“Elder Mark D. Eddy,” Liaona, Me 2022.
Elder Mark D. Eddy
Vitusagavulu Vakaitutu Raraba
Ena vulaikatakata ni bera na yabaki ni vuli torocake nei Elder Mark D. Eddy ena koronivuli torocake, a sureti koya e dua na qasenivuli ni semineri kei ira tale eso na lewe ni matabose ni gonevuli ni semineri me wilika na iVola i Momani. A dau wilika vata vakavuqa kei na nona matavuvale, ia oqo me imatai ni nona gauna vakaikoya.
Sa nanuma me masu eliu ka ni sa wilika oti talega e veisiga. A nuitaka o koya ni na yaco mai e dua na kena macala matata me baleta na dina ni ivola ena loma ni dua se rua na macawa. Ni oti nona wiliwili ni sa sivi e rua na vula, se bera tikoga ni ciqoma na nona veivakadeitaki namaki.
Ni vo e vica na auwa me caka na lotu ni semineri ni “veikidavaki lesu” ka a kerei kina me wasea na nona ivakadinadina, a yaco totolo yani o Elder Eddy me veivuke ena vakavakarau. A qai raica e dua na vanua vakanomodi me wilika kina na iVola i Momani ka masu.
“Au a qai ciqoma e dua na yalo ni vakanananu matata tawacala oya ni dina na ivola,” e kaya o koya. “A yaco mai na gauna sara ga meu cavuta kina na noqu ivakadinadina ena yakavi o ya. Na yalo o ya a cakacakataki vakabibi me ciqomi rawa kina ka bulavoli vei au meu kua ni guilecava kina. ”
A sucu o Elder Mark David Eddy mai Long Beach, California, Amerika, ena 30 ni Maji, 1973, vei rau o Richard Cleighton Eddy kei Mary Louise Savage Eddy. A tubu cake mai Orem, Utah, ka vakamau kei Annette “Annie” Allen ena Valetabu e Provo Utah ena Okosita 1994. E ono na luvedrau.
A taurivola o Elder Eddy mai na Brigham Young University ena 1996 ena dua na koroi ni bejila ni veitaratara ka ciqoma e dua na diqiri ni Juris Doctor mai BYU ena 2001. Me tekivu mai na gauna a cakacaka kina vakaloya ka daunibisinisi veiliutaki.
Sa veiqaravi oti o Elder Eddy vaka-Vitusagavulu ni iWasewase, peresitedi ni Tabana ni Kaulotu na Uruguay Montevideo, daunivakasala ena mataveiliutaki ni iteki, bisopi, lewe ni matabose e cake, daunivakasala ena matabisopi, peresitedi ni Cauravou ena tabanalevu, ka daukaulotu tudei ena Tabana ni Kaulotu na Dominican Republic Santo Domingo East.