Susan H. Porter

Peresitedi Raraba ni Lalai

“E dua na ka e vakauqeti kina na noda vakasama ena yabaki sa oti, o ya e rawa vakacava ni da vaqaqacotaki ira vakayalo na gone?” e kaya o Sister Susan H. Porter. “Ni da veitalanoataka na vaqaqacotaki ni nodra vakabauta na itabatamata tubucake tiko mai, sa dodonu me tekivu ena Lalai.”

E raica o Sisita Porter na veivakalougatataki e yaco mai ena nodra papitaisotaki na gone ka ra vakaitavi vaka lewe ni Lotu ni veiyalayalati.

“E vakavuqa ni da dau cakava ka veiqaravi e vakalevutaki kina na noda ivakadinadina,” a vakamacalataka o koya. “E rawa ni ra vulica na gone me ra vakasaqara na veivakauqeti mai lomalagi.”

Ni bera ni kacivi me Peresitedi Raraba ni Lalai, a veiqaravi tu o Peresitedi Porter vaka iMatai ni Daunivakasala ena Mataveiliutaki Raraba ni Lalai me dua na yabaki.

E kaya o koya ni vuqa na gone era a sega ni rawa ni vakaitavi ena Lalai ena gauna ni matedewa na COVID-19. A raica talega, ka kila, na bolebole era sotava na marama sega ni vakawati. Na watina, o Elder Bruce D. Porter ena Vitusagavulu, a takali yani ena 2016.

“E a vuqa na Sigatabu au a sega ni taura na sakaramede,” a kaya o koya.

Ni wasea na veika a sotava, era tukuna vua eso tale na marama, “Ena vuku ni o veiqaravi tiko ena Lotu e solia vei au e dua na rai vinaka cake ni sa gadrevi au talega na Lotu.”

A sucu o Susan Elizabeth Holland Porter ena 31 ni Julai, 1955, mai Ponca City, Oklahoma e Amerika, vei rau o Hans J. kei Charlene Coleman Holland ka susugi cake mai New York, Amerika.

A vakamautaki Elder Porter enai ka 2 ni Feperueri, 1977 ena Valetabu e Washington D.C. Erau a susugi iratou cake na luvedrau e va ena tokalau kei Amerika, Jamani, kei Utah ka vakayacora na ilesilesi vaka-Lotu ena iWasewase na Tokalau kei Iurope.

E a qeretueti o Sister Porter ena koroi ni bejala ena kemisitiri mai na Univesiti na Brigham Young. Sa cakacaka oti vaka-ivukevuke ni vakadidike na Massachusetts Institute of Technology ka qasenivuli ni fika. A volodia talega ena vica na mataisoqosoqo ni itikotiko kei na veisoqosoqo vakamatanitu.

Sa veiqaravi oti o Sisita Porter ena matabose raraba ni veivakasalataki ni iSoqosoqo ni Veivukei, kei na nona veikacivi tale eso e liu e oka kina na daunivakasala ni mataveiliutaki ni iSoqosoqo ni Veivukei ena iteki, peresitedi ni iSoqosoqo ni Veivukei kei na Goneyalewa ena tabanalevu, qasenivuli ni iVunau ni Kosipeli, ka iliuliu ni sere ena Lalai.