Itulau i le lotoifale
Ua Saunoa atu le Peresitene Aoao o le Peraimeri i le MA i Sineva
Ua auai Sister Jones i se faatasiga na lagolagoina e le UNICEF.
Na lauga atu Sister Joy D. Jones, le peresitene aoao o le Peraimeri o Le Ekalesia a Iesu Keriso o le Au Paia o Aso e Gata Ai, i se faatasiga faavaomalo a le Malo Aufaatasi i Sineva Suisilani.
“Ua ou matuai fiafia lava e auai e suitulaga i le Peraimeri, o se tasi o faalapotopotoga a tamaiti e sili ona telē i le lalolagi, ma talanoa atu e fai ma sui o Galuega Alofa a le Au Paia o Aso e Gata Ai,” na saunoa ai Sister Jones, lea na auai atu i se talanoaga i le Aso Tofi, 5 o Tesema, i se faatasiga na lagolagoina e le UNICEF i le Palais des Nations.
O isi lauga na aofia ai Henrietta Fore, le faatonu sili o le UNICEF; Manuel Fontaine, le faatonu o le UNICEF o galuega o faalavelave faafuasei; Sigrid Kaag, le minisita o Netalani mo fefaatauaiga i fafo ma le faalapotopotoga o atiina ae; ma Muzoon Almellehan, le Amapasa o Galuega Alofa a le UNICEF.
“I le avea ai o se faalapotopotoga e faavae i le faatuatua, matou te talitonu o tagata uma o fanau a le Atua, ma matou te ofoina atu le fesoasoani e tusa lava po o le a le lanu, talitonuga faalelotu, po o le atunuu,” na faamatala atu ai i le taimi o le talanoaga. “Matou te taliaina fiafia le galulue faatasi ma paaga i le salafa o le lalolagi e lagolagoina le faagasologa ma atinae mo tamaiti uma lava, ae maise lava i latou e leai ni aiga.”
Na faitauina talu ai nei e le The Norwegian Refugee Council e faapea e 63 miliona tamaiti i eria pagatia ua le mafai ona auai i aoga.
Na saunoa le taitai o le faatuatuaga o le lalolagi faapea o Galuega Alofa a le Au Paia o Aso e Gata Ai, le lima agaalofa o le Ekalesia, ua faipaaga ma le UNICEF “e fesoasoani i tamaiti ia maua le tomai ma avanoa i le olaga e manaomia e taofia ai le taamilosaga o le mativa, sauāina, puapuagatia, ma le matautia.”
O le tausaga talu ai, na faalautele ai e Galuega Alofa a le Au Paia o Aso e Gata Ai lana faigapaaga ma le UNICEF e fesoasoani i mana’oga o le atiina ae o tamaiti laiti ma manaoga o tamaiti faaleaoaoga ua faateleina e ala mai tulaga tau tagata sulufai i South Sudan, le Democratic Republic of Congo, Kenya ma Uganda.
O se taunuuga o faigapaaga, na lipotia ai e Sister Jones faapea ua silia ma le 36,000 tamaiti ua auai nei i gaoioiga o le atiina ae o tamaiti laiti. E faaopoopo i ai, e 10,000 matua ua mafai nei ona aumaia le atiina ae o tamaiti ma le faatinoga o le tausiga sili i o latou aiga.
Na faasalalauina le faatasiga i le polokalama o le UNICEF’s YouTube.