“Elder Isaac K. Morrison,” Liaona, Me 2022.
Elder Isaac K. Morrison
Vitusagavulu Vakaitutu Raraba
E kaya o Elder Isaac K. Morrison ni o koya kei watina rau a moce ga vakalailai mai na gauna a kacivi koya kina o Peresitedi Russell M. Nelson me laki veiqaravi vaka Vakaitutu Raraba ena Vitusagavulu.
“Keirau a kila ni oqo ena dua na ilakolako balavu vei keirau,” a kaya okoya. “Eda na vakararavi vua na Turaga me vakaraitaka vei keda na ka meda cakava.”
A kacivi o Elder Morrison me peresitedi ni iteki ena 2014, Vitusagavulu ni iWasewase ena 2018, ka peresitedi ni Tabana ni Kaulotu na Ghana Cape Coast ena 2020.
“Na veilesilesi kece e dau yaco mai ena gauna au a sega tu kina ni namaka,” a kaya okoya. “Ia au sa vakararavi ga vua na Turaga ka sega ena noqu kaukauwa.”
E taura tu o Elder Morrison e dua na koroi ni vuku ni sainisi ni veiliutaki ena ituvatuva kei na veiliutaki mai na Kwame Nkrumah University ni Science kei na Tekinoloji mai Ghana. Sa cakacaka oti o koya ena vuqa na ilesilesi ena Lotu vakatekivu mai na 2004, ka wale toka ga oqo a iliuliu ka manidia veitokoni ni lewenilotu ki na Ra kei Aferika.
A sucu o Isaac Kofi Morrison enai ka 25 ni Noveba, 1977, mai Takoradi, Ghana, kivei Joseph Kojo Morrison kei Mary Efua Obua Sarfo.
Ni se gone, eratou dau gole o Elder Morrison kei na nona matavuvale ena soqoni ni lotu ni dua tale na matalotu. Ni sa toki yani vata kei iratou na matavuvale nei nona momo me ratou vuli ena koronivuli torocake, a dau lakova na soqoni ni Yalododonu Edaidai vata kei iratou kei na soqoni ena gauna oya ena nona lotu. A sureti koya e dua na qasenivuli ni semineri ni mataka lailai me lewena na semineri, ka laki sota kina kei Hannah Nyarko.
“A goneyalewa kila-ka sara o koya ka dau soli vakasama cecere sara,” e kaya o koya. “E solia sara ga vei au na igu meu vuli vakalevu cake.” Niu sa vulica oti na iVola i Momani ena yabaki oya, a kaya, “Au sa vakarau tu meu na papitaiso.”
Enai ka 18 ni Tiseba, 2004, rau a vakamau kei Ana e Takoradi ka rau a vauci ni oti e tolu na siga ena Valetabu e Accra Ghana. E tolu na luvedrau tagane.
Me ikuri ni nona veikacivi tale eso, sa veiqaravi oti o Elder Morrison vakadaunivakasala ni mataveiliutaki ni iteki, bisopi, daunivakasala ena matabisopi, peresitedi ni kuoramu ni italatala qase, qasenivuli ni iVakavuvuli ni Kosipeli, qasenivuli ni semineri, ka daukaulotu tudei e Nigeria.