Na Kemu iVakatakilakila Vakalou kei na Nomu iCavacava Tawamudu
Au sureti kemuni mo ni cakava me itakele ni nomuni bula o Jisu Karisito ka nanuma na yavu dina eso ena iToko ni Goneyalewa.
Kemuni na ganequ, vinaka vakalevu na nomuni yaco rawa mai. E ka dokai vei au meu vakaitavi ena soqoni oqo ni marama ena koniferedi raraba. Ena so na gauna au marau ni rawa meu tiko ena kalasi ni Goneyalewa. Ia meu dusia mada eso na veika eda kila kece vakamatata—au sega ni gone, kau sega talega ni marama! Ia au vulica, niu sega soti sara niu vulagi kevaka au rawa ni cavuqaqataka vata kei ira na goneyalewa na iToko ni Goneyalewa. Na ivunau bibi e vakavuvulitaki ena iToko ni Goneyalewa1 e bibi sara vei ira na goneyalewa, ia e yaga vei keda kece, oka kina o keda eda sega ni goneyalewa.
E tekivu va oqo na iToko ni Goneyalewa, “Koi au e dua na luvena yalewa lomani na itubutubu vakalomalagi, ena ituvaki vakalou kei na icavacava tawamudu.”2 Na itukutuku oqo e koto kina e va na dina bibi. Taumada, o iko na luvena yalewa lomani. E sega ni dua na ka o cakava—se sega ni cakava—e rawa ni veisautaka oya. E lomani iko na Kalou baleta nio Luvena yalewa vakayalo. Ena so na gauna eda na sega beka ni vakila na Nona loloma, ia e dau tu ga. Na loloma ni Kalou e uasivi sara.3 E sega ni rawa ni da vakila na loloma oya.
Na itavi bibi ni Yalo me vakadewataka na loloma ni Kalou vei keda.4 Ia, e rawa ni vakamatavulotaki na veivakayarayarataki ni Yalo Tabu ena vei “ivakarau ni yalo, me vaka na cudru, veicati, … [se] na rere …me vaka na noda tovolea me da vakila na ikanakana vinaka ni dua na vua ni vaini ni da kania tiko e dua na mataqali boro gaga. … [Na ikanakana ni dua] e vakamalumalumutaka vakadua na kena kadua.”5 Sa vakakina na itovo ni bula e yawaki keda na Yalo Tabu, oka kina na ivalavala ca,6 yaco kina me dredre na noda vakila na loloma ni Kalou vei keda.
E tautauvata, na noda vakila na loloma ni Kalou e rawa ni vakamalumalumutaki mai na veika dredre kei na tauvimate vakayago se mate ni vakasama, kei na veika tale eso. Ena veikisi kece sara oqo, ena rawa ni yaga kina na nodra ivakasala na iliuliu nuitaki se o ira na kenadau. E rawa talega ni da tovolea me da vakavinakataka na noda isema ki na loloma ni Kalou ena noda tarogi keda, “Sa tudei tu beka na noqu lomana na Kalou se au dau lomani Koya ga ena veisiga vinaka, ka sega soti niu lomani Koya sara ni yaco mai na siga ca?”
Na ikarua ni dina sai koya ni tiko na noda itubutubu vakalomalagi, e dua na tama kei na tina.7 Na ivunau me baleta na Tina Vakalomalagi e yaco mai ena ivakatakila ka dua na vakabauta era kila ga na Yalododonu Edaidai. E vakamacalataka o Peresitedi Dallin H. Oaks na bibi ni dina oqo: “Na noda kilaka vakayalo e tekivu vei ira na itubutubu vakalomalagi. Na ituvuka ni noda sasaga me da vakataki rau.”8
E lailai na veika e vakatakilai me baleta na Tinada Vakalomalagi, ia na veika eda kila sa umani toka ena veitalanoa ni ulutaga vakosipeli ka kunei ena epi Gospel Library.9 Ni o wilika na veika e tu kina, o na kila na veika au kila me baleta na ulutaga. Au diva me levu cake na ka au kila. O iko tale ga se tu beka eso na nomu taro ka o vinakata mo kunea eso tale na kena isau. Noda vaqara na kila ka cecere cake sa tiki bibi sara ni noda torocake vakayalo, ia yalovinaka qaqarauni. Na ile ena sega ni rawa ni vakaisosomitaka na ivakatakila.
Na vatavatairalago ena sega ni vakavuna na kila ka cecere vakayalo, ia e rawa ni cavilaki keda se kauti keda tani mai na veika sa vakatakilai.10 Me vaka, a vakavulici iratou na Nona tisaipeli na iVakabula, “Dou dau masuta tiko na Tamada ena yacaqu.”11 Eda muria na ivakarau oqo ka sokalou vei Tamada Vakalomalagi ena yaca i Jisu Karisito ka da sega ni masuta na Tinada Vakalomalagi.12
Me tekivu mai na gauna e lesia kina na Kalou na parofita, era sa vakadonui me ra vosa ena Vukuna. Ia era sega ni vosataka na ivunau era vakasamataka ga vakataki ira”13 se vakavulica na veika e se bera ni vakatakilai. Vakasamataka mada na vosa ni parofita ni Veiyalayalati Makawa o Pelami, ka tukuni vua me vosavakacacataki ira na Isireli me vinaka kina o Moapi. Kaya o Pelami, “Kevaka sa na solia vei au [na tui Moapi] na siliva kei na koula e sinai rawa kina na nona vale, au sa sega kina ni rawata meu vakatanitaka me levu cake se me lailai sobu na vosa i Jiova na noqu Kalou.”14 Era vakakina na parofia ni gauna oqo. Na cikevi ni ivakatakila mai vua na Kalou e ka beci ka sega ni dau vakavotukana. Ia, me da waraka na Turaga kei na Nona gauna me vakatakila mai na Nona dina ena iwalewale sa tauyavutaka tu o Koya.15
Na ikatolu ni ka dina ena parakaravu liu ni iToko ni Goneyalewa sai koya na noda “bula vakalou.” Oqo e tiki sara ga ni noda bula. Oqo e “tiki sara ga ni yagoda,” ka da rawata mai vei rau na noda itubutubu vakalomalagi,16 ka sega ni gadrevi kina na noda sasaga. Oqo na keda ivakatakilakila bibi duadua, veitalia na sala cava tale eda digitaka me da vakatakilai keda kina. Na kilai ni dina levu oqo e bibi sara vei keda yadua vakauasivi cake vei ira era lewena na ilawalawa ka ra dau beci tu mai na veigauna makawa, vakacacani, se lewai tu. Nanuma matua tiko na kemu ivakatakilakila bibi duadua sai koya e semati iko kina kemu ituvaki vakalou ni ko luveni Kalou.
Na ikava ni dina sai koya ni dua na keda “icavacava tawamudu.” Na icavacava oqori ena sega ni vakasaurarataki vei keda. Oti na mate, eda na ciqoma na veika eda sa vakadonui kina ka “rekitaka [ga] na veika [eda] sa tuvakarau me da ciqoma.”17 Na noda rawata na keda icavacava tawamudu ena vakatau ena noda digidigi. E gadrevi kina me caka ka maroroi na veiyalayalati tabu. Na salatu ni veiyalayalati oqo sai koya na ivakarau eda lako mai kina vei Karisito ka yavutaki ena dina e taucoko, kei na lawa tawamudu ka sega ni veisau. E sega ni rawa ni da bulia ga na noda salatu ka namaka na veika sa yalataka tu na Kalou. Me namaki na Nona veivakalougatataki ni sega ni muri tiko na lawa tawamudu e virikotori kina18 e veivakacalai, e vaka ni da nanuma ni da tara e dua sitovu katakata ka qai “lewa” me da kakua ni kama.
Ko ni na kila beka niu dau qaravi ira na tauvimate ni uto. Dau rawati na iwali vinaka duadua ni vakamuri na ituvatuva ka tauyavutaki ena veiqaravi sa vakadinadinataki oti. E dina kilai tu, eso na tauvimate era dau tovolea ga me ra veivosakitaka e dua tani tale na ituvatuva. Era dau kaya, “Au vinakata meu taura e levu na wainimate” se “au sega ni vinakata me caka vei au e levu tale na vakatovotovo.” E dina, na galala etu vei ira na tauvimate me ra vakatulewataka na ka me caka vei ira, ia kevaka era lako tani mai na ituvatuva uasivi duadua, ena ca na vua ni nodra qaravi. O ira na tauvimate ni uto e sega ni rawa ni ra digitaka e dua na iwalewale lolovira ka qai bilitaki vuniwai ni ca na veiqaravi.
E vaka kina vei keda. Na sala e tuvana na Tamada Vakalomalagi ena liutaki keda kina icavacava tawamudu vinaka duadua. E tu na noda galala ni digidigi, ia eda sega ni rawa ni digitaka na revurevu ni noda sega ni muria na salatu sa vakatakilai mai.19 Sa kaya oti na Turaga “Ia ko koya sa beca e dua na lawa, ka sega ni muria na lawa, ia sa segata me muria ga na lomana, ia sa segata me muria tikoga na lomana, … ena sega ni vakatabui ena lawa, io ena sega talega ena loloma cecere, na lewa dodonu, se na lewa.”20 E sega ni rawa ni da lako tani mai na nona sala na Tamada Vakalomalagi ka da qai bilitaki Koya ena veika ca e yacovi keda.
Na ikarua ni parakaravu ena iToko ni Goneyalewa e va qo: “Niu dua na tisaipeli i Jisu Karisito, au segata meu yaco me vakataki Koya. Au dau vakasaqara ka cakacakataka na ivakatakila e yaco vei au ka veiqaravi vei ira na tamata ena Yacana tabu.” E rawa ni da tara cake e dua na ivakadinadina kei Jisu Karisito ena noda cakacaka ena vakabauta.21 E rawa ni da kaya me noda na isolisoli vakayalo “me ra kila ni sa i Jisu Karisito na Luve ni Kalou, ka vakoti ena kauveilatai ena vuku ni ivalavala ca ni vuravura.” Se e rawa ni da ciqoma na isolisoli me da vakabauta na nodra vosa o ira era kila,22 me yacova ni da sa kila sara vakataki keda. E rawa ni da muria na nona ivakavuvuli na iVakabula ka vukei ira na tani me ra lako mai Vua. Ena ivakarau oqo eda sa duavata kina kei Koya ena Nona cakacaka.23
E tomani na iToko ni Goneyalewa, “Au na tu ka ivakadinadina ni Kalou ena veigauna kecega kei na veika kecega kei na veivanua kecega. Eda gadrevi na lewe ni Lotu kece sara me da ivakadinadina ni Kalou,24 e dina ni ralesi na iApositolo kei na Vitusagavulu me ra ivakadinadina digitaki ni yaca i Karisito.25 Vakasamataka mada e dua na qito hoki ka taqomaka duadua tikoga kina na matamata o qoli. Ni sega na nodra veivuke na vo ni lewe ni timi, ena sega ni rawa ni taqomaka vakavinaka sara o qoli na matamata, ka na druka tikoga na timi. Sa gadrevi vakakina na tamata kecega ena nona timi na Turaga.26
Na iotioti ni parakaravu ena iToko ni Goneyalewa e tekivu vaqo, “Niu sasaga tiko meu rawata na bula vakacerecerei, au dau vakamareqeta na isolisoli ni veivutuni ka segata meu vinaka cake ena veisiga yadua.” Ena vuku ni nona isoro ni veivakaduavatataki na iVakabula, sa rawa kina me da veivutuni, vulica na noda cala, ka sega ni vakacacani kina. E vakavuvulitaka o Peresitedi Russell M. Nelson, “Sa rui levu na tamata era raica na veivutuni me veivakasaurarataki. … Ia na vakasama ni veitotogitaki oqo e vakavurea mai o Setani. E saga o koya me vakataotaka noda raici Jisu Karisito, ka tucake tu ka dedeka tu mai na ligana, e nuitaka ka tuvakarau me veivakabulai, veivosoti, samaki keda, veivaqaqacotaki, veivakasavasavataki, ka vakatabui keda.”27
Ni da sa veivutuni vakaidina, ona sega ni mavoa vakayalo, veitalia na veika eda sa cakava, se vakacava na kena ca, se na levu ni gauna eda cakava kina.28 Na levu ga ni gauna eda veivutuni kina ka segata vakaidina na veivosoti, sa rawa ni da vosoti.29 Sa dua na isolisoli vakasakiti mai vua na noda iVakabula, o Jisu Karisito!30 E rawa ni vakadeitaka vei keda na Yalo Tabu ni da sa vosoti. Ni da vakila na reki kei na vakacegu,31 e kauta tani na noda lomaocaoca,32 ka sega tale ni vakaleqai keda tiko na noda ivalavala ca.33
Ni oti madaga na veivutuni vakaidina, , eda rawa ni tarabe. Na “tarabe” e sega ni kena ibalebale ni sega ni veirauti na veivutuni ia e tukuna ga ni tu na malumalumu vakatamata. E veivakacegui ni da kila ni “duatani na nona raica na Turaga na malumalumu mai na Nona [raica] na veisaqasaqa.” Me da kakua ni vakatitiqataka na nona rawata na iVakabula me vukei keda ena noda malumalumu baleta ni “dau cavuta na Turaga na malumalumu, e veigauna ena sala vata kei na loloma cecere.”34
Qai mai tini na iToko ni Goneyalewa, “Ena vakabauta, au na vaqaqacotaka na noqu itikotiko kei na matavuvale, cakava ka maroroya na veiyalayalati tabu ka ciqoma na cakacaka vakalotu kei na veivakalougatataki ni valetabu.” Ni vaqaqacotaki na itikotiko kei na matavuvale e rawa ni kena ibalebale na kena caka na imatai ni isema ena sinucodo ni vakabauta, ni semati tiko na isolisoli ni vakabauta, se ni vakavoui.35 Ia, na igu ena yaco mai ena vakabauti Jisu Karisito kei na caka ni veiyalayalati tabu.
Ena valetabu, eda vulica kina se o cei keda kei na vanua eda lako mai kina. Na daunivuku ni Roma o Sisaro e kaya, “Nio sega ni via kila na veika a yaco ni se bera nomu sucu mai sai koya na cudruvi mo bula tu ga vaka e dua na gone.”36 E dina ni tukuna o koya na veika me baleta na veika vakavuli ni veigauna makawa, ia na nona rai yalomatua e rawa ni vakarabailevutaki. Eda na bula vakagone tu ga me sega ni mudu kevaka eda sega ni via kila na veika tawamudu e dau vulici mai na valetabu. Mai kea eda na tubu cake vua na Turaga, “rawata na taucoko ni Yalo Tabu,”37 ka yaco me taucoko nomu bula vakatisaipeli ni iVakabula.38 Ni da maroroya na noda veiyalayalati, eda na ciqoma na kaukauwa ni Kalou.39
Au sureti kemuni mo ni cakava me itakele ni nomuni bula o Jisu Karisito ka nanuma na yavu dina eso ena iToko ni Goneyalewa. Kevaka o tuvakarau, ena dusimaki iko na Yalo Tabu. E vinakata na Tamada Vakalomalagi mo Kena isosomi ka ciqoma na veika kece e Nona.40 E sega ni rawa Vua me solia vei iko e levu cake. E sega ni rawa Vua me yalataka vei iko e levu cake. E lomani iko vakalevu cake mai na veika o kila ka vinakata mo marau ena bula oqo vakakina ena bula sa bera mai. Ena yacai Jisu Karisito, emeni.