Vunautaka na Kosipeli ni Sautu
Sa noda na itavi tabu me da wasea na mana kei na sautu i Jisu Karisito vei ira kece era via rogoca.
Kemuni na taciqu kei na ganequ, au kidavaki kemuni ki na koniferedi raraba! Au a sa raica tiko mai na siga oqo ena nanamaki levu. Ia au sa masulaki ratou tiko ena veisiga. Au sa masuta tale tikoga me gauna ni veivakaukauwataki vakayalo na koniferedi oqo vei kemuni yadua.
Me tekivu mai na koniferedi sa oti, sa toso tikoga na dredre e vuravura. Se vakasosataka tikoga na noda bula na matetaka raraba e vuravura taucoko. Oqo sa mai vakila tu o vuravura na revurevu ni dua na ivalu ka vakatauca na rere ki na milioni na turaga, marama kei na gone ka sega nodra cala.
Era sa raica rawa mai na noda gauna o ira na parofita ni na yaco na ivalu kei na irogorogo ni valu, ena yavavala ko vuravura taucoko.1 Me vaka ni da dau vakamumuri i Jisu Karisito, eda vakamasuti ira na iliuliu ni veimatanitu me ra vakasaqara na iwali ni leqa ena sala e malu ka kauta mai na vakacegu. Keitou sa kerei ira na tamata kecega ena veivanua mera masulaki ira era vakaleqai tu, mera cakava na veika era rawata me vukei ira na vakaleqai, ka vakasaqara na veivuke ni Turaga ena kena mai muduki na veileti levu vakaoqo.
Kemuni na taciqu kei na ganequ, na kosipeli i Jisu Karisito e sa gadrevi vakalevu cake sara nikua mai na veigauna sa oti yani. Na veileti sa voroka na veika kece e dau tutaka ka vakavuvulitaka na iVakabula. Au lomana na Turaga ko Jisu Karisito ka vakadinadinataka ni Nona kosipeli sai koya na iwali tudei duadua ga ni bula sautu. Na Nona kosipeli na kosipeli ni sautu.2
Na Nona kosipeli sa isau duadua ga ni ra kidroa tu ena rere e lewe vuqa.3 Oqo e vakadeitaka na bibi ni nona ivakaro na Turaga vei iratou na nona tisaipeli me ratou “lako yani ki vuravura taucoko, ka vunautaka na itukutuku vinaka ki vei ira na tamata kecega.”4 Sa noda na itavi tabu me da wasea na mana kei na sautu i Jisu Karisito vei ira kece era via rogoca ka laiva na Kalou me qaqa duadua ena nodra bula.
Na tamata kecega era cakava na veiyalayalati kei na Kalou sa yalataka mera na dau kauwaitaki ira na tani ka qaravi ira era vakaleqai. Ka sa rawa ni da tuvakarau me da sauma ni tarogi na “inuinui sa tu vei [keda].”5 Sa tu na noda dui itavi yadua me da qarava ena vakasoqoni vata kei Isireli.
Nikua au vakadeitaka tale vakaukauwa na nona kerekere na Turaga, na cauravou bula kilikili ka tu vinaka tu nona bula yadua sara, me vakavakarau ka lako yani ki kaulotu. Vei ira na cauravou Yalododonu Edaidai, na veiqaravi vakadaukaulotu e itavi ni matabete. O kemuni na cauravou o ni a maroroi tu me baleta na gauna oqo ni sa vakayacori tiko kina na vakasoqoni vata kei Isireli sa yalataki tu. Ni ko ni laki kaulotu, ko ni sa vakaitavi tiko kina vakabibi ena cakacaka oqo!
Vei ira na yalewa gone ka tu vinaka na nodra bula, na kaulotu talega e dua na madigi qaqa, ia me da qai digitaka. Keimami lomani ira na yalewa daukaulotu ka kidavaki ira mai vuniyaloi keimami. Na veika o ni cau mai kina ki na cakacaka oqo e vakasakiti! Masu mo kila kevaka e vinakata na Turaga mo kaulotu, ka na vosa ki yalomu kei na nomu vakasama na Yalo Tabu.
Kemuni na itokani gone lomani, ko ni sa rui ka bibi sara vua na Turaga. A maroroi kemuni tu me yacova mai oqo, mo ni veivuke ena vakasoqoni vata kei Isireli. Na nomu lewa mo kaulotu, se veivakavulici se kaulotu cakacaka, ena vakalougatataki iko kei ira e vuqa tale. Keitou kidavaki ira talega na veiwatini tabaqase me ra veiqaravi kevaka e veiganiti na kedra ituvaki. Na nodra igu e sega ni vakaisosomitaki rawa.
Na daukaulotutaucoko e vakavuvulitaka na iVakabula ka vakadinainataka talega. Na butobuto vakayalo e vuravura sa vakavuna me gadrevi vakalevu cake kina na rarama i Jisu Karisito. Na tamata kece sara e dodonu me kila na kosipeli vakalesui mai i Jisu Karisito. Na tamata kece e dodonu me kila na vanua e rawa ni kunea kina na vakacegu sa “[uasivia na ka kecega e kilai rawa.”6
Me gauna ni vakacegu kei na kana maigiti vakayalo vei kemuni na koniferedi oqo. Mo ni vakasaqara ka ciqoma na ivakatakila ni tamata yadua ena veisoqoni oqo, au masuta ena yaca tabu i Jisu Karisito, emeni.