’Ua fafau mai ’oia ’ia hōro’a mai i te rāve’a ’ia fa’a’orehia tā tātou mau hara ’e ’ia ho’i atu i tō tātou fare i te ao ra.

I taua po’ipo’i Pāsa mātāmua ra, ’ua fa’atupu Iesu i tāna parau fafau. ’Ua upo’oti’a ’oia i ni’a i te pohe. Nō reira, ’o « ’oia te māramarama ’e te ora i te ao nei ; ’oia ïa, e māramarama mure ’ore, e ’ore roa e mohimohi ; ’oia ïa, te ora e ’ore e mure, ’aita atu e pohe fa’ahou. » (Mosia 16 :9).

E aha te mau ha’amaita’ira’a tā te ti’a-fa’ahou-ra’a i hōro’a mai ia ’outou ?

Tātarahapa

Tē ani mai nei Iesu Mesia ia tātou tāta’itahi, « E ’ore ānei ’outou e fāriu mai iā’u i teienei, e tātarahapa ho’i i tā ’outou mau hara, ’e e fa’aro’o mai, ’ia fa’aorahia ’outou e au ra ? ’Ua fafau mai ’oia ē, « ’o tē haere mai nei, ’o tā’u ïa e ’ite mai » (3 Nephi 9 :13–14). E aha tō ’outou huru ’ia tātarahapa ana’e ’outou ?

Ti’a-fa’ahou-ra’a

E’ita e nehenehe e ’ape i te pohe, terā rā, nā te rē a te Fa’aora i ni’a i te pohe e ha’apāpū ē, e ti’afa’ahou mai te mau ta’ata ato’a—e tū’ati-fa’ahou-hia te tino ’e te vārua i tōna ra huru mau (hi’o Alama 11 :43). Nāhea te ’itera’a i te parau nō te ti’a-fa’ahou-ra’a i te hōro’a mai ia ’outou i te ti’aturira’a ?

Ora mure ’ore

E fa’atupu te tāra’ehara a te Fa’aora i te ora mure ’ore ’aore rā, te fa’ateiteira’a. Nō te fāri’i i teie ha’amaita’ira’a, ’ia ha’apa’o tātou i te mau fa’auera’a e ti’a ai. ’Ua parau te Peresideni Russell M. Nelson i te ’ē’a e tae atu ai i te ora mure ’ore ra, « te ’ē’a nō te fafaura’a. »² E aha tei tītauhia ia tātou ’ia rave nō te pe’e i te ’ē’a e tae atu ai i te ora mure ’ore ra ?