Na Lotu e Vakarautaka na Veivuke, kei na Veivakacokotaki
E vuravura raraba, era sa vakaitavi tiko vagumatua na Yalododonu Edaidai ena sasaga ni veivakacokotaki vei ira na isenivalu. Mai Iurope, era sa veivuke tiko me vakarautaki na kakana, isulu, iyaya ni gone, vale, kei na vuqa tale mera vukei na vakaloloma. Se qai solia wale toka ga oqo na Lotu e $2 na milioni ena ilavo ni Amerika ki na Komisina Liu ni United Nations ni iSenivalu kei na dua tale na $2 na milioni ena ilavo ni Amerika ki na Parokaramu ni Kakana e Vuravura. Na cau oqo ena vukea na PKV me vakarautaka na kakana vei ira e rauta ni 11,000 na tamata me va na vula.
“Era tiko na lewenilotu era vakaleqai tiko ena veimatanitu taucoko,” a kaya o Sisita Sharon Eubank, na iMatai ni Daunivakasala ena Mataveiliutaki Raraba ni iSoqosoqo ni Veivukei ka peresitedi ni Yalododonu Edaidai Charities. Me vaka ni tiko na ilavo maroroi ni Lotu, sa rawa kina me vakarautaka taumada na kakana kei na wai me yaco rawa ki na veivakaleqai mai Ukraine, e kaya o koya, ka raica ni sa dei tiko na Lotu ki na nodra gagadre balavu na veimatanitu era sa vakaleqai tu.
Mai Paraguay kei Peru, a veivuke na ilavo ni Lotu me vakarautaka na iyaya ni veiqaravi vakavuniwai me baleta na valenibula, vakakina e Peru a solia na Lotu na iri ni cagi, cina, iyaya ni lomanivale, teveli, iyaya vakalivaliva, kei na vitu na kompiuta ki na veisoqosoqo era qaravi ira na gonelalai kei ira na qase, e dua na matabose ni veimatalotu, kei na dua nodra vale na goneyalewa. Mai Colombia, a vakayagataki na ilavo ni isolisoli ni lolo me vakarautaka e 1,200 na kato ni kakana kei na iyaya vei ira era gadreva tu na veivuke. E Panama, a solia na Lotu na iyaya vakamisini me vukea na kena maroroi na icula ni COVID-19.
O ira na tamata ena 10 na siti e Amerika era a sikova e dua na Light the World Giving Machine ena gauna ni Siganisucu ni 2021, ka ra solia vata kina e $5.8 na milioni ena ilavo ni Amerika. Na misini oqo ena vakatara vua e dua me volia na iyaya (me vaka na isulu, kakana, wai savasava, kei na manumanu) ka na qai veisoliyaki yani ki na 44 na isoqosoqo ni veivuke mai Amerika ka vakakina e lima na tabana lelevu e vuravura raraba.
A veivuke talega na Lotu vei ira a vakaleqai ena tonado ena ra e loma kei Amerika, e dua na cava ena Yatu Filipaini, kei na vakacaca ni volekano kei na ua loka mai Tonga.