Era Veivaqaqacotaki ka Veiqaravi na Marama

Ena tabana ni vakaitukutuku raraba kei na tamata yadua, eratou tomana na Mataveiliutaki Raraba ni iSoqosoqo ni Veivukei na nodratou cakacaka me vaqaqacotaka na matavuvale kei na tamata yadua ka qaravi ira na luveni Kalou e vuravura raraba.

Ena Maji ni 2022, a vosa kina Jean B. Bingham me baleta nai ka 180 ni yabaki ivakananumi ni kena tauyavutaki ni iSoqosoqo ni Veivukei. Nikua, e kaya o koya, e vitu veimama na milioni na marama era vakaceguya na rarawa, vakabulai ni yalo, ka vakayacori na inaki vata ga a tauyavutaki kina na iSoqosoqo ni Veivukei ena 1842.

O Peresitedi Bingham kei Sisita Sharon Eubank, na iMatai ni Daunivakasala ena Mataveiliutaki Raraba ni iSoqosoqo ni Veivukei ka peresitedi ni Loloma ni Yalododonu Edaidai a sikova e vica na matanitu ena Tokalau e Loma . Mai Kairo, Ijipita, a kaya o Peresitedi Bingham ni a taleitaka sara na “loloma dina era a veilomani tiko kina na Yalododonu.” Erau a sikova talega o Peresitedi Bingham kei Sisita Eubank e dua na keba ni isenivalu e Kurdistan, ka veivuke kina na Lotu ena kena vakarautaki na veivakavaletaki.

O Sisita Reyna I. Aburto, na iKarua ni Daunivakasala, a sikovi Sipeni vata kei Sisita Michelle D. Craig, iMatai ni Daunivakasala ena Mataveiliutaki Raraba ni Goneyalewa. “Na vakacegu ni Kalou e vosota rawa ka ulabaleta na veika ca kecega e vuravura,” e kaya o Sisita Aburto ena dua na lotu me baleti ira na gonelalai kei na itabagone.

Ena tabana vakaitukutuku raraba, eratou a kacivaka kina na Mataveiliutaki Raraba ni iSoqosoqo ni Veivukei na itukutuku me baleta na kakana bulabula ni gone, na bula vinaka, kei na tiko bulabula, ena cakacaka vata kei na Welefea kei na Bula Rawati Koya ni Lotu me vakasavui rawa kina na itukutuku vei ira na itubutubu me baleta na yaga ni kena savati na liga, na wai ni gunu savasava, digidigi bulabula ni kakana, sucu na gone vei tinana, culai ena itatarovi, qaravi ni yago, kei na veisiko vakavuniwai.

Eratou sa vakayaloqaqataki ira talega na marama na mataveiliutaki me ra wasea na nodra nanuma me baleta na veika ena vakauqeti ira me ra vakaitavi vakataucoko cake ena iSoqosoqo ni Veivukei kei na sala me ra veiwasei ka veitokoni vakalevu cake kina na iSoqosoqo ni Veivukei.