Tracy Y. Browning

iKarua ni Daunivakasala ena Mataveiliutaki Raraba ni Lalai

A se qai yabaki 15 tiko o Tracy Y. Browning ena gauna a raica kina o tinana e dua na itukutuku ni vola i Momani ena dua na itukutuku vakalivaliva ena dua na bogi ena televiseni ka qai kerea e dua na kena ilavelave sega ni saumi.

Oti ga vakalailai, era a tukituki ena nona katuba na daukaulotu Yalododonu Edaidai, ka solia vua na iVola i Momani, ka tekivu vakavulica vua na kosipeli i Jisu Karisito.

Ena gauna oya, a vakaitikotiko o Tracy mai New Jersey, Amerika, kei tamana, ia e dau sikovi tinana vakawasoma e New York, Amerika. Ni veisiko tiko, a raica o Tracy ena lomatarotaro ni sa mua tiko o tinana me sa papitaiso.

O koya kei buna, a lewena o Tracy e dua na lotu Va-Karisito, ka vulica kina na yavu ni vakabauta Vakarisito. Sega ni dede sa tekivu lako o Tracy ki na sokalou ena Sigatabu ni Yalododonu Edaidai vata kei tinana.

A yaco mai na gauna mareqeti ni rau a lako vakaveitinani ena soqo ni Hill Cumorah Pageant. Ni tu ena Veikau Tabu, lako ki lotu, ka vakarorogo ki na itukutuku ni kosipeli ena sala vovou a tara sara na yalona. A tukuna vei tinana o Tracy ni sa vakarau me vulica vakalevu eso tale na ka me baleta na Lotu.

“Ni oti o ya a biuti au vakatotolo sara e matadrau na daukaulotu,” a kaya o Sister Browning.

A sucu o Tracy Yeulande Browning mai New Rochelle, New York, ena 9 ni Okotova, 1976, vei rau o Clive Adams kei Sharon Cox. A tubu cake mai Jamaica, New Jersey, kei New York. A vakamautaki Brady Browning ena Valetabu e Salt Lake enai ka 2 ni Me, 1997. E rua na luvedrau.

A vuli ena St. John Univesiti o Sister Browning. Sa cakacaka tiko o koya ena veiqaravi vakailavo me 15 na yabaki ka sa dairekita tiko ena Tabacakacaka ni Veiqaravi ni Tabaivola ni Lotu. A volodia talega o Sister Browning ena National Multiple Sclerosis Society, Habitat for Humanity, kei na Siga ni Veivukei ni Veikauwaitaki.

Sa veiqaravi oti o Sister Browning vakadaunivakasala ni mataveiliutaki ni iSoqosoqo ni Veivukei ena tabanalevu kei na iteki, vaka qasenivuli ni iSoqosoqo ni Veivukei kei na Matawilivola ni Sigatabu, vakakina ena isoqosoqo ni Goneyalewa. A veiqaravi tiko ena matabose raraba ni veivakasalataki ni iSoqosoqo ni Veivukei ena gauna a kacivi kina ki na Mataveiliutaki Raraba ni Lalai.