“Amy A. Wright,” Liaona, Me 2022.
Amy A. Wright
iMatai ni Daunivakasala ena Mataveiliutaki Raraba ni Lalai
E nanuma lesu o Sister Amy A. Wright e dua na bogi ena vica na yabaki sa oti ena gauna a qaravi tiko kina vakavuniwai ena itagede 4 ni kenisa ni kato ni gone. A mosi vakalevu sara o koya ka sa vakila oti tu mai. Dina ni tiko nona ivakadinadina ka vakabauta na Tamada Vakalomalagi, na iVakabula, kei na ituvatuva ni veivakabulai, e gadreva tu me vukei.
Ni se gonelailai, a vakavulici o Sister Wright mai vei tinana kei ira na iliuliu ni Lalai ni gauna e vakila kina na rere, galili, se gadreva tu na Yalotabu, e dodonu me lagata e dua na sere ni Lalai.
“Ia o ya me baleti ira na gone,” a vakasamataka oqo o koya. “Ena yaga dina beka vei au oqo?”
A qai yaco mai na kena isau—kei na sere.
“Au luve ni Kalou talega,” a nanuma lesu o Sister Wright. “Ia, ena noqu vakasama, au sa tekivu lagata, ‘Tamaqu Vakalomalagi, o tiko dina beka e kea?’1
“Au sa yaco sara ga e kea. Na veitiki kece ni kequ ituvaki a solegi ena loloma ni Kalou. Au a vakila e yagoqu, kau kurabui baleta niu sega ni vakila e dua tale na ka. Au kila ni a tiko ekea o Koya, ka kila vakavinaka tu o Koya na veika au lako curuma tiko, ni o Koya e dua na Kalou dauloloma.”
A sucu o Amy Eileen Anderson enai ka 6 ni Janueri, 1972, e Salt Lake City, Utah, Amerika, vei rau o Joy Bailey kei Robert Anderson. A vakamau kei James McConkie Wright enai ka 24 ni June, 1994, ena Valetabu e Salt Lake. E tolu na luvedrau tagane.
A tauri vola ena koroi ni bejala ni sains ena vakatorocaketaki ni kawatamata kei na vuli ni matavuvale mai na Univesiti kei Utah ena 1998. A cakacaka o koya ena tabacakacaka ni vakauitukutuku ni gonevuli ena Tabana ni Vuli e Marquette University ena gauna e vuli tiko kina o watina ena koronivuli ni bati.
A veiqaravi o Sister Wright vaka iKarua ni Daunivakasala ena Mataveiliutaki Raraba ni Lalai ena yabaki sa oti vakakina ena matabose raraba ni veivakasalataki raraba ni Goneyalewa me tolu na yabaki ni bera oya. Na veikacivi taumada eso a oka kina na peresitedi ni Lalai ena iteki kei na tabanalevu, daunivakasala ena mataveiliutaki ni iSoqosoqo ni Veivukei kei na Lalai ena tabanalevu, qasenivuli ni iSoqosoqo ni Veivukei, qasenivuli ni iVakavuvuli ni Kosipeli, ka iliuliu ni Cub Scout.