Laveta Cake na Yalomu ka Reki
Eda a sucu mai ena gauna oqo ena inaki vakalou, na sokumuni o Isireli.
Ni vosa tiko vei Thomas B. Marsh, e dua na saumakivou ki na lotu, a kaya na Turaga ena veivakayaloqaqataki, “Laveta cake na yalomu ka reki, ni sa yaco mai na gauna mo vakayacora kina na nomu ilesilesi” (Vunau kei na Veiyalayalati 31:3).
Au vakabauta ni veisureti oqo sa rawa me dua na veivakauqeti vei ira na lewe ni Lotu kece. Me vaka ni da sa ciqoma yadua mai vua na Tamada Vakalomalagi na ilesilesi ni sokumuni o Isireli ena yasa ruarua ni ilati.
“Na sokumuni oqo,” a kaya o Peresitedi Russell M. Nelson, “sa ka bibi duadua e yaco tiko e vuravura nikua. E sega ni vakatauvatani rawa na kena cecere, e sega ni vakatauvatani rawa na kena bibi, ka sega ni vakatauvatani rawa na kena lagilagi”1.
E dina, ni vuqa tu na cakacaka yaga e vuravura. Sa ka dredre sara meda cavuti ira kece. Ia o sega beka ni vinakata mo vakaitavi ena dua na cakacaka cecere o rawa ni cakava ka yaco nomu me yaga vakalevu cake na nomu cau ena veisau bibi? Na vakasokumuni e cakava na veisau tawamudu vei keda kece. Na tamata kece se cava ga nodra yabaki ni bula e rawa ni vakaitavi ena cakacaka oqo se ituvaki cava ga kei na vanua cava ga era tiko kina. E sega tale na cakacaka e vuravura me taucoko vakaoqo.
Ni vosa vakatabakidua vei ira na itabagone, a kaya o Peresitedi Nelson “ni Tamada Vakalomalagi sa maroroya tu mai e vuqa Nona tamata cecere—e rairai … Nona timi qaqa—ena iotioti ni wasewase oqo. O ira na tamata cecere oqo—na timi uasivi o ya, iratou na qaqa—sai kemuni!”2
Io, ko ni sa vakarautaki mai ni bera na bula oqo ka mai sucu mo vakaitavi ena cakacaka cecere oqo ni vakasokumuni o Isireli ena yasa ruarua ni ilati ena iotioti ni gauna oqo (raica na Vunau kei na Veiyalayalati 138:53–56).
Na cava e sa rui bibi kina na cakacaka oqo? Baleta ni “sa ka talei ena mata ni Kalou na yalo ni tamata” (Vunau kei na Veiyalayalati 18:10 Ka baleta “ko ira yadua sa vakabauti [Jisu Karisito], ka papitaiso, era na vakabulai; ka … na rawata na matanitu ni Kalou” (3 Nifai 11:33). Sa vakakina, “ena soli kina vua na ka kecega sa tu vei [Tamada]” era sa ciqoma na Nona cakacaka vakalotu ka maroroya na Nona veiyalayalati (Vunau kei na Veiyalayalati 84:38). Me ikuri, “sa lewe lailai ga na vakatau ni were” (Luke 10:2).
Ena Lotu i Jisu Karisito ni Yalododonu Edaidai e kune duadua ga na kaukauwa, na lewa, kei na sala mera solia kina na kalougata, era bula tiko se mate.
Me vaka a kaya o Peresitedi Nelson: “Na gauna o cakava kina e dua na ka e vukea kina e dua—ena yasa cava ga ni ilati—kalawa ki liu ka cakava nomu veiyalayalati kei na Kalou ka ciqoma nodra cakacaka vakalotu bibi ni papitaiso kei na valetabu, o sa vakasokumuni Isireli tiko. O ya sara ga na kena rawarawa.”9
Me vaka ni vuqa tu na sala ni veivuke ena sokumuni, au gadreva meu vosa ena ka oqo: na ilesilesi ena kaulotu tudei. E vuqa vei kemuni, e kena ibalebale mo daukaulotu veivakavulici. E vuqa vei ira eso, e kena ibalebale mo daukaulotu veiqaravi Ia, e saga o vuravura me moici ira tani na itabagone mai na ilesilesi vakalou bibi oqo ena rere kei na veilecayaki.
Eso tale na veimoici tani e sotavi ena gauna ni matelevu, biu na cakacaka vinaka, biu vuli, se laki malele tu vakatabakidua me domona e dua. Na tamata yadua ena dui sotava ga na nona ibolebole. Na veimoici tani vakaoqo ena basika mai ena gauna donu ni caka tiko na qaravi ni Turaga, kei na digidigi ena laki bibi e muri sa sega ni dau rawarawa ena gauna oqo.
Au sa sotava oti ni dau vakaleqai na vakasama ni dua na itabagone. Niu sa vakavakarau tiko meu laki kaulotu, eso na mataqali yalo vakatani a via vakayalolailaitaki au. Dua o noqu vuniwai ni bati. Ni sa kila o koya na noqu ilesilesi meu laki daukaulotu, a saga me tarova meu kua ni laki kaulotu. Au a sega sara tu ga ni kila vakalailai ni o vuniwai ni bati e saqata tiko na Lotu.
Na vakataotaki ni noqu vuli a mai veimedraki sara talega. Niu sa kerea meu livi me rua na yabaki mai na parokaramu ni univesiti, a tukuni vei au ni sega ni rawa. Au na kau tani mai na noqu itutu ena univesiti keu sega ni lesu mai ni sa oti e dua na yabaki. E Brazil, e leqa levu sara ni lavaki ga ni curu ena parokaramu ni univesiti sai koya e dua na veitarogi dredre ka dau veisisivitaki.
Niu saga tiko vakaveitaravi, sa tukuni mai ni kevaka meu sega ni tiko me dua na yabaki, sa rawa meu kerea meu vakadonui ena vuku ni inaki cecere, Ena rawa me vakadonui se sega. Au a kurabui sara meu taura tale na dredre o ya ni veitarogi ni oti e rua na yabaki niu sega tu na vuli.
Au sa taleitaka sara tale tikoga e dua na goneyalewa. Eso na noqu itokani era a duavata ena gagadre oqo. Au sa vakasama sara, “Keu sa gole meu kaulotu, ena dredre vei au.”
Ia na Turaga o Jisu Karisito a veivakauqeti cecere vei au meu kua ni rerevaka na siga ni mataka niu saga meu qaravi Koya ena yaloqu taucoko.
A tiko talega na Nona ilesilesi me cakava. Ena Nona vosa, a tukuna kina, “Niu sa sega ni lako sobu mai lomalagi, meu kitaka na lomaqu, meu kitaka ga na loma i koya sa talai au mai” (Joni 6:38 A rawarawa beka Nona ilesilesi? E sega sara. Na Nona rarawa, a tiki bibi sara ni Nona ilesilesi, a yaco kina “na Kalou sara mada ga, ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagoqu, ka sa rarawa sara kina na yagoqu kei na yaloqu—kau sa gadreva meu kakua ni gunu mai na bilo wiwi, ka vakasuka—
“Ia, me vakalagilagi ga ko Tamaqu, kau sa gunuva na bilo ka vakacavara na noqu vakavakarau vei ira na luve ni tamata” (Vunau kei na Veiyalayalati19:18–19)
Na qaravi ni kaulotu tudei ena rairai dredre vei keda. E rairai gadrevi meda kauta laivi mada na veika bibi ena gauna oqo. Na Turaga sa kila vinaka tu oqo, ka sa dau tu o Koya e yasada.
Na ka dina, ena nodratou itukutuku vei ira na daukaulotu ena Vunautaka na Noqu Kosipeli, sa yalataka kina na Mataveiliutaki Taumada, “Na Turaga ena sauma ka vakalougatataki iko vakalevu ni ko qaravi Koya ena yalomalua kei na masu.”4 Sa dina sara ni ra kalougata kece na luve ni Kalou, ena sala cava ga, ia e tiko na duidui ni vakalougatataki kei na vakaiyautaki vakalevu ena Nona veiqaravi.
Nanuma tiko na ibolebole au nanuma au a sotava ni bera noqu kaulotu? Noqu vuniwai ni bati? Au kunea e dua tale. Noqu univesiti? Era a vakadonuya vei au. Nanuma tiko na goneyalwa o ya? A vakamau kei dua na noqu itokani vinaka.
Ia na Kalou a vakalougatataki au vakalevu. Kau sa vulica ni kalougata ni Turaga ena yaco mai ena sala duidui mai na kena eda namaka. Me vaka, ni Nona nanuma sa sega ni noda nanuma (raica na Aisea 55:8–9).
Ena kalougata levu e vuqa sa solia vei au o Koya meu qaravi Koya niu daukaulotu tudei sa vakabauti cecere kina o Jisu Karisito kei na Nona Veisorovaki kei na kila-ka qaqa kei na ivakadinadina ni Nona veivakavulici, meu kua ni veikauyaki “ena cagi kecega ni ivakavuvuli” (Efeso 4:14). Sa yali noqu rere meu veivakavulici. Na noqu igu meu sotava na ibolebole ena qaqa sa tubu cake. Niu dikevi ira na tamata kei na vuvale au sotava se vakavulica niu kaulotu tiko, au vulica ni ivakavuvuli ni Kalou sa dina sara ni a kaya ni ivalavala ca e sega ni kauta mai na marau dina ia na talairawarawa ki na ivakaro ni Kalou ena vukea meda bula cecere vakayago ka vakayalo (raica na Mosaia 2:41; Alama 41:10). Kau sa kila vakai au ni Kalou sa Kalou ni cakamana (raica na Momani 9).
Na veika kece oqo sa iyaya yaga ni vakarau ki na bula ni uabula, oka kina na vakamau kei na bula vakaitubutubu, veiqaravi ena Lotu, kei na bula vakacakacaka kei na itikotiko raraba.
Ni oti noqu kaulotu, au sa kovuti tu ena yaloqaqa cecere meu vakatakilai au niu sa imuri yalodina i Jisu Karisito kei na Nona Lotu ena ituvaki kece kei ira kece na tamata, kau a wasea talega na kosipeli vua e dua na goneyalewa totoka sa mai noqu itokani tawamudu dodonu, vuku, marautaki, ka lomani, na matanisiga ni noqu bula.
Io, na Kalou sa vakalougatataki au vakalevu, au sega ni vakasamataka rawa, ni na cakava o Koya vei ira sa “qaravi Koya ena yalomalua kei na masu.” Au sa vakavinavinaka tawamudu vua na Kalou ena Nona vinaka.
Na noqu kaulotu a veisautaka vakadua na noqu bula. Au sa kila ni sa yaga bibi na guta meda nuitaka na Kalou, ka nuitaka na Nona vuku kei na loloma veivueti kei na Nona yalayala. Me vaka ga, ni o Koya e Tamada, ka sega ni vakabekataki, ni vinakata meda vinaka sara.
Kemuni na itabagone e vuravura taucoko, au sa sureti kemuni ena veisureti nei Peresitedi Nelson, vei kemuni kece “mo ni lewena na mataivalu ni itabagone ni Turaga mo ni vukea me sokumuni o Isireli.” A kaya o Peresitedi Nelson:
“E sega ni dua na kae cecere cake ena ka e salamuria mai. E segasara ga.
“Na vakasokumuni oqo e dodonu me kena ibalebale vei iko na ka kecega . Oqo na ilesilesi ko a talai mai kina ki vuravura.”5
Eda a sucu mai ena gauna oqo ena inaki vakalou, na sokumuni o Isireli. Ni da veiqaravi vaka-daukaulotu tudei, eda na bolei ena veigauna, ia na Turaga Vakai-Koya sa noda ivakaraitaki cecere ka idusidusi ena veituvaki eso. Sa kila tu o Koya na cava na ilesilesi dredre. Ena Nona veivuke, eda rawa ni cakava na veika dredre. Ena tu o Koya e yasada (raica na Vunau kei na Veiyalayalati 84:88), ka na vakalougatataki keda vakalevu ni da qaravi Koya ena yalomalua.
Ena vuku ni ka kece oqo, au sega ni kurabui ni a kaya na Turaga vei Thomas B. Marsh kei keda kece, “Laveta cake na yalomu ka reki, ni sa yaco mai na gauna mo vakayacora kina na nomu ilesilesi.” Ena yaca i Jisu Karisito, emeni.