Veika Vakasakiti mai nai ka 192 ni Koniferedi Raraba Vakayabaki

Sa dua dina na veivakalougatataki cecere oqo ena veigauna veibolei oqo me da ciqoma kina na veidusimaki kei na ivakasala mai vua na Turaga o Jisu Karisito, e liutaka tiko na Nona Lotu vakalesuimai vei ira na parofita kei na iapositolo bula.

Ena gauna ni koniferedi raraba, a veisureti kina vakavica na Turaga mai vua na Nona parofita, o Peresitedi Russell M. Nelson. Oqo eso vei ira:

1. Wasea na Kaukauwa kei na Vakacegu i Jisu Karisito

A veivakananumi o Peresitedi Nelson vei keda na lewenilotu me baleta na noda “itavi tabu me da wasea na kaukauwa kei na vakacegu i Jisu Karisito vei ira kece era na via rogoca.” Ena gauna veibolei oqo, “na tamata kece e dodonu me kila na vanua e rawa ni kunea kina na inuinui kei na vakacegu sa ‘[uasivia na ka kecega e kilai rawa’ [Filipai 4:7].”

Me wiliki na kaci nei Peresitedi Nelson vei ira yadua na cauravou bula kilikili ka rawata me ra vakavakarau ka laki kaulotu, raica na “Vunautaka na Kosipeli ni Vakacegu” ena tabana e 6.

2. Tara Cake na iGu Dodonu Vakayalo

E vakatavulica o Peresitedi Nelson, “Eda se bera mada vakadua meda gadreva cake vakalevu na igu dodonu vakayalo me vaka ena gauna oqo, meda vorata rawa na totolo sa toro cake tiko kina na meca kei na ivakatakilakila butobuto ni gauna.”

Vakaraica e lima na veisureti vakatabakidua mai vei Peresitedi Nelson me vakalevutaka na noda igu vakayalo e “Na Kaukauwa ni iGu Vakayalo” ena tabana e 97.

3. Digitaka Mo Vakayagataka Vakacava na Nomu Gauna

E vakamacalataka o Peresitedi Nelson ni tiko eso na ka ena taudaku ni noda vakatulewa. “Ia e tiko eso na ka eda rawa ni vakatulewataka,” e kaya o koya, “oka kina na noda vakayagataka noda gauna.”

Wilika na veisureti nei Peresitedi Nelson meda vakayagataka na gauna meda vakanamata ki na veivakalougatataki ni valetabu ena “Ia Oqo na Gauna” ena tabana e 126.

Ni ko vulica ka cakacakataka na veisureti oqo, keitou sureti kemuni mo ni vakasamataka mo wasea na veika o sotava kei ira eso ena Liaona.