“Elder James W. McConkie III,” Liaona, Me 2022.
Elder James W. McConkie III
Vitusagavulu Vakaitutu Raraba
Ni sa yaco yani o Elder James W. McConkie III ki Czechoslovakia ena 1990 vaka-daukaulotu cauravou, na matanitu o ya sa gole tani tiko mai na bula vakomunisi ka sa vakarau tekivu vakadikeva tale na veivunau vakalotu kei na vakabauta ni lotu. “Au a tiko ena vanua donu ena gauna donu kei ira na tamata dodonu,” e kaya o koya.
E muri a qai lesu tale ki na vanua o ya ena ilesilesi vakaparofesa ni se cauravou, tauyavutaka talega e dua na isoqosoqo tuvakai koya, oti a qai laki peresitedi ni Tabana ni Kaulotu na Czech/Slovak.
Ni sa yabaki 12, rau a sureti koya na nona itubutubu me vulica eso na ivola mai vei ira na iliuliu ni Lotu ka qai veivosakitaka na veika a wilika. “Erau vakabauta o tamaqu kei tinaqu na bibi ni nodrau vakavulici ira na luvedrau ena kosipeli, me vaka e vakaturi tiko ena Vunau kei na Veiyalayalati,” e kaya o Elder McConkie. “Na wase 68 e sureti ira na itubutubu me ra vakavulica vei ira na luvedra ‘na ivakavuvuli ni veivutuni’ kei na ‘vakabauti Karisito’ (tikina e 25). Erau a taura sara vakabibi na ka oqo na noqu itubutubu. ”
Na nona vakanamata ki na kaukauwa ni kosipeli me veisautaki ira na tamata a curuma vakatitobu sara na yalona. A raica na ka vata oqori a yaco vei ira na Yalododonu ena Czech Republic kei Slovakia.
A sucu o Elder James Wilson McConkie III e Salt Lake City, Utah, Amerika, ena 27 ni Okosita, 1971, vei James Wilson McConkie II kei Judith Miller McConkie. A vakamau kei Laurel Springer ena Julai ni 1995, ena Valetabu e Salt Lake. E va na luvedrau.
A tauri vola o Elder McConkie mai na Univesiti ni Utah ena koroi ni bejila ena itukutuku makawa ena 1995 ka rawata e dua na koroi ni lawa ena 1999 mai na National Law Center ena George Washington University. Dua na gauna sa oti a cakacaka vaka loya e Workman Nydegger ka dairekita ni Yavu ni Wallace Toronto, ka a veivuke me tauyavutaki.
A veiqaravi tiko vaka peresitedi ni iteki o Elder McConkie ena gauna a kacivi kina. A veiqaravi talega vakabisopi, lewe ni matabose e cake, daunivakasala ni matabisopi, iliuliu ni kaulotu ena tabanalevu, daunivakasala ena mataveiliutaki ni kuoramu ni italatala qase, qasenivuli ni vakavakarau ki na kaulotu, qasenivuli ni iVakavuvuli ni Kosipeli, ka peresitedi ni Cauravou ena tabanalevu.