Ia Keimami a Sega Ga ni Kauwaitaki Ira
Ena sala e tautauvata, na noda veiyalayalati kei na cakacaka vakalotu e dusimaki keda ka vukei keda me da dau nanuma tikoga na keda isema kei na Turaga o Jisu Karisito ni da toso voli ena sala ni veiyalayalati.
Na watiqu, o Susan, na luvei keirau tagane e lewe tolu kei na watidratou, o ira kece na makubui keirau, kei Elder Quentin L. Cook, na noqu itokani-vakaidabedabe ni voleka ni 15 na yabaki ena Kuoramu ni iApositolo Le Tinikarua, era na vakadinata kece ni’u sega ni dau lagasere vinaka. Ia dina ga ni sega noqu taledi vaka domonisere, au dau taleitaka me lagata na sere ni Veivakalesuimai. Na cokovata ni qaqana vakauqeti kei na ilagalaga vakaturaga e dau vukei au me vulica na ivakavuvuli yaga vakosipeli eso ka dau vakauqeta na yaloqu.
E dua na serenilotu ka sa vakalougatataka na noqu bula ena veisala uasivi eso oya na “Me da Sa Gu Tiko.” Au a vakasamataka tiko vakatitobu wale tikoga qo ka vulica tiko me baleta e dua na mala ni tiki vakatabakidua ni sere oya. “Eda sega ni muria tu na ca, na vosa tabu ga ni Turaga.”1
Eda sega ni muria.
Ni’u lagata na “Me da Sa Gu Tiko,” au dau nanumi ira wasoma na tamata ena raivotu i Liai ni ra sasaga tiko ki liu ena sala ka basika ki na vunikau ni bula ni ra sega walega ni “kubeta matua tiko”2 ia era “taura matua tiko ga na itautauri kaukamea, me yacova ni ra sa yaco yani ka cuva sobu ka kania na vuanikau.”3 A vakamacalataki ira na lewevuqa o Liai ena vale levu ka vakaitamera ni ra dusi koya mai “ena idusidusi ni veivakalialiai kei ira … sa kania tiko na vuanikau.”4 Na nona sauma lesu na veivakacacani kei na vosabeci oya e totoka vakaoti ka guiguilecavi dredre: “Ia eda sega ni muria.”5
Au masuta na Yalo Tabu me vakalougatataki ka vakararamataki keda yadua ni da navuca vata na sala me da rawa ni vaqaqacotaki ka “sega ni kauwaitaka” na veivakauqeti ca kei na domo veivakalialiai ni vuravura ni gauna oqo eda bula voli kina.
Sega ni Kauwaitaka
Na vosa na kauwaitaka kauwaitaka” e vakatututaka mo galeleta se vakarorogo kivua e dua se ki na dua na ka. Okoya gona, na qaqa ni sere “Me da Sa Gu Tiko” e vakadreti keda me da vakatulewa dodonu me da kua ni vakarorogo “tu [ki] na ca.” Ka vakaraitaka o Liai kei ira na tamata era tu vata kei koya era a kania tiko na vuanikau e dua na ivakaraitaki qaqa ni nodra sega ni vakarorogo ki na veivakalialiai kei na veibeci ka lako wasoma sara mai na vale levu ka vakaitamera oya.
Na ivunau i Karisito ni volai “ena Yalo ni Kalou bula … e na dela ni [yaloda] sa malumu”6 e toroya cake noda rawa ni “sega ni kauwaitaka” na veivakasesei, veivakalialiai, kei na veivagolei tani e vuqa ena noda vuravura lutu tani oqo. Me ivakaraitaki, na vakabauta e vakanamata kivua na Turaga o Jisu Karisito e viribaiti keda ena kaukauwa vakayalo. Na vakabauti ni Dauveivueti e sa dua na ivakavuvuli ni cakacaka kei na kaukauwa. Ni da cakacakataka me vaka na dina ni Nona kosipeli, eda na vakalougatataki ena rawaka vakayalo me da sasaga ki liu ena maliwa ni bolebole ni bula e vuravura ni da vakanamata tiko ena reki e solia wale tu vei keda na iVakabula. E dina sara, “ke da dina tu, eda sega ni rere, noda dauveivuke, sa volekati keda.”7
Veisemati Vakatamata Yadua ena Veiyalayalati
Na curumi ni veiyalayalati tabu kei na ciqomi ena bula kilikili ni cakacaka vakalotu ni matabete e vakaivuataki keda ka vauci keda kivua na Turaga o Jisu Karisito kei Tamada Vakalomalagi.8 Oqo e kena ibalebale ga ni da nuitaka na iVakabula me vaka noda Dautataro9ka Dauveivakaduavatataki10 ka vakararavi ena Nona cakacaka dodonu, loloma cecere, kei na loloma soli wale11 ena ilakolako ni bula. Ni da sa tudei ena lako mai vei Karisito ka vakaivuataki kei Koya, eda ciqoma na veivakalougatataki ni veivakasavasavataki, veivakabulai, kei na veivakaukauwataki ni Nona Veisorovaki tawayalani ka tawamudu.12
Na bulataki kei na lomani ni inaki dei ni veiyalayalati e bulia e dua na isema vata kei na Turaga e sa titobu sara vaka tamata yadua ka kaukauwa vakayalo. Ni da rokova na ivakarau eso ni veiyalayalati kei na cakacaka vakalotu tabu, eda toro yani vakamalua ka vakalevu ki Vua13 ka vakila na mana ni Nona ilesilesi vakalou kei na Nona bula dina tiko ena noda bula. Sa yaco kina o Jisu me cecere sara mai na iusutu ni itovo ni bula ena italanoa eso vaka ivolanikalou; na Nona ivakaraitaki kei na ivakavuvuli e vakauqeta noda vei gagadre, nanuma, kei na ivalavala kece sara.
Au sega dina sara ni rawata meu vakamacalataka vakavinaka na itovo matau kei na kaukauwa donu ni noda isema ni veiyalayalati kei na Luve ni Kalou bula vakaturicaketale. Ia au vakadinadinataka ni isema eso vata kei Koya kei Tamada Vakalomalagi e ka dina ka ra sa ivurevure cecere ni veivakadeitaki, vakacegu, reki, kei na kaukauwa vakayalo e rawa kina vei keda me da “tudei, veitalia ga na ca.”14 Vaka tisaipeli daucaka-veiyalayalati ka daumaroroi-veiyalayalati i Jisu Karisito, eda sa rawa ni vakalougatataki me da “qaqa, Jisu ga na nodai to”15 ka sega ni vakarorogo ki na veivakauqeti ca kei na veivakalialiai vakavuravura.
Ni’u dau sikovi ira na lewe ni Lotu wavokiti vuravura, au dau tarogi ira wasoma ena taro oqo: na cava e vukei iko mo dau “sega ni kauwaitaka” kina na veivakayarayarataki, veivakacacani, kei na veivakalialiai eso vakavuravura? Na nodra isaunitaro era sa ka ni vuli sara.
O ira na lewenilotu yaloqaqa era vakabibitaka wasoma na yaga ni sureta na kaukauwa ni Yalo Tabu ki na nodra bula ena vulici vakaibalebale ni ivolanikalou, masu vagumatua, kei na vakavakarau vinaka me vakaitavi ena cakacaka vakalotu ni sakaramede. A cavuti wasoma talega na veitokoni vakayalo ni lewe ni matavuvale yalodina kei na itokani nuitaki eso, na vei lesoni bibi a vulici ena veiqaravi kei na qaravi ni Lotu vakalesuimai ni Turaga, kei na rawaka me kilai kina na lala dina sara ni veika cava ga e tu se lako tiko mai na vale levu ka vakaitamera oya.
Au a raica rawa ena nodra isaunitaro na lewenilotu oqo e dua na ivakarau vakatabakidua e matalia sara. iMatai ka liu duadua, o ira na tisaipeli oqo e tudei sara na nodra ivakadinadina ni ituvatuva ni marau i Tamada Vakalomalagi kei na itavi i Jisu Karisito vaka noda iVakabula ka Dauveivueti. Ka ikarua, na nodra kilaka vakayalo kei na kila deivaki era sa vaka tamata yadua, vakaitaukei, ka vakatabakidua; era sega ni vakararaba ka vakavakasama. Au vakarogoci ira na yalo gugumatua oqo ni ra tukuna na veiyalayalati e dau vakarautaka na kaukauwa mera ulabaleta kina na veivorati kei na kedra isema kei na Turaga e bula tiko e dau tokoni ira tiko ena veigauna vinaka kei na ca. Kivei ira yadua oqo, o Jisu Karisito e sa dua dina na iVakabula vakatamata yadua.
Na veiyalayalati kei na cakacaka vakalotu ni kosipeli e dau cakacaka ena noda bula me vaka e dua na kabasi. Na kabasi e dua na iyaya e dau vakayagataki me dusimaka na itutu tudei ni vualiku, ceva, tokalau, kei na ra me baleta na inaki ni veitosoyaki kei na vakadeitaki ni ituvaki ni vanua. Ena sala e tautauvata, na noda veiyalayalati kei na cakacaka vakalotu e dusimaki keda ka vukei keda me da dau nanuma tikoga na keda isema kei na Turaga o Jisu Karisito ni da toso voli ena sala ni veiyalayalati.
Na veidusimaki tudei me baleti keda kece ena bula vakavuravura sa ikoya me da lako mai ka vakataucokotaki vei Karisito.16 Na veiyalayalati kei na cakacaka vakalotu tabu eso e vukei keda me tudei noda vakanamata kivua na iVakabula ka segata, ena Nona loloma soliwale,17 me da yaco me vakataki Koya vakalevu cake. E vakaidina sara, “na kaukauwa vuni curumi keda tu [ka] maroroi tikoga na dina.”18
Taura Matua Tiko na iTautauri Kaukamea
Na noda isema vakaveiyalayalati kei na Kalou kei Jisu Karisito sa ikoya na sala eda rawa ni ciqoma kina na rawa‑ka kei na kaukauwa me da “sega ni kauwaitaka.” Ka na vakaukauwataki na ivau oqo ni da taura matua tikoga na itautauri kaukamea. Ia me vaka ratou a taroga na taci Nifai, “A cava na ibalebale ni itautauri kaukamea ka raica o tamadatou … ?
“Ka … sa kaya vei iratou [o Nifai] ni sa ikoya na vosa ni Kalou; ia ko ira yadua sa rogoca na vosa ni Kalou, ka tautauri matua sara kina, ena sega ni rusa; ena sega talega ni rawai ira na veitemaki kei na gasau vidi waqa ni meca me vakamatabokotaki ira, ka kauti ira yani ki na veivakarusai.”19
Yalovinaka ka raica ni kena rawati me vorati na veitemaki kei na gasau vidi waqa ni meca e yalataki vei ira yadua era “taura matua” ka sega walega ni “kubeta matua” na vosa ni Kalou.
E taleitaki kina, na iApositolo o Joni ni a vakamacalataki Jisu Karisito me vaka na Vosa.20
“Ena ivakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa. …
“Sa cakava na ka kecega ko koya; a sa sega e dua na ka sa caka me sega ni cakava ko koya. …
“A sa yaco me tamata ko koya na Vosa, ka tiko vata kei keda, (ia keitou a raica na nona iukuuku, ni sa vaka na iukuuku ni Le dua bauga sa vakatuburi maivei Tamana,) sa sinai ena loloma kei na dina.”21
Okoya gona, e dua na yaca i Jisu Karisito sa ikoya “Na Vosa.”22
Me ikuri, na ikawalu ni Yavu ni Vakabautae tukuna, “Keimami vakabauta ni vosa ni Kalou na iVolatabukevaka e vakadewataki vakadodonu; keimami vakabauta talega ni vosa ni Kalou na iVola i Momani23
Okoya gona, na ivakavuvuli ni iVakabula, me vaka e volai ena iVolanikalou Tabu, era sa okati talega me vaka “na vosa.”
Meu vakatura mada ni tautauri matua ki na vosa ni Kalou e okata na (1) nanumi, rokovi, kei na vaqaqacotaki ni noda isema vakatamata yadua kei na iVakabula kei Tamana ena veiyalayalati kei na cakacaka vakalotu ni kosipeli vakalesuimai, kei na (2) na vakayagataki tudei ena masumasu kei na gugumatua ni ivolanikalou tabu kei na ivakavuvuli ni parofita kei na iapositolo bula vaka ivurevure dei ni dina vakatakilai mai. Ni da sa vauci ka “tautauri matua” kivua na Turaga ka da sa vakamataliataki mai na bulataki ni Nona ivunau,24 au yalataka ni da na vakalougatataki vaka yadudua ka vakalewelevu me da “tudei tu ena veivanua tabu, ka sega ni yavalati rawa.”25 Kevaka eda tu vei Karisito, o Koya ena qai tu ka lako vata kei keda.26 E vakaidina, “me vakauqeti keda ni siga ca, vakadeitaki ga na dina.”27
iVakadinadina
Toso tikoga. Taura matua. Sega Kakua ni kauwaitaka.
Au vakadinadinataka ni yalodina ki na veiyalayalati kei na cakacaka vakalotu ni kosipeli vakalesuimai ni iVakabula ena vukei keda me da toso tikoga ena cakacaka ni Turaga, me da taura matua na Vosa ni Kalou, ka me da sega ni kauwaitaka na veiveretaki ni vuni ca. Na iyaragi mo vakayagataka tu, me da taurivaka yadua e dua na seleiwau, na “seleiwau vakalou na dina,”28 ena yaca tabu ni Turaga o Jisu Karisito, emeni.