Itulau i le lotoifale
Osia le Filemu i Maamaa Papae
Na oo atu le vevela o le aso i le tasi le tikeri i Majuro ao goto malie ifo le la, ae peitai sa malosi pea le vevela ma na malamalama lena afiafi o le Aso Lua aso 30 o Iulai 2019. Na potopoto filemu mai le au faanoanoa i talaane o le tuugamau sima na faatoa maea ona fausia mo Rayner Bill e 39 tausaga, lea na malemo faafuasei i ni nai aso talu ai . . . na maua lona tino maliu ua tafea ane i le matafaga.
Na ou lagonaina le faamamaluina ina ua tuuina mai e matua faanoanoa o Rayner, o Belita ma Watak Bill, ia te au, o se tagata ese, le faatagaga e pue ai ata o le falelauasiga faaMaresala ao ou aoao e uiga i la latou tu ma aganuu.
O tagata Maresala e talanoa filemu ma o se nuu e tumau i aganuu. Pe a maliu se tagata, e malaga atu se tagata o le aiga i se tasi o tagata e ona fanua o le nuu (o se Alap). E sailia le faatagaga e tanu ai se tagata maliu i luga o le fanua o le Alap . . . ma faatagaina . . . e masani lava i le mea o loo tanu ai isi tagata. E leai ni tupe e feaveaiina. E maua e le Alap le faamamaluina o le lauga atu i tagata faanoanoa i le falelauasiga ma faasoa atu ia i latou uiga ma mea lelei na faia e lē ua maliu.
I le tele o tausaga ua mavae, ina ua aumaia e afa malolosi ni galu tetele i le tamai nuu, na eliina maualalo e galu le oneone ma siitia ae i luga tuugamau mai o latou nofoaga ma auina atu i le sami. O lenei mea na ootia ai tagata o le motu, ma na filifili ai le malo e fausia ni taligalu e puipuia le toe tupu mai o lena mea.
O motu o le Atu Maresala e pe a ma le 1200 kilomita i matu o le ekueta ma i le tausaga atoa lava e fesuiai lava le vevela i se 2o—mai le 28o i le 30o. O Majuro o le laumua ma le aai e sili ona tēlē o le Atu Maresala; o le vaega e sili ona maualuga o le motu amu o Majuro e sili laitiiti lava ma le 3 mita (9 futu). E leai se eleele lelei i le motu; e tele lava i le matafaga oneone ma i nisi nofoaga, e i ai le fia afe o maa papae.
E faitau selau maamaa papae (e suitulaga i le mamā) e aoina mai ao lei faia le falelauasiga ma tuu i ato na lalagaina mai launiu. O maamaa e mo tagata faanoanoa, o se vaega o le sauniga, e faasalalau faataamilo i le tuugamau sima fou.
O lenei faatinoga faafaatusa e faaali atu ai i tagata uma ua auai i le falelauasiga, e faapea o soo se lagona le lelei na i ai i le va o lē ua maliu ma le tagata ua faasalalauina maamaa, ua le toe i ai. Ua faamagaloina mea uma—ua filemu loto uma—ma ua faaleleia atoatoa la latou sootaga.
Na o mai ni nai tagata ia te au e faamatala mai le taua o maamaa papae. E manino lava o se vaega taua o le sauniga. Na ou matuai ootia lava i le faatusa o maamaa papae ma le faaaloalo tele o i latou na faasalalauina na maamaa.
Mulimuli ane i lena po na ou mafaufau ai, ai se manaia pe a mafai ona ou ofoina atu ni maamaa papae faatusa i tagata taitasi na ou faatiga i ai, pe ma le manatu i ai pe leai. Ma—ai se manaia pe a mafai ona ou taliaina se maamaa paepae mai tagata taitasi na faatiga ia te au. Oka se filemu o le lalolagi o le a ou ola ai.
O lenei aafiaga atoa lava sa o se faamanatu matagofie ia te au ia ola i lo’u olaga e pei ona finagalo ai le Tama Faalelagi ma le Alii o Iesu Keriso ia ou faia—alofa i lo’u tuaoi e pei o a’u lava.