Veiqaravi nei Peresitedi Nelson

Ni vakayagataki na kakaburaki ni lotu kei na vakauitukutuku raraba, sa dau sureta tikoga o Peresitedi Russell M. Nelson me sureti ira na tamata kecega me ra lako mai vei Karisito ka vuli mai Vua.

Ena dua na kakaburaki ni lotu, a vakayaloqaqataki ira na lewe ni Lotu o Peresitedi Nelson mai Oklahoma kei Kansas, Amerika, me ra vakanamata ki na “dua na isolisoli cecere duadua sa solia vei keda na Tamada Vakalomalagi meda vakausututaka na noda bula Vua kei na Luvena Daulomani,” a kaya o koya. “Au tukuna tiko oqo na iVola i Momani. Sa isolisoli kivei keda mai vua na Kalou. Sai koya na vatuivakadei ni noda lotu baleta ni tu kina na uto, na usutu ni Nona ivunau.”

Ni vosa tiko vei ira na lewenilotu mai California, Amerika, ena dua tale na kakaburaki, a veisureti kina o Peresitedi Nelson: (1) vakasaqara na dina ena masu, vakasaqaqara ena ivolanikalou, ka vulica na nodra vosa na parofita, daurairai, ka dauvakatakila; (2) vakalevutaka cake na kaukauwa vakayalo kei na kila na duidui ena vakayacori ni veiyalayalati vata kei na Kalou ka maroroya; kei na (3) taura e dua na itavi bulabula me vukea na nodra vakasoqoni vata na Isireli.

Ena dua na kakaburaki ki na 48 na matanitu, a vakananumi ira kina na Yalododonu mai Iurope o Peresitedi Nelson: “E vuqa vei ira na nomuni itokani era segata tiko me ra kila na vuna era mai tiko kina e vuravura. Era vinakata me ra kila kevaka e vakaibalebale ka vakainaki na bula. Era vinakata me ra vakayaco veisau e vuravura. Era vakataroga se o cei e rawa ni ra vakararavi kina. O sa kila tiko beka ni sa tiko vei iko na isaunitaro era vakasaqara tiko na itokani oqori?”

Ena tabana vakaitukutuku raraba, a sureti keda o Peresitedi Nelson me da kakua walega ni vakila na vakavinavinaka ia me da vakaraitaka. A sureti keda meda vakarautaka e lomada e dua na rumu kivei ira “era sasaga dredre tiko mera raica na rarama ni iVakabula ka vakila na Nona loloma.” A vakayaloqaqataki keda me da “cakacaka vata me da veiliutaki ena kena biu laivi na ivakarau kei na ivalavala ni veivakacacani.” Ka vakadinadinataka o koya ni “tiko e dua na ivurevure eda rawa ni goleva taucoko me vakatorocaketaka na loloma eda vakila me baleti ira na tani se me vakavinakataka na yaloda ni ra sa kavoro—na iVakabula o Jisu Karisito.”