“Elder Denelson Silva,” Liaona, Me 2022.
Elder Denelson Silva
Vitusagavulu Vakaitutu Raraba
Na 4,000 na maile (6,400 km) ni lesu mai ena ilakolako mai Luanda, Aqola ki São Paulo, Brazil, a solia vei Elder Denelson Silva kei na watina, o Regina, na gauna me rau vakasamataka kina e dua na veivakauqeti. Ni oti na nona veiqaravi vakaperesitedi ni kaulotu, a vakila o Elder Silva ni sega ni dodonu me rau volia kei na watina e dua na vale.
Rau a volitaka na nodrau itikotiko ni bera ni rau lako ki kaulotu. Rau a nakita me rau volia e dua na itikotiko vou ena nodrau lesu mai ia erau vakauqeti me rau wawa. “Na veivale mai Brazil e sega ni dua na iyaya mo na volitaka ka qai voli vakatotolo,” a kaya o Elder Silva. “E rawa ni taura e vica na siga se vula se yabaki.”
E kaya o Sisita Silva ni rau vakanamata tiko ki na nona dusimaki rau na Tamada Vakalomalagi ni bera na nodrau kaulotu ka na dusimaki rau tale o Koya. “Keirau sa navuca vata me keirau waraka na kena gauna,” a kaya o koya. Erau a digitaka me rau redetaka e dua na vale.
Me vaka na volitaki ni dua na vale mai Brazil, na kena macala e sega ni yaco mai ena vica na siga se vula se dua mada ga na yabaki. A yaco mai na kena macala ni oti e rua na yabaki ena gauna e ciqoma kina o Elder Silva e dua na veikacivi me veiqaravi vaka Vakaitutu Raraba ena Vitusagavulu.
“E dodonu me tiko vei keda na vakasama ni kevaka e kerea o Koya meda cakava e dua na ka, na noda isaunitaro ena dau io,” e kaya o Elder Silva. “Kevaka ena sega ni dau saumi mai ena ‘io,’ ena dau yaco sara me ‘sega’ se ‘rairai beka.’” Ia, me baleta na iVakabula, e vakamacalataka o koya, “a sa sega na tikina ena vuku ni ‘sega’ se ‘rairai beka’ e Kecisemani.”
A sucu o Denelson Urbano da Silva enai ka 4 ni Julai, 1965, mai Recife, Brazil, vei rau o Domingos Urbano da Silva kei Maria José de Almeida Silva. A tubu cake e Recife ka vauci vei Regina Maria de Carvalho Silva ena Valetabu e São Paulo Brazil ena Me ni 1987. E rua na luvedrau tagane.
E tiko vua e dua na koroi ni bejala ena veiliutaki vakabisinisi (cakacakataki ni itukutuku). A cakacaka ena veikabani ni veilakoyaki me 30 na yabaki.
Mai na 2016 ki na 2019, a veiqaravi vaka peresitedi ni kaulotu o Elder Silva kei na watina ena Tabana ni Kaulotu na Angola Luanda. Sa veiqaravi oti talega vaka Vitusagavulu ni iWasewase, peresitedi ni iteki, bisopi, lewe ni matabose e cake, ka daukaulotu tudei ena Tabana ni Kaulotu e Brazil Curitiba.