300 Faifetautalai o le Taeao i PNK

Saunia e Elder Robert Gordon

Fitugafulu Eria

Sa ou i ai i Papua Niu Kini ia Setema 2019 ma molimauina se gaoioiga faafaifeautalai o se vaega o le “Konafesi o le Mo le Malosi o le Autalavou (MMA)”, na faia i Port Moresby.

I se tasi o taeao o le vaiaso na faapotopoto ai le 300 o talavou; na laei uma i laei lotu ma na faia ni pine le tumau faafaifeautalai. Na latou maua faatonuga mai faifeautalai faamisiona e uiga i le ala e talanoa ai i tagata ma amataina se talanoaga faaletalalelei. Na faalogo ma le toto’a le autalavou i le aoaoga ma le lauga mai le Peresitene o le Misiona, lea na valaaulia i latou uma e auauna atu i se misiona e gata i lena taeao.

Na otootoina le fuafuaga:

O le a vaevaeina le autalavou i ni vaega se tolu e taiselau.
O le a momoliina atu vaega taitasi i eria o faleoloa i le lotoifale.
E faia e i latou ni soa tailua pe taitolu ma taape atu e talanoa i tagata.
Na tuuina atu ia i latou se “tiutetauave” ia tofu ma se Tusi a Mamona e faasoa atu ma ia maua mai faamatalaga o tagata e fiafia mai e tuuina atu i faifeautalai faamisiona e tulitataoina.

Na taape ese atu ni pasi ua faatumulia i nei faifeautalai le tumau. Na matou malaga muamua atu faatasi ma Peresitene ma Tuafafine Hafoka o le Misiona a PNK Port Moresby. Na matou momoliina atu laulau na fuafua e faifeautalai faamisiona e faatulaga i se nofoaga autu i nofoaga taitasi e lagolago ai le autalavou.

Ona matou tietie lea taamilo i nofoaga taitasi e matamata i le gaoioiga. Na matou faamoemoe mo se aafiaga lelei ae na tau popole laitiiti pe o le a faapefea mai le fuafuaga. Na matou maua le avanoa e pasi faatolu ai i nofoaga taitasi.

I le nofoaga muamua na matou vaaia ai ua faatulagaina lelei lava e le autalavou i latou lava i ni soa ma ua taape solo atu. Na matou vaaia sa fiafia mai tagata ia i latou. Na mafaufau tagata po o le a le mea o loo tupu.

I le matou pasi atu faalua na matou iloa ai le tele o tagata ua taliaina se Tusi a Mamona. Na matou vaaia tagata o loo susue itulau o tusi i fale faatali pasi pe o loo nonofo i lalo i fafo o faleoloa ma faitau. Na matou vaaia se leoleo o loo savali ese mai ma uuina se kopi o le Tusi a Mamona. Na faateia i matou ma le fiafia i le foliga matagofie mai o le gaoioiga.

I le matou pasi atu lona tolu e toatele soa na amata ona toe foi atu i lo latou nofoaga e feiloai ai ma na matou tutū e talanoa atu i nisi o i latou. Na uma Tusi a nofoaga autu taitasi. Na amata e le autalavou ona tufa atu tamaitusi ma na matou vaaia le tele o tagata o i ai nei tamaitusi.

Na faamatala mai ma le fiafia e le autalavou ia i matou lo latou aafiaga. Ou te faamatalaina nei talanoaga laiti o ni “feiloaiga olioli” (Tagai Alema 27:16). O lenei aafiaga na faamanatu mai ia i matou le ala na faamatala ai e le Perofeta, o Russell M. Nelson a tatou talavou. Na ia saunoa mai:

“O outou o nisi ua silisili na auina mai e le Alii i lenei lalolagi. Ua ia te outou le malosi e sili atu ai le popoto ma atamamai ma tele atu le faatosinaga i le lalolagi nai lo se isi lava tupulaga muamua.”

O le lipoti faafuainumera o le gaoioiga na faaalia ai le 300 Tusi a Mamona na tuuina atu ma le 406 igoa mo faifeautalai—igoa ma faamatalaga e faafesootai ai tagata na naunau e fia faalogo atili—na maua mai. O ni numera ofoofogia nei numera, ae o numera e le ta’u maia le tala moni.

O le taimi lava na toe foi ai iā latou lava iunite na lipotia ai e le autalavou ma molimau atu faapea o le gaoioiga faafaifeautalai o le faatumutumuga lea o le latou konafesi. O le toatele na filifili faapea a oo mai le taimi, o le a latou naunau e avea ma ni faifeautalai faamisiona. O nei tagata talavou o le a avea ma taitai o le Ekalesia. Ua latou malamalama afai latou te faatinoina le faatuatua ma usiusitai o le a saunia e le Alii se ala mo i latou. E aunoa ma se masalosalo o nisi tagata o le a liua ona o le faafeiloaia i lena taeao. O le a faaopoopo atu i le sili atu o le liua o a matou faifeautalai o le taeao!

Na saunoa mai Peresitene Nelson faapea o le faapotopotoina o Isaraelu i itu uma o le veli o le galuega silisili lea i le lalolagi i le asō. Na ia aoao mai foi i lana asiasiga talu ai i Ausetalia faapea, “O le meafaigaluega o le a faataunuuina le faapotopotoina o Isaraelu o le Tusi a Mamona”.

Ou te lagonaina o le tiutetauave i le autalavou ia tuuina atu se Tusi a Mamona i le MMA na musuia. O le a tatou faia lava pea se galuega sili atu pe a tatou maua meafaigaluega sa’o. Ua ta’ua mai e le itulau ulutala o le Tusi a Mamona o se vaega o lona faamoemoega o le “faatalitonuina foi o Iutaia ma Nuuese, o IESU o le KERISO, o le ATUA FAAVAVAU, ua faaali mai o ia lava i atunuu uma”.

O le faaaogaina o le Tusi a Mamona o se meafaigaluega mo le faapotopotoina o le a faateleina ai lo tatou mafaia o ni paaga aoga i le “galuega sili” a le Alii. O lo tatou faamanuiaina e faalauteleina i le tele o lo tatou suesueina o le Tusi a Mamona. Manatua na folafola mai e Iosefa Samita, “O le Tusi a Mamona o le tusi lea e sili ona sa’o i le lalolagi, ma o le maa’au’au o lo tatou faatuatuaga, o le a sili atu le latalata o le tagata i le Atua i ona aoaoga, nai lo se isi lava tusi.”

Na saunoa mai Elder Kevin W. Pearson o le suesueina i aso uma ma mafaufau loloto i le Tusi a Mamona o le “ki i lo tatou laveaiina faaleagaga”.

Na saunoa Peresitene Nelson, ao lauga atu i le autalavou: “I la’u autalavou ofoofogia pele, na auina mai outou i le lalolagi i lenei taimi sa’o lava—lenei taimi e sili ona taua i le talafaasolopito o le lalolagi—e fesoasoani e faapotopoto Isaraelu . . . E leai se isi mea o loo tupu i lenei lalolagi i le taimi nei e sili atu le taua nai lo lena. . . . O le misiona lenei ua auina mai ai outou i le lalolagi.”

Ou te faafetai mo le autalavou i Port Moresby i lena aso. Na latou faataulai atu lo’u mafaufau i lo latou mafaia ma le malosiaga faapitoa. Na ou vaai foi i le ala e faaaoga ai le Tusi a Mamona mo le faapotopotoina o Isaraelu. O le meafaigaluega foi lea o le taimi lava tatou te “faapotopoto ai” o le a fesoasoani ia i tatou ia tumau ai le “faapotopotoina” ma fesoasoani ia i tatou ia avea ma ē “e faapotopotoina”.